Longeshi 11 - Mukanda Wa Zambi 1970

Yize akulinga mukwa mana

¹ Tuma mbuto ye mu wato ha kalunga lwiji, mba kulutwe muukafumbula.

² Tulikila mbongo je kuli akwa milimo eka ni eka, mumu kuwanyingikine chibi chize muchikabwa kulutwe hano hashi.

³ Mutondo kweswako unalimbukila kwenako muubombela hashi. Vula kuyakunoka hashi muze malelwa maalemenena.

⁴ Nyi washimbwila ndoo fuji yize, ni kwilu kuche kabema, kuuchi kukuwa mbuto niyimwe, kuuchi kahela mihuko niyimwe.

⁵ Zambi hanatange yuma yeswe, alioze yena kuwahashile kunyingika yize akulinga, ngwe chize kuwanyingikine kabutu ka mwono wa mwana muze achili mu jimo lia naye.

⁶ Kuwa mbuto ye ha chichamene ni ha chingoloshi nawa. Mumu kuwanyingikine nyi yeswe yaali muyitatuka, hanji yimwe muyitatuka kuhiana yikwo.

⁷ Chibema kuwahilila muze tangwa hihasoloka.

⁸ Wahilila ha miaka yeswe yize uli ni mwono. Kuheshi Chuma chibwe muubwa ni mwono miaka yinji, iwuluka ngwe, muze hiwafwa ufuku wa kulutwe muubwa wa miaka yinji kuhiana. Yeswe yize yili kulutwe yili yamokomoko.

Longeso kuli akweze

⁹ Yena mukweze Wahilila, Wahilila muze uchili mukweze. Linga yeswe yize unazange kulinga, yeswe yize unamono ngwe yinabeme ku meso. Alioze iwuluka ngwe, Zambi makakubatwila ha yeswe yize wakulinga.

¹⁰ Echa kulibikala, liwuke yikola ku mujimba we. Ukweze we ni kambu je jilaa muyikatoka nikawashi.