Kwalula 8 - Mukanda Wa Zambi 1970

Kunangika cha ndeya

¹ Mwene Zambi yambila Mose ngwenyi:

² “Lweza Arone ngwe, muze masa ndeya shimbiali ha chikwachilo chayo, ajise hanga jikatemuke kulutwe.”

³ Arone yononoka, yasa ndeya ha kutemuna kulutwe.

⁴ Chikwachilo yachifula ni oru yakutatula, chize ku nganda ndoo ni ku yitemo yacho, nikulita ni liji lize Mwene Zambi alwezele Mose.

Kubemesa Alevi ni kwakunjika ku milimo yo

⁵ Mwene Zambi yambila Mose ngwenyi:

⁶ “Handununa Alevi kuli Aisraele ni kwabemesa

⁷ ngwe chino: waasapwila meya a kubemesa, waalweza atewule mijimba yo yeswe, akose mahina jo, mba maabwa abema.

⁸ Anehe chimbembe wa kuji ni mulambu wa mbuto ya wunga wakuchinga ni maji a olive. Yena neha kuji mukwo wa ngombe mumu ha mulambu wa milonga.

⁹ Mba hikungulula Chikungulwila cheswe cha Aisraele, Alevi amane ku chikolo cha zuwo lia Zambi lia makubu.

¹⁰ Aisraele ase moko jo ha mitwe ya Alevi,

¹¹ mba Arone a kunjika Alevi kuli yami ngwe mulambu wa kuhungisa wa Aisraele, hanga ahase kulinga milimo yami.

¹² Alevi ase moko jo ha mitwe ya makuji a ngombe aali. Umuwika abwe mulambu wa milonga, mukwo mulambu wa kwocha, ha kubemesa Alevi.

¹³ “Arone ni ana jenyi a malunga e maabwa nikwayula. Kunjika Alevi ngwe mulambu wa kuhungisa kuli yami Mwene Zambi.

¹⁴ Chenacho muuhandununa Alevi kuli Aisraele akwo, hanga abwe niami.

¹⁵ Muze hiwabemesa ni hiwakumba Alevi, mba maatela kulinga milimo ya mu zuwo lia Zambi.

¹⁶ Hingunaatayiza kusalakana ana malunga ja Aisraele atangu kusemuka, kaali niami.

¹⁷ Muze nashihile atangu eswe kusemuka a mu chifuchi cha Egiptu, ana malunga ja Aisraele atangu kusemuka ku majiko jo eswe ni ku yimuna yo yeswe yingupwisa niami.

¹⁸ Hingunatayiza Alevi kusalakana ana malunga eswe atangu kusemuka ja Aisraele;

¹⁹ ni kwahana kuli Arone ni ana jenyi a malunga, chawana chize Aisraele haahana ha kulinga milimo mu zuwo liami, ni ha kufunga Aisraele ku lamba lize Zambi maamwesa nyi maakundama muma mwa chijila.”

²⁰ Chenacho Mose ni Arone, ni Aisraele eswe, akunjikile Alevi ngwe chize Mwene Zambi aalwezele.

²¹ Alevi yaalibemesa, yaakosa mahina jo. Arone yaakunjika ngwe mulambu wa kuhungisa kuli Mwene Zambi, yamanununa nawa Shimbi ya kwabemesa.

²² Atu yaalinga yuma yeswe ngwe chize Mwene Zambi ambilile Mose hakutwala kuli Alevi. Chenacho Alevi atelele kulinga milimo mu zuwo lia Zambi mu chiyulo cha Arone ni ana jenyi a malunga.

²³ Mwene Zambi yambila Mose ngwenyi:

²⁴ “Kalevi mweswe wa lunga nyi habwa ni miaka makumi aali ni yitano akalinga milimo mu zuwo lia Zambi.

²⁵ Muze habwa ni miaka makumi atano mba makatuka.

²⁶ Mabwamuze mahasa kukwasa usoko wo Alevi ha kulinga milimo ya mu zuwo lia Zambi, alioze kanda akayilinga ukawenyi. Chenacho mukasongwela Alevi kulinga milimo yo.”