Longeshi 4 - Mukanda Wa Zambi 1970

¹ Mba yingutala nawa uhenge weswe wa hano hashi. Akwa lamba te kaakulila, wakuhi yoze wakwalembejeka. Niumwe kechi kwakwasa, mumu waze akwamwesa lamba kaahiana tachi.

² Ngunamono ngwami, waze haanafu kaali kwo kanawa, kuhiana yetu tuli ni mwono.

³ Alioze kaawaha kuhiana waze kanda achisemuka kwo, mumu kanda achimona kwo uhenge wa hano hashi.

⁴ Hinasa nawa chinyingi mumu yika atu akuhondangana ni kuyuka yuma yo. Mumu ha ukwa uze akuvwila enyembo jo. Alioze yili yamokomoko, ngwe kuhanga fuji.

⁵ Atu kaakwamba ngwo: “Mutu yoze masepekenya moko jenyi ni kufwa zala, kali chihepuke.”

⁶ Kota Chenacho, alioze chibema kubwa ni yuma yikepe wika nikubwa ni uhwimino, kuhiana kuhondangana matangwa eswe ni moko aali ni kuhanga ye fuji.

⁷ Yingumona nawa Chuma chikwo chize chili chamokomoko.

⁸ Kuli umwe mutu yoze watwama ukawenyi. Keshi mwana, keshi mwanakwo, alioze kakuhondangana, hindu keshi kuwahilila ni ubite uze ali nawo. Mba iya akuhondanganyina chichize ni kulituna kuwahilila chenyi mwene? Chili nawa chamokomoko, uli kwawo mwono wa lamba.

⁹ Kulinga atu aali hamuwika chili chibema kuhiana kulinga mutu umuwika.

¹⁰ Mumu nyi umwe malimbuka, mukwo mamuhindwisa. Alioze nyi kali ukawenyi, mba malimbuka, kukushi niumwe yoze mamuhindwisa.

¹¹ Nyi aali maabonga ha muhela umuwika, kumeevwa chivukuminya, alioze nyi uli ukawe ngwe kuchi muwivwa chivukuminya?

¹² Malunga aali maahasa kukumba akwa kole jo, alioze mutu umuwika kechi kuhasa kwakumba. Muhipu wa mbanda mutatu kuushi kubatuka nikawashi.

^13-14 Chiswale mahasa kubwa mwanangana mu chifuchi chenyi, hanji kutuhuka mu zuwo lia lamba ni kutwama ha chitwamo cha wanangana. Alioze nyi mu ushinakaji wenyi keshi kutayiza kumukanyamisa, kanamuhiana kuli mukweze chiswale alioze mukwa mana.

¹⁵ Yingunyonga hali eswe waze atwama hano hashi, yingumona ngwami mukachi ko kumuli umwe mukweze yoze mahinga wanangana.

¹⁶ Mwanangana mahasa kuyula atu anji. Alioze muze hafwa, niumwe keechi kumuchichimieka ha chize hanalingi. Chili chamokomoko, chili ngwe kuhanga fuji.