Kwalula 6 - Mukanda Wa Zambi 1970

Shimbi hakutwala kuli Anazireu

¹ Mwene Zambi yambila Mose

² ha kwaha Aisraele Shimbi jino. Nyi umwe lunga hanji pwo halakenya ha kubwa Kanazireu nikulikunjika kuli Mwene Zambi,

³ akajila kunwa vinyu ni yuma yisasu. Kanda alia ni kanda anwa mihuko ya vinyu niyimwe.

⁴ Ha matangwa eswe muze achili Kanazireu kanda akalia Chuma nichimwe cha ku vinyu, chibwe mbuto, hanji yizuwu.

⁵ Ha matangwa eswe a chilakenