Longeshi 7 - Mukanda Wa Zambi 1970

Manyonga hakutwala ku mwono wa atu

¹ Maji a ndando yinji a vumba libema, kaanabeme, alioze kubwa ni lufuma mubema chinabeme kuhiana. Tangwa lia kusemuka linabeme, alioze lia kufwa linabeme kuhiana.

² Chinabeme kuya ku chiteleka, alioze chinabeme kuhiana kuya kuze analili, mumu atu chaatamba kuliwulula ngwo, kufwa chili ku mahietu.

³ Kuseha chinabeme, alioze kwivwa chinyengo chinabeme kuhiana, mumu chinyengo chakunyakanyisa ku meso, alioze chakukolesa manyonga je.

⁴ Mutu yoze wakunyonga matangwa eswe kubwa ni chiseke kali chihepuke. Mukwa mana kakunyonga hakutwala ku kufwa.

⁵ Kubanjika ku kufumba cha akwa mana chinabeme kuhiana kubanjika miaso ya yihepuke ya kukuchichimieka.

⁶ Kuseha cha yihepuke, chili ngwe kulengenya cha mingonga ha kahia, kuchili Chuma chamokomoko.

⁷ Nyi mukwa mana malinga ni uhepuke kuli mutu mukwo, malipwisa chihepuke. Nyi muutambula mbongo ja mbenga mulibihisa yena mwene.

⁸ Songo lia Chuma lili libema liahiana Ubutukilo wacho. Kulihumikiza chili chibema, alioze kulengumuka chili chibi.

⁹ Kanda utenuka nikawashi, yihepuke kaakufunga kole.

¹⁰ Kanda uhula ngwe: “Mumu yika ha miaka ya kunyima yuma yabwile yibema kuhiana musono?” Chino hi chihula cha mana ko.

¹¹ Chinabeme atu eswe kubwa ni mana; chili ngwe kutambula chihinga;

¹² mana maakuhwimisa kuhiana ubite. Mana maafunga mwono we; chino che kufumbuka cha chinyingi.

¹³ Nyonga hakutwala ku yitanga ya Zambi. Iya mahasa kwolola Chuma chize Zambi ahengesele?

¹⁴ Wahilila ha tangwa lia kuyuka, nyonga kanawa ha tangwa lia lamba, hindu iwuluka ngwe: Zambi kakutuma yeswe yaali, kuwaha ni lamba; kuwahashile kunyingika yuma ya kulutwe.

¹⁵ Mwono wami uli Chuma chamokomoko, alioze hingunamono yuma yeswe. Umwe mutu mubema mahasa kufwa, hindu umwe chingulungulu mahasa kutwama ni mwono, chibwe kali mutu mubi.

¹⁶ Kashika kanda ubwa mubema kuhiana hanji ni mana kuhiana. Mumu yika muulishihila?

¹⁷ Kanda ubwa mubi kuhiana hanji chihepuke kuhiana. Mumu yika muuzanga kufwa muze matangwa je kanda achizuka?

¹⁸ Chibema kubwa mukachi ka yeswe yaali. Nyi muulemesa Zambi, muuyuka.

¹⁹ Akwa kuyula kumi maahasa kukwasa limbo, alioze mana kaakukwasa mutu kuhiana.

²⁰ Hano hashi kuheshi mutu niumwe yoze wakulinga yibema matangwa eswe, yoze keshi kulinga chibi nichimwe.

²¹ Kanda ubanjika ku yuma yeswe yize atu maabanjika. Nyi ka, hanji muwivwa chize kavumbi ke anakulelesa.

²² Mumu yena mwene Unanyingika ngwe, unakalelesa atu akwo yisuho yinji.

²³ Nesekele yuma yino yeswe ni mana jami. Yingubatula ngwami, mungubwa mukwa mana, alioze yuma yino yinanguhiana.

²⁴ Iya mahasa kunyingika kama ulumbunwiso wa mwono wenyi? Chili kusuku ni yetu, chili chikalu ha kuchinyingika.

²⁵ Nalihanyine ni kulilongesa yinyingi; yingubatula ngubwe ni mana ni kumbululo ku yihula yami ni kulilongesa chize chibwa ungulungulu ni uhepuke.

²⁶ Yingumona chimwe Chuma chibi chahiana kufwa, kuma pwo. Mumu zango lize anakulweze mulikukwata ngwe muheto hanji ngwe Wanda; moko jenyi maakujingilika ngwe lwoji wa utale. Mutu, nyi Zambi kakuwahilila nenyi, mahasa kuhwima, alioze mutu, nyi Zambi keshi kuwahilila nenyi, mwe pwo mamukwata.

²⁷ Mwe Longeshi yamba ngwenyi, ewa, muze nafupile kumbululo, yingulinyingika hakepe hakepe.

²⁸ Yingufupa nawa kumbululo likwo, alioze chalivwile ko nichimwe. Yinguwana hakachi ka malunga kanunu lunga umuwika yoze munguhasa kusa vumbi, alioze pwo niumwe.

²⁹ Chize nalilongesele chili chino: Zambi yatutanga akwa ululi, alioze yetu ene yitulipwisa akwa kubinda kuhiana.