Longeshi 1 - Mukanda Wa Zambi 1970

Mwono uli Chuma chamokomoko

¹ Wano kaali maliji a longeshi, mwana wa David, yoze wabwile mwanangana mu limbo lia Yerusaleme.

² Longeshi ngwenyi: Mwono uli wamokomoko, wamokomoko. Uli wamokomoko, yeswe yili yamokomoko.

³ Mu mwono we muulinga milimo, muuhondangana kuhiana, alioze yuma yika wakwanda ho?

⁴ Yisemuko yakwiza ni kuyakuya, alioze hashi kuhakusala chizechene.

⁵ Tangwa kuliakuvumbuka, ni kuliakunjila, mba milituhuka ni kuvumbukila nawa kuzekwene.

⁶ Fuji yakuhehukila ku sude, ni ku norde, yakujingajinga ni kuhiluka nawa.

⁷ Njiji jeswe kujakunjila mu kalunga lwiji, alioze kalunga lwiji keshi kuzala. E meya kaakuhiluka ku misulo ya njiji, ni kupalumuka nawa.

⁸ Yuma yeswe yikatalo yikwete, yikatalo kuhiana ha kuyilumbununa. Meso cheswe anatale keeshi kukuta, chibwe matwi jetu kaahashile kukuta.

⁹ Yuma yize yabwile, muyikabwa nawa. Yize alingile, kumaakayilinga nawa. Hashi heswe kuheshi Chuma chaha nichimwe.

¹⁰ Atu maahasa kwamba ngwo: “Tala Chuma chaha!” Alioze ka, chabwile kulu, chabwile kulu muze te kanda uchisemuka.

¹¹ Atu keeshi kwiwuluka yuma yikulu, ni yuma yize muyizaho keechi kuyiwuluka kuli waze meza kwiza.

Yuma yize amwene Longeshi

¹² Yami, longeshi, te nakuyula Aisraele ku limbo lia Yerusaleme.

¹³ Yingubatula ngwami, munguhengula ni kulilongesa yuma yeswe yize atu akulinga hano hashi. Yetu akwa hashi Zambi kakutumwesa lamba linji.

¹⁴ Hingunamono yuma yeswe yize atu akulinga hano hashi, ngunakulweze ngwami, yeswe yili yamokomoko. Yili ngwe unahange fuji.

¹⁵ Kuwahashile kwolola Chuma chize chahenga, hanji kwalula yuma yize kuyishiko.

¹⁶ Yingulihanjikisa ngwami: “Hinabwa mukwa lufuma, mukwa mana kuhiana waze aliangile kuyula mu Yerusaleme. Ngunanyingika chize chibwa mana ni malinjekela.”

¹⁷ Hingunabatula kulilongesa chize chibwa chinyingi ni uhepuke, mana ni uzaluke. Alioze yingumona ngwe fuji ngunahange.

¹⁸ Yoze uli ni mana anji kakulibikala kuhiana; ni yoze Unanyingika yuma yinji; kakwivwa chinyengo kuhiana.