Longeshi 8 - Mukanda Wa Zambi 1970

¹ Shina mukwa mana mwe Unanyingika ulumbunwiso wa yuma yeswe. Mana kaakumupwisa mukwa sehelo hi kuchiza kunyakana ku meso.

Kwononoka kuli mwanangana

² Ngunambe ngwami, Ononoka ku Shimbi ja mwanangana; mumu hiwalakenya kulu Zambi ngwe, mungwononokena mwanangana.

³ Mwanangana mahasa kulinga cheswacho anazange, kashika sosoloka ku meso jenyi; kanda utwama ko, hali homa ha utoji.

⁴ Mumu mwanangana kakulinga ni chiyulo, niumwe mahasa kumuhula: “Yika unalingi?”

⁵ Mutu yoze wakwononokena mwanangana, kechi kumona lamba; ni mukwa mana kakunyingika chize chatamba kulinga, ni tangwa lika.

⁶ Kukuli tangwa libema ni jila yinabeme ya kulinga yuma yeswe, alioze yetu twakunyingika hakepe wika!

⁷ Mutu niumwe wa kuli yetu Unanyingika yuma yize muyibwa, nyi kukushi niumwe yoze matulweza.

⁸ Mutu niumwe mahasa kulifunga ku kufwa, hanji kutongola tangwa lia kufwa chenyi. Kajita kahashile kuchina jita; Chenacho nawa ungulungulu kuwahashile kwecha yoze wakuulinga.

Yingulungulu ni akwa ululi

⁹ Yino yeswe nayimwene muze nanyongene yuma yize atu akulinga hano hashi, hashi haze hatwama atu amwe akwete chiyulo, ni akwo akumona lamba kuli ayo.

¹⁰ Ewa, hingunamono mafuka ja yingulungulu ni chize aafunjile. Alioze muze atu akatukile ku mafuka ni kuhiluka mu lie limbo kuze alingile yibi, te kaakwachichimieka. Necho chili chamokomoko.

¹¹ Mumu yika atu akuvulumuna chichize nikawashi? Mumu uvulumwino keeshi kuubatula nikawashi.

¹² Chivulumunyi mahasa kuvulumuna yisuho kulakaji hindu yewu ni mwono wenyi. Ewa, ngunanyingika chize akwamba ngwo: “Nyi wononokena Zambi, yuma yeswe muyiwaha.

¹³ Alioze kuyichi kubwa yibema hali yingulungulu. Mwono wo uli ngwe chizulie kumaakafwa mu ukweze wo, mumu keeshi kwononokena Zambi.”

¹⁴ Alioze hi chocho ko. Hengula kanawa, utale yuma ya hano hashi: yisuho yikwo akwa ululi kaakumona lamba lia yingulungulu, ni e yingulungulu kaakutambula kukundulula cha akwa ululi. Yingumona ngwami, chili chamokomoko.

¹⁵ Kashika hingunakunuka ngwami, mutu mahasa kuliwahisa, mumu kukushi Chuma chikwo chibema mu mwono wenyi shina kulia ni kunwa ni kuwahilila. Chenacho mahasa kuhondangana milimo ha matangwa a mwono wenyi uze Zambi amuhele hano hashi.

¹⁶ Muze nesekele kubwa ni mana ni kulilongesa yize yakubwa hano hashi, yingumona ngwami, muuhasa kunongama ufuku ni mwalwa,

¹⁷ hindu kuuchi kunyingika nichimwe chize Zambi akulinga. Chibwe uhondangane naye kuhiana, kuuchi kuyinyingika. Akwa mana maahasa kwamba: “Tunanyingika,” hindu kenu.