Kwalula 7 - Mukanda Wa Zambi 1970

Miata yalambula milambu

¹ Ha tangwa lize Mose amanunwine kumika zuwo lia Zambi lia makubu, yaliwahisa ni kulikunjika kuli Mwene Zambi hamwe ni yuma yalio yeswe, ni chilumbilo ni ye yuma yacho yeswe.

² Mba miata ja majimo, akwa lutwe ja mavungu ja Israele, waze te akwalula atu,

³ yaatwala milambu yo kuli Mwene Zambi, matemba asambano ni ngombe kumi ni aali, miata aali temba limuwika limuwika, mwata mweswe ngombe umuwika umuwika. Muze haayihetesa ku zuwo lia Zambi,

⁴ Mwene Zambi yambila Mose ngwenyi:

⁵ “Tambula milambu yino. Yili yawana yakulinga nayo milimo mu zuwo lia Zambi. Yihane kuli Alevi nikulita ni milimo yize maalinga.”

⁶ Mba Mose yahana matemba ni e ngombe kuli Alevi.

⁷ Yahana matemba aali ni ngombe awana kuli akwa Gershone,

⁸ ni matemba awana ni ngombe nake kuli akwa Merari. Mwata wa milimo yo yeswe te Itamare, mwana wa Arone.

⁹ Alioze akwa Kohate, Mose kaahele ko matemba chibwe ngombe, mumu yuma yize ayo akumbata chatamba kuyimbata ha yipaya.

¹⁰ Miata yaaneha nawa milambu ya kukunjika nayo chilumbilo kuli Mwene Zambi. Muze te haalulika kukunjika yawana yo ha chilumbilo,

¹¹ Mwene Zambi yambila Mose ngwenyi: “Alweze ngwe, ha matangwa kumi ni aali, tangwa ha tangwa mwata umuwika makunjika mulambu wenyi.”

^12-83 Yaalambula milambu yo ngwe chino: Tangwa Vungu Mwata 1 Yuda Nasone mwana wa Aminadabe 2 Isakare Netanele mwana wa Zuare 3 Zabulone Eliabe mwana wa Helone 4 Rubene Elizure mwana wa Shedure 5 Simeone Shelumiele mwana wa Zurishadai 6 Gade Eliasafe mwana wa Duele 7 Efraime Elishama mwana wa Amihude 8 Manase Gamaliele mwana wa Pedazure 9 Benjamine Abidane mwana wa Gideoni 10 Dane Ahizere mwana wa Amishadai 11 Ashere Pagiele mwana wa Okrane 12 Naftali Ahira mwana wa Enane Milambu yize anehene yabwile ya mulali umuwika: musenge umuwika wa prata wa kilo 1.5, ni mbashila yimuwika ya grame 800, nikulita ni ulemu wa mbongo ja miaka yize, yaayizalisa ni wunga wakuchinga ni maji mumu ha mulambu wa mbuto. Yaaneha nawa chenga chimuwika chimuwika cha oru cha grame 110, chinazala ni yuma ya vumba libema, ni chimbembe wa kuji, ni kuji a panga, ni mwana pembe wa mwaka umuwika, mumu ha mulambu wa kwocha; ni pembe umuwika mumu ha mulambu wa mulonga; ni yimbembe a kuji aali, ni makuji a panga atano, ni pembe atano, ni ana a mapanga atano a mwaka umuwika, mumu ha mulambu wa kulivwa ni Zambi.

Tangwa Vungu Mwata

^84-88 Kwoka cha milambu yize miata waze kumi ni aali anehene ha kukunjika chilumbilo kuli Mwene Zambi yabwile ngwe chino: — misenge ya prata kumi ni yaali ni mbashila ya prata kumi ni yaali, kulema chayo kilo 27.6 — yenga ya oru kumi ni yaali, kulema chayo kilo 1.32, yinazala ni yuma ya vumba libema — yimbembe a kuji kumi ni aali, ni makuji a panga kumi ni aali, ni ana a mapanga a mwaka umuwika kumi ni aali, hamwe ni mbuto mumu ha milambu ya kwocha — pembe kumi ni aali mumu ha milambu ya milonga — kuji a ngombe makumi aali ni awana, ni makuji a panga makumi asambano, ni pembe makumi asambano, ni ana a mapanga a mwaka umuwika makumi asambano, mumu ha milambu ya kulivwa ni Zambi

⁸⁹ Muze Mose anjilile mu zuwo lia Zambi lia makubu ni kuhanjika ni Mwene Zambi, yevwa Mwene Zambi kanamuhanjikishila ha chifuko cha mushete wa Usendo, homa ha kukukila milonga, mukachi ka mapulwa aali ja akwa mwono a mwilu.