Longeshi 3 - Mukanda Wa Zambi 1970

Chuma cheswe chili ni tangwa liacho

¹ Yuma yeswe yize yaakusoloka hano hashi, kuyakubwa ha tangwa lize Zambi atongwele.

² Kakutongola tangwa lia kusemuka ni tangwa lia kufwa, tangwa lia kutumba ni tangwa lia kuhela,

³ tangwa lia kushiha ni tangwa lia kuwuka, tangwa lia kubuzula ni tangwa lia kutunga.

⁴ Kakutongola tangwa lia chinyengo ni tangwa lia kuwahilila, tangwa lia kulila mbimbi ni tangwa lia kuhangana,

⁵ tangwa lia kulweza zango ni tangwa lia kulitwamina, tangwa lia kulishisa ni tangwa lia kulitwamina kulishisa.

⁶ Kakutongola tangwa lia kuyuka ni tangwa lia kufulwana, tangwa lia kufunga Chuma ni tangwa lia kuchimbila,

⁷ tangwa lia kuchanuna ni tangwa lia kunuka, tangwa lia kuhola ni tangwa lia kuhanjika.

⁸ Kakutongola tangwa lia kulizanga ni tangwa lia kulivutwokela, tangwa lia jita ni tangwa lia uhwimino.

⁹ Mba chika muufumbula ku milimo ye yeswe?

¹⁰ Ngunanyingika ulemu wa milimo yize Zambi hanatwehe kuhondangana nayo.

¹¹ Hanatongola Chuma ni chuma ni tangwa liacho. Hanatwehe zango lia kunyingika yuma yize muyiza kulutwe, alioze keshi kututayiza tunyingike pundu yuma yize akulinga.

¹² Kashika yingusa chinyingi ngwami, chatutamba kuwahilila ni kulinga yibema matangwa eswe a mwono wetu.

¹³ Yetu eswe chatutamba kulia ni kunwa ni kuwahilila ni yeswe yize hitwalinga. Yili yawana ya Zambi.

¹⁴ Ngunanyingika ngwami, yeswe yize akulinga Zambi kuyakulinduluka ndoo ku miaka yeswe. Kuwahashile kuweza ko nichimwe, hanji kuchiza ko nichimwe. Muuhasa lume kulemesa Zambi mumu ha yikomokeso yenyi, uno we upale wenyi.

¹⁵ Chize chabwile hanji chize muchikabwa chabwile kulu. Mumu Zambi kakulinga Chuma chizechene nawa ni nawa.

Hashi kuheshi ululi

¹⁶ Chikwo, hingunamono nawa hano hashi kuze chatamba kubwa ululi ni umwenemwene kwe kuli ungulungulu.

¹⁷ Yingulihanjikisa ngwami; “Zambi kumakabatwila eswe aali, akwa ululi ni yingulungulu, mumu Chuma cheswe, ni yitanga yeswe, muyikabwa ni tangwa liayo.”

¹⁸ Yingunyingika ngwami, kuma Zambi kakutweseka, hanga tunyingike ngwetu, yetu hi tuli ko abema kuhiana tushitu.

¹⁹ Mumu songo lia mutu lili ngwe songo lia kashitu. Cheswe akufwa kashitu, ni mutu nawa chizechene. Eswe aali kaali chitanga chimuwika. Mutu kahianyine kashitu, mumu mwono wa eswe aali uli wamokomoko.

²⁰ Mumu eswe aali kaakuya muma mumuwika, mu fufuta. Eswe aali mu fufuta akatukile; kashika eswe aali nawa maakahiluka mo.

²¹ Ngwe kuchi umwe mahasa kunyingika pundu ngwenyi, mwiku wa mutu wakuya mwilu alioze wa kashitu wakuya hashi?

²² Mba yingumona ngwami, chakuhi Chuma chibema hali mutu, shina kuwahilila ni yize hanalingi. Kukushi Chuma chikwo chize mutuhasa kulinga. Kutushi kunyingika yize muyikabwa kulutwe lietu muze hitwafwa.