Kwalula 9 - Mukanda Wa Zambi 1970

Chiwanyino cha muchaali cha Kubalika

¹ Ha kakweji mutangu wa mwaka wa muchaali muze Aisraele atuhukile mu chifuchi cha Egiptu, Mwene Zambi yambila Mose mu puya ya Sinai, ngwenyi:

^2-3 “Ha tangwa kumi ni lia muchiwana lia kakweji yono, muze tangwa hilianjila, Aisraele chaatamba kubutula kulinga chiwanyino cha Kubalika nikulita ni Shimbi jacho jeswe.”

⁴ Mose yaalweza.

⁵ Mba ha chingoloshi cha tangwa kumi ni lia muchiwana lia kakweji mutangu Aisraele yaachilinga mu puya ya Sinai. Yaalinga yuma yeswe nikulita ni chize Mwene Zambi alwezele Mose.

⁶ Alioze yikubwa amwe malunga waze alichishile ha kukwata ku mujimba wa mufu. Kashika kaahashile ko kulinga chiwanyino ha tangwa lize. Yaaya kuli Mose ni Arone, yaalweza

⁷ ngwo: “Hitwalichisa mumu hitwakwata ku mujimba wa mufu, alioze mumu yika kutwahashile kulambula mulambu hamwe ni Aisraele akwo?”

⁸ Mose yaakumbulula ngwenyi: “Shimbwilenu ndoo mungutambula kumbululo kuli Mwene Zambi.”

⁹ Mwene Zambi yambila Mose

¹⁰ ha kulweza Aisraele ngwenyi: “Nyi umwe wa kuli yenu hanji akwa vungu lienu halichisa ha kukwata ku mujimba wa mufu hanji habwa kusuku mu wenyi, alioze nyi mazanga kulinga chiwanyino cha Kubalika,

¹¹ mahasa kuchilinga ha kakweji wa muchaali ha tangwa kumi ni lia muchiwana, ha chingoloshi. Akachilinga ni kulia yifwo ya panga hamwe ni mbolo yize kuyishi yitumbo ni yilimalima yisasu.

¹² Kanda akahichika yakulia niyimwe ndoo chichamene kanda akabolota yifwaha ya panga. Lingenu chiwanyino cha Kubalika nikulita ni Shimbi jeswe.

¹³ Alioze mweswawo kalichishile hanji kayile ko mu wenyi usuku, nyi kalingile ko chiwanyino cha Kubalika, kechi kamwalula nawa mukachi ka atu jami, mumu kangulambwile mulambu wenyi ha tangwa lia chilakenyo. Chamutamba kumona lamba mumu ha shili yenyi.

¹⁴ “Nyi umwe chilambala yoze watwama mukachi kenu mazanga kulinga chiwanyino cha Kubalika, chamutamba kuchilinga nikulita ni Shimbi jeswe. Shimbi jili jimuwika kuli mutu mweswe, chibwe mwenya chifuchi hanji chilambala.”

Lelwa lia kahia

^15-16 Ha tangwa lize amikine zuwo lia Zambi lia makubu, lelwa yiliza, yilifuka zuwo. Ha ufuku lelwa yilisoloka ngwe kahia.

¹⁷ Muze te lelwa liakuzunduka, Aisraele no maakatuka ha musumba, ni muze te lie lelwa liakuhulumuka, Aisraele no majika nawa mazuwo jo ha musumba.

¹⁸ Atu te kaakukatuka ha musumba nikuujika nawa nikulita ni liji lia Mwene Zambi. Shimbu heswe lize te lelwa liakumana ha zuwo lia Zambi, no te kakutwama ha musumba uzewene.

¹⁹ Muze lelwa te liakushimbula shimbu lisuku ha zuwo, Aisraele te kaakwononokena Mwene Zambi, kukatuka ho ka.

²⁰ Yisuho yikwo lelwa te liakumana ha zuwo lia Zambi matangwa akepe wika, te kaakutwama ha musumba hanji kukatuka ho nikulita ni liji lia Mwene Zambi.

²¹ Yisuho yikwo lelwa mulimana ha zuwo chize ku chingoloshi ndoo chichamene, mba muze mulizunduka, no maakatuka ha shimbu lizeliene. Muze lelwa linazunduka ho, no maakatuka.

²² Heswaho te lelwa liakumana hanji matangwa aali, hanji kakweji umuwika, hanji mwaka umuwika, hanji mwaka ni Chipinji, ha shimbu lize te lelwa liakumana ha zuwo lia Zambi, te keeshi kukatuka ho. Alioze muze te liakuzunduka, no maakatuka.

²³ Aisraele yaajikajika mazuwo ha musumba, yaazulazula nikwononoka nikulita ni maliji waze Mwene Zambi ambilile Mose.