Longeshi 12 - Mukanda Wa Zambi 1970

¹ Kashika iwuluka Tangi ye muze uchili mukweze, mumu kulutwe matangwa a lamba ni miaka muyikeza muze muukamba ngwe: “Chisolo kuwahilila.”

² Muze pangu lia tangwa, ni kakweji, ni matongonoshi kuyichi kakutemukina kanawa, ni malelwa a vula keechi katanduluka.

³ Mba moko je waze te akukufunga, maakachikima, ni molu je waze ali ni tachi haliabwila, maakalekumuka. Mazo je maakasokoka, maakasala akepe, kuuchi kalia kanawa. Meso je nawa maakabwa a chitalawili, keechi kamona zwalala.

⁴ Matwi je keechi kevwa zungo lia mu chihunda. Kuuchi kevwa kanawa zungo lia kutwa hanji lia yisaji, alioze chibwe kuhanjika cha tujila muchikakuhindwisa ku tulo.

⁵ Muukevwa woma wa kunyina hamwe homa, muukenda ni lamba, kambu je mujikalumuka jitoma, kwenda muchikakukalila, ni zango lia yuma yeswe mulikakuhwa. Yetu mutukaya kwetu kuma lietu kwa kuhwima matangwa eswe, mba mu majila munukevwa mbimbi.

⁶ Ngoji ja prata mujikabatuka, ndeya ja oru mujikaholoka ni kufwa, lwoji wa ku shima lia meya kumakabatuka, ni mulondo wa meya kumuukafwa.

⁷ Mijimba yetu ya fufuta muyikahiluka ku mavu, ni mwiku wa mwono muukahiluka kuli Zambi, yoze watuhele wo.

⁸ Mwe Longeshi ngwenyi, yamokomoko, yamokomoko, yeswe yili yamokomoko.

Yilemu kuli mutu mweswe

⁹ Longeshi te mukwa mana, kashika yanyongonona ni kulongesa atu yize te ananyingika. Yalilongesa yishima, yayeseka ni kutala nyi kuyili yamwenemwene.

¹⁰ Mwe Longeshi yeseka kulembejeka atu, hindu maliji yaabwa amwenemwene.

¹¹ Maliji ja akwa mana kaali ngwe mitondo ya kusongolola yize tufunga akubingulula nayo mapanga. Yishima yakulinduluka ngwe mbambo ja kuhata. Yeswe Zambi wayihanyine, mwe Kafunga ka yetu eswe.

¹² Mwanami limuka, Chuma chikwo chili ko; kusoneka mikanda kuchishi kusula, kulilongesa chinji kuchakuzeyesa mujimba.

¹³ Ku songo lia yino yeswe, kuli lume Chuma chimuwika chakwamba ngwami: Lemesa Zambi, funga Shimbi yenyi; mumu ha chikuma chino Zambi atangilile mutu.

¹⁴ Zambi kumatubatwila mumu ha yuma yeswe yize twakulinga, chibwe yibema hanji yibi, chibwe yize twakulinga ku tenga.