Luka 1 - Mukanda Wa Zambi 1970

Maliji atangu

¹ Mukwetu Teofilu: Unanyingika chize atu anji haanalihana ni kusoneka yikuma yize hiyinamanunuka hakachi ketu.

² Haanasoneka chize atulwezele yela waze ayimwene ku kabutu, waze te akulongesa maliji a Zambi.

³ Ni yami nawa hingunanyongo ngwami, chinalite kukusonekena yena, mwanangana, yikuma yize ngwe chinalite. Mumu hingunalisela pundu ku yuma yize yasolokele chize ku kabutu.

⁴ Chino ngunachilingi hanga uhase kunyingika yuma yamwenemwene yize akulongesele.

Kanganda ka mwilu yambulula kusemuka cha Yoano Chipapachisa

⁵ Muze te Herode akuyula mu chifuchi cha Yudea, yikubwa hako lia Zambi, jina lienyi te Zakaria, wa ku mbunga ya mahako ja Abija. Pwo lienyi, Isabele (Elisabete), wa ku vungu lia Arone, mwata wa mahako ja Zambi.

⁶ No eswe aali yaabwa akwa ululi ku meso ja Zambi, yaafunga Shimbi jeswe ni ndako jeswe ja Zambi, te keeshi kapalia.

⁷ Alioze kaabwile ko ni mwana, mumu Isabele (Elisabete) te mumba. No eswe aali yaabwa tushinakaji.

⁸ Limwe tangwa, Zakaria te kanalingi uvumbiko wa kuhakwila ku meso ja Zambi, mumu e matangwa a mbunga yenyi a kuchilinga.

⁹ Nikulita ni ndako ya mahako, yamutongola, ha kuta chela, ha kunjila mu zuwo lia Mwene Zambi ni kwocha milambu ya vumba libema.

¹⁰ Atu eswe te kaanalembe haze ha ola ya kwocha milambu yize.

¹¹ Kanganda ka mwilu yasolokela Zakaria, yamana ku chindume cha chilumbilo cha kwochela milambu ya vumba libema.

¹² Zakaria, ha kumumona, yatungumuka, yevwa woma.

¹³ Alioze kangunga ka mwilu yamwamba ngwenyi: “Kanda wivwa woma, Zakaria! Zambi hevwa kuliumba che. Pwo lie, Isabele (Elisabete), kumakasema mwana wa lunga, ukamuluke jina ngwe, Yoano.

¹⁴ Muukevwa chiseke chinji, ni atu anji kumaakawahilila ha kusemuka chenyi.

¹⁵ Mumu makabwa mutu munene ku meso ja Mwene Zambi. Kechi kanwa vinyu, chibwe Chuma chikwo cha kuzengewesa mutu. Makazala ni Mwiku wa Linanga chize ku jimo lia naye.

¹⁶ Makahilwisa atu anji hakachi ka Israele kuli Mwene Zambi yo.

¹⁷ Makatetekela ku meso ja Zambi mu tachi ni ndundo ja mukwa munanyi a Zambi, Eliya. Makawanyisa atato ni ana jo. Makalumuna yihulia akabwe ni manyonga a ululi. Makalulikila Mwene Zambi atu jenyi.”

¹⁸ Zakaria yahula kanganda ka mwilu ngwenyi: “Ngwe kuchi mungunyingika ngwami, chino chili chamwenemwene? Mumu hinabwa kashinakaji, ni pwo liami nawa habwa kashinakaji.”

¹⁹ Kanganda ngwenyi: “Yami nguli Gabriel. Nakumana ku meso ja Zambi ni kumuvumbika. Neye hangutuma kuhanjika ne ni kukwambulwila sango jino jibema.

²⁰ Alioze kuwafulielele maliji jami waze maakamanunuka ha tangwa lize alakenyene. Kashika, muubwa kanaye, kuuchi kuhasa kuhanjika ndoo ku tangwa lize yuma yino muyikamanunuka.”

²¹ Atu te kaanatwaminyina Zakaria nikulishimwoka ha kushimbwila chenyi mu zuwo lia Zambi.

²² Muze Zakaria hatuhuka kahashile ko kuhanjika no. Mba atu yaanyingika ngwo, Usolwelo amona mu zuwo lia Zambi. Zakaria yaalweza ni minwe, mumu te habwa kanaye.

²³ Muze Zakaria hamanununa matangwa a uvumbiko wenyi mu zuwo lia Zambi, yahiluka ku mahienyi.

