Longeshi 10 - Mukanda Wa Zambi 1970

¹ Jiji waze haanafu kaakubihisa saji yeswe ya maji a vumba libema, chimuwika nawa uhepuke ukepe wakubihisa mana anji.

² Mukwa mana kakunyonga kulinga yuma yibema, alioze chihepuke kakunyonga kulinga yuma yibi.

³ Uhepuke wenyi wakusoloka chibwe kuli ngeji waze maatakana nenyi mu jila; kuwakusoloka kuli mutu mweswe.

⁴ Nyi mukwa kuyula kanakutenukina, kanda wecha milimo ye. Mumu mahasa kukukonekena yitela ye yinji, nyi wakulihumikiza.

⁵ Hinamona umwe uhenge hano hashi, uhenge uze wakatukile kuli akwa kuyula.

⁶ Yihepuke maaha mihela yilemu, alioze pichi maalisala ho.

⁷ Hinamona ndungo meendela ha tuvwalu, alioze atu alemu meendela hashi.

⁸ Nyi wafula wumbu, yena mwene muulimbukila mo; nyi wabuzula chipanga, kapela makusuma.

⁹ Nyi wakututa mawe, muulemana ku mawe. Nyi wakuchaya kunyi muulemana ha kujichaya.

¹⁰ Nyi njimbu ye yinavuku kuwazangile kuyihela, Chakutamba kusa tachi muze unabatula nayo, alioze chibema kunyonga hatangu.

¹¹ Kunyingika chize muuhombola kapela, kuchahashile kukukwasa nichimwe, nyi hakusuma kulu.

¹² Atu maalemesa mukwa mana mumu ha yize anahanjika, alioze chihepuke kakulionona ha maliji jenyi mwene.

¹³ Kakubutuka kuhanjika ni uhepuke, ni kakumanununa ni uzaluke.

¹⁴ Chihepuke kakuhanjika maliji anji. Niumwe Unanyingika yize muyiza kulutwe, niumwe mahasa kutulweza yize muyikeza muze hitwafwa.

¹⁵ Chihepuke kakuhondangana milimo yinji mumu keshi kunyingika jila ya kuya ku chihunda chenyi.

¹⁶ Chifuchi chakubwa ni kabinda nyi ngwe mwanangana wacho kali mukweze, hanji akwa lutwe jacho kaakuchisa ufuku weswe ni kulia.

¹⁷ Alioze chifuchi chakuwaha nyi ngwe mwanangana wacho walinga ni ubatwilo wenyi mwene, ni akwa lutwe jenyi maalia yakulia ha ola yibema, ni maalifunga kanawa, keeshi kuzengewa.

¹⁸ Nyi mutu kali mukwa ngwaza ha kululika zuwo lienyi, lie zuwo mulibuzuka.

¹⁹ Yakulia yakukwaha chiseke, ni vinyu yakukuwahisa, alioze kuwahashile kubwa nayo nyi kuushi mbongo.

²⁰ Kanda ulelesa mwanangana, chibwe ni maliji a kulinyinyita; kanda usaula pichi, chibwe mu chibatulo cha kubomba. Kajila mahasa kumbata lie liji ni kwalweza yize te unahanjika.