Longeshi 2 - Mukanda Wa Zambi 1970

¹ Hingunabatula kuwahilila nikweseka kunyingika chize chibwa che kuwahilila. Alioze yingumona ngwami, neyo nawa yili yamokomoko.

² Yingumona ngwami, kulisehelela chili uhepuke, ni uwahililo kuushi kukwasa nichimwe.

³ Yingulihana yami mwene kubwa ni mana, hingunabatula kuliwahisa ni vinyu ni kusehejela. Yingunyonga ngwami, Chenacho mutu mahasa kutwama kanawa hano hashi.

⁴ Yingumanununa yuma yinene. Yingulitungila mazuwo, yingulilimina minda ya vinyu,

⁵ ni ya yitemo, yingutumba mo mitondo ya mihuko yeka ni yeka.

⁶ Yingufula yitende ya meya ya kuyihinjila.

⁷ Nalanjile ndungo; anji nawa asemukinyine mu zuwo liami. Yingubwa ni yimuna yinji yinene ni yikepe, kuhiana eswe waze anguliangilile mu Yerusaleme.

⁸ Nabichile nawa prata ni oru yinji ya ku mishete ya yifuchi yeswe yize te nakuyula. Malunga ni mapwo te kaakwimba ni kunguwahisa, nabwile ni mapwo eswe waze lunga mazanga.

⁹ Ewa nabwile munene, munene kuhiana eswe waze anguliangile mu Yerusaleme, ni mana jami kaatepulukile ko.

¹⁰ Cheswacho nazangile, yinguchiyuka. Chahonene ko chiseke nichimwe mu mwono wami. Nalengumukine ni yuma yeswe yize nalingile, yize yeswe yabwile kukundulula chami.

¹¹ Mba yingunyonga hakutwala ku yeswe nalingile ni lamba lize namwene ha kuyihondangana, hindu yingumona ngwami, kuyalumbunwine Chuma nichimwe. Nabwile ngwe ngunahange fuji, yuma yamokomoko lume.

¹² Mumu mwanangana mahasa kulinga shina yuma yize alingile mianangana waze amuliangile. Kashika nabutwile kunyonga hakutwala ku ulumbunwiso wa maliji wano: mana, ni uyambanganyi, ni uhepuke.

¹³ Mba yingunyingika ngwami, “Mana kaanahiana uhepuke, ngwe chize pangu linahiana milima.

¹⁴ Akwa mana kaakumona kuze anayi, alioze yihepuke keeshi kumona kuze anayi.” Alioze yingunyingika ngwami yetu eswe songo lietu lili limuwika.

¹⁵ Yingulihanjikisa ngwami: “Ni yami mungumona lamba ngwe yihepuke, mba chika mungufumbula nyi nabwa mukwa mana?” Yingulikumbulula ngwami: “Nichimwe!”

¹⁶ Niumwe wakwiwuluka akwa mana, nawa niumwe wakwiwuluka yihepuke. Ha miaka ya kulutwe, atu meeza kutuvulama eswe. Yetu eswe mutukafwa, ni akwa mana ni yihepuke.

¹⁷ Kashika kuli yami mwono kuushi nichimwe, mumu yuma yeswe kuli yami yili lamba. Yeswe yili yamokomoko; yili ngwe kuhanga fuji.

¹⁸ Ku yeswe yize nahondanganyine chafumbwile ko nichimwe, mumu ngunanyingika ngwami, mungukayihichika kuli yoze makangusalakana.

¹⁹ Neye mahasa kubwa mukwa mana, hanji chihepuke, iya Unanyingika? Hindu yuma yeswe yize nalingile muyikabwa niyenyi, yuma yeswe yize nalingile ni mana jami hano hashi. Yeswe yili yamokomoko.

²⁰ Kashika ngunalinyenge ngwami, mumu yika nahondanganyine chichize?

²¹ Muulinga yuma yino yeswe ni mana, ni malinjekela, ni utotombo, mba yeswe muuyihichika kuli umwe yoze kayilingile. Chili chamokomoko, hi chibema ko!

²² Muuhondangana ni kulibikala, alioze mba chika muwanda ho?

²³ Ha matangwa eswe a mwono we, ku yuma yeswe yize muulinga, kuuchi kwanda ho nichimwe alioze yili yinyengo ni kusasaminya cha mu mbunge. Chibwe ha ufuku manyonga je keechi kuhasa kama kuhwima. Yeswe yili yamokomoko.

²⁴ Chinabeme mutu kulia ni kunwa, ni kuwahilila ni chize hafumbula. Hindu yingumona ngwami, uwahililo kuwakukatuka kuli Zambi hi ku kulia ni kunwa ko.

²⁵ Mumu iya mahasa kulia hanji kuwahilila, shina ku upale wa Zambi.

²⁶ Zambi kakuhana mana, ni yinyingi, ni uwahililo kuli waze akulinga upale wenyi, alioze kakuhana milimo kuli yivulumunyi afumbule ni afunge yuma yo ayihane kuli waze akulinga upale wa Zambi. Yeswe yili yamokomoko; yili ngwe kuhanga fuji.