²⁴ Muze amwe matangwa haabalika, pwo lienyi Isabele (Elisabete) yaseseka ufumba, yaswama tukweji atano mu zuwo, yalihanjikisa ngwenyi:

²⁵ “Chenacho Mwene Zambi hangukwasa. Haliabwila hanguchiza sonyi ku meso ja atu eswe.”

Kanganda ka mwilu yambulula kusemuka cha Yesu

²⁶ Ha kakweji wa muchisambano wa ufumba wa Isabele (Elisabete), Zambi yatuma kanganda ka mwilu, Gabriel, ku limbo lia Nazare mu Galilea.

²⁷ Te kali ni liji lia kulweza mwana pwo, jina lienyi Maria, yoze te kanda achilimona ni lunga. Te hanamwambisa kuli Josefe, wa ku vungu lia mwanangana David.

²⁸ Kanganda ka mwilu yamuheta nikwamba ngwenyi: “Vulie! Mwene Zambi kali hamwe ni yena, hanakuwahisa!”

²⁹ Maria yalibikala kuhiana ha maliji wano, yalihula ulumbumwiso wa kumeneka chenyi.

³⁰ Kanganda ngwenyi: “Kanda wivwa woma, Maria, mumu Zambi hakulweza utu.

³¹ Muuseseka ufumba muukasema mwana wa lunga, muukamuluka jina ngwe, Yesu.

³² Makabwa mwanangana munene, atu maakamuvuluka ngwo: ‘Mwana wa Mukwa Mwilu Mwahiana.’ Mwene Zambi makamwaha chitwamo cha kashakulu kenyi David.

³³ Makayula vungu lia Yakoba ku miaka yeswe. Wanangana wenyi kuuchi kahwa!”

³⁴ Maria yakumbulula kanganda ka mwilu ngwenyi: “Mamee! Ngwe kuchi chino muchihasa kubwa, mumu kanda nguchilimona ni lunga?”

³⁵ Kanganda ngwenyi: “Mwiku wa Linanga muukuhulumukina, ndundo ja Zambi, Mukwa Mwilu Mwahiana, mujikuzulamina ngwe chizulie. Kashika, mwana yoze munangi maakamuvuluka ngwo, mwe Mwana Zambi.

³⁶ Isabele (Elisabete), usoko we yoze te akuvuluka ngwo, mumba, habwa ni ufumba wa tukweji asambano. Makasema mwana wa lunga, chibwe habwa kulu kashinakaji.

³⁷ Mumu Zambi nichimwe machisa kenu.”

³⁸ Mba Maria yamba ngwenyi: “Nguli kavumbi ka Mwene. Chikabwe kuli yami ngwe chize hiwamba.” Mba kanganda yamuhichika.

Maria yanangisa Isabele (Elisabete)

³⁹ Ha matangwa waze ene, Maria yakatuka, yaya nikawashi ku chihunda chimwe cha mu chifuchi cha milundu ya mu Yudea,

⁴⁰ yanjila mu zuwo lia Zakaria, yameneka Isabele (Elisabete).

⁴¹ Ha shimbu lize Isabele (Elisabete) hevwa kumeneka cha Maria, mwana kemba yatumbuka mu jimo. Isabele (Elisabete) yazala ni Mwiku wa Linanga,

⁴² yakololoka ngwenyi: “Ewa tatee! Zambi hakuwahisa kuhiana mapwo eswe. Zambi hawahisa mwana yoze muukasema!

⁴³ Yami iya mba naye ya Mwene wami meza kuli yami?

⁴⁴ Mumu, tala, ha shimbu lize nevwa kumeneka che, mwana kemba katumbuka ni chiseke mu jimo liami.

⁴⁵ Kuwawaha yena Wafulielele ngwe, yize akulwezele Mwene muyikamanunuka!”

Mwaso wa uhaliso wa Maria

⁴⁶ Mba Maria yamba ngwenyi: “Mbunge yami yinalemesa Mwene Zambi,

⁴⁷ yinawahilila mumu hali Zambi, Chilamwina chami,

⁴⁸ mumu hatala ulelu wami, yami ndungo yenyi. Chize ku haliabwila yisemuko yeswe maakanguvuluka ngwo, Kawaha,

⁴⁹ mumu Zambi, Mukwa Ndundo Jeswe, hangulingila yuma yinene. Jina lienyi lia linanga.

⁵⁰ Kakuvwila keke waze akumuvwila woma ku yisemuko yeswe.

⁵¹ Halinga ni kwoko lienyi lia ndundo. Hamwanga akwa kulitohesa mu manyonga jo.

⁵² Hasunwisa mianangana ha yitwamo yo ya wanangana, halemesa akwa kulikehesa.

⁵³ Hakuchisa akwa zala ni yuma yibema, hakatwisa pichi mokomoko.

⁵⁴ Hakwasa kavumbi kenyi, Israele. Kavulamine ko kusolola keke yenyi

⁵⁵ kuli Abrahama ni vungu lienyi ku miaka yeswe, ngwe chize hanachilakenya kuli tushakulu twetu!”

⁵⁶ Maria yatwama ni Isabele (Elisabete) ngwe tukweji atatu, mba yahiluka ku mahienyi.

Kusemuka cha Yoano Chipapachisa

⁵⁷ Tangwa lia Isabele (Elisabete) lia kusema yiliheta, mba yasema mwana lunga.

⁵⁸ Enyembo ja Isabele (Elisabete) ni usoko wenyi yeevwa ngwo, Mwene Zambi hamwokesela keke. No yaawahilila hamwe nenyi.

⁵⁹ Muze mwana habwa ni matangwa nake, yisemi yeeza akamupwise ngalami. Atu yaazanga kumuluka jina lia tato Zakaria,

⁶⁰ alioze naye yakumbulula ngwenyi: “Hi chocho ko! Jina lienyi Yoano.”

⁶¹ No yaamwamba ngwo: “Niumwe hakachi ka usoko we ukwete jina lino.”

⁶² Mba yaahula tato ni minwe hanga anyingike jina lize azangile kuluka mwana.

⁶³ Zakaria yeta hausonekene. Yasoneka ho maliji wano ngwenyi: “Jina lienyi Yoano.” No eswe yaalishimwoka.

⁶⁴ Hazehene limi lia Zakaria yilitusuka, yabutuka kuchichimieka Zambi.

⁶⁵ Mba enyembo eswe yeevwa woma. Sango jino yaajambulula mu chifuchi cheswe cha milundu ya mu Yudea.

⁶⁶ Waze eswe achivwile yaanyonga ni kulihula ngwo: “Mwana yono kuchi makabwa?” Chamwenemwene kuma te kali ni tachi ja Mwene Zambi.

Zakaria yambulula yuma yize muyiza ho

⁶⁷ Zakaria, tato ya mwana, yazala ni Mwiku wa Linanga, mba yahanjika maliji wano ngwenyi:

⁶⁸ “Chichimiekenu Mwene Zambi, Zambi ya Aisraele! Mumu heza ni kulamwina atu jenyi ni kwakula.

⁶⁹ Hatusolwela mbinga ya ulamwino wa ku vungu lia mwanangana David, kavumbi kenyi.

⁷⁰ Chenacho hanahanjika kulu kuli akwa munanyi jenyi a kulinanga.

⁷¹ Hanalakenya ngwenyi, makatupulula ku tachi ja akwa kole jetu, ku tachi ja waze akutuvutwokela.

⁷² Nawa ngwenyi, makasolwela tushakulu twenu keke yenyi ni kwiwuluka Usendo wenyi wa linanga.

⁷³ Zambi hanalishingi kulu kuli Abrahama, kashakulu ketu,

⁷⁴ mu kutukula ku tachi ja akwa kole jetu, ni kututayiza mu kumuvumbika woma wakuhi,

⁷⁵ hanga tubwe akwa kulinanga ni akwa ululi ku meso jenyi matangwa eswe a mwono wetu.

⁷⁶ “Ni yena, mwanami, maakakuvuluka ngwo, mukwa munanyi wa Zambi Mwilu Mwahiana. Muukatetekela kulutwe lia Mwene. Muukumululikila jila yenyi,

⁷⁷ ni kunyingikisa atu jenyi ngwe, makaalamwina ha kwakonekena milonga yo.

⁷⁸ Zambi yetu kali mukwa ululi kanda mukwa keke. Makatutemwina pangu lia mwilu ngwe chize liakuvumbuka tangwa,

⁷⁹ ha kutemwina waze ali mu milima ni mu chizulie cha kufwa, ha kutondekeza molu jetu mu jila ya uhwimino.”

⁸⁰ Mwana yatatuka, yakola mu mujimba ni mu mbunge. Yatwama mu puya ndoo ku tangwa lia kusoloka chenyi ku meso ja Aisraele.