Longeshi 5 - Mukanda Wa Zambi 1970

Nyonga kanawa muze unalakenya Chuma

¹ Muze unayi ku zuwo lia Zambi kanyama. Chili chibema kulambula mulambu ku zuwo lia Zambi, alioze chibema kuhiana kwivwa maliji a Zambi. Yihepuke waze kaanyingikine yibi ni yibema, kaakulambula milambu wika.

² Nyonga kanawa shimbu kanda uchihanjika, kanda Ulakenya Zambi nikawashi. Iye katwama mwilu, yena watwama hano hashi, kashika kanda uhanjika maliji anji.

³ Nyi wakulibikala chinji, muukalota yilota yibi. Nyi wakuhanjika chinji, muwamba yuma ya uhepuke.

⁴ Nyi muulakenya chilakenyo kuli Zambi chimanunune nikawashi, mumu keshi kuzanga yihepuke. Linga yize hiwalakenya kulinga.

⁵ Hi chibema ko kulakenya nyi kuuchi kuhasa kuchilinga.

⁶ Kanda utayiza maliji je kukuvulumwisa. Nyi ka, Chakutamba kulweza hako ya Zambi ngwe, te chachizangile. Mumu yika muulifupila utenu wa Zambi? Mumu yika unazange Zambi onone yeswe yize wahondanganyine?

⁷ Chibwe muulota yilota yinji, chibwe muulinga milimo yinji yamokomoko, chibwe muuhanjika maliji anji, hindu Chakutamba kuvwila Zambi woma.

Mwono uli wamokomoko

⁸ Kanda ukomoka nyi muumwona akwa kuyula kaanabinjisa yiswale ni keeshi kwabatwila ni ululi. Mukwa lutwe mweswe kali ni yoze mamutala, neye kali ni mukwo yoze mamutala.

⁹ Chibwe mwanangana kakusa mbunge ku mihuko yize mahela.

¹⁰ Nyi wakuzanga ubite, kuuchi kuyuka nawo nichimwe; nyi wakuzanga kubwa pichi, hindu kuuchi kuyuka nawo. Yili yamokomoko.

¹¹ Muze ubite hiwoka, ni akwa kuulia mooka; muumona ubite shina ku meso.

¹² Mukwa kuhondangana milimo, chibwe halia yinji chibwe yikepe, kakubomba tulo abema. Alioze pichi kahashile kuya tulo, mumu kakulibikala ha yuma yenyi yinji.

¹³ Chibi chahiana namona hano hashi chili chino: atu kaakufunga ubite mumu ha tangwa lize maakabwa ni chikala.

¹⁴ Mabwamuze maautokesa weswe ha shimbu likepe, mba maafulwa Chuma chize maahichikila ana jo.

¹⁵ Mutukatuka hano hashi ngwe chize twejile ho, mokomoko. Mba ha yeswe yize twahondanganyine kutuchi kuchiza ho nichimwe.

¹⁶ Hi chibema ko! Twakuya ngwe chize twejile. Twakuhondangana, alioze chika kevwe mutuyuka ha kuhanga fuji?

¹⁷ Mu mwono wetu twakutwama mu milima, twakumona lamba, twakwivwa chinyengo ni ufwatulo, twakuyiza.

¹⁸ Namona ngwami, chinabeme mutu alie, ni anwe, ni awahilile ni yeswe yize ahondanganyine mu mwono wenyi uze amuhele Zambi; chino che Chihanda chenyi.

¹⁹ Nyi Zambi hahana ubite, ni yikumba, ni chiyulo kuli mutu, nyi hamutayiza kuwahilila nayo, chibema achichimieke Zambi ni kuwahilila nayo. Chili chawana cha kuli Zambi.

²⁰ Zambi hamuwahisa; kashika keshi kulibikala kuhiana hakutwala ku matangwa akepe a mwono wenyi.