Longeshi 6 - Mukanda Wa Zambi 1970

¹ Namona uhenge Wahiana hano hashi;

² Zambi kakuhana kuli mutu yuma yeswe yize akuzanga, ubite, ni ulemu, ni yikumba, hindu kechi kumutayiza kuwahilila nayo, alioze umwe chilambala mawahilila nayo. Yili yamokomoko, yili yibi.

³ Mutu mahasa kusema kulakaji lia ana ni kutwama ni mwono miaka yinji, alioze chibwe atwame miaka yinji, nyi keshi ni chiseke, nawa nyi ha kufwa chenyi atu kaamufunjile kanawa, ngunambe ngwami, mwana wa kuselumuna kawaha kuhiana mutu yoze.

⁴ Mwe mwana yoze katoka kwenyi mu milima, kwenako mamuvulamina.

⁵ Kamwene kwenyi mwalwa, chibwe kanyingikine chize ubwa mwono, alioze kali kwenyi mu uhwimino

⁶ kuhiana mutu yoze keshi kwivwa chiseke mu mwono wenyi, chibwe matwama tununu aali a miaka. Eswe aali kaakuya kuma kumuwika.

⁷ Mutu kakuhondangana milimo yenyi yeswe hanga amone yakulia, alioze keshi kubwa nayo yinalite.

⁸ Ku Chuma chika mukwa mana anahiana chiswale? Chiswale chibwe anyingike chize chatamba kutwama mu mwono wenyi chika muchimukwasa?

⁹ Chili chamokomoko; chili ngwe kuhanga fuji. Chinabeme kuyuka ni yize uli nayo, hikulibikala ko matangwa eswe ha kuliwezela yikwo.

¹⁰ Yuma yeswe yize yakuwana mutu, ayilulikile kulu. Eswe tunanyingika ngwetu, mutu kahashile kulimika ni umwe yoze unamuhiana tachi.

¹¹ Kuhamika chinji chili chamokomoko kuchishi kukwasa nichimwe.

¹² Iya manyingika chize chinabeme hali mutu ha matangwa jenyi akepe ni amokomoko hano hashi? Mwono uze wakubalika ngwe chizulie? Iya mahasa kunyingika yize muyikabwa hano hashi muze mafwa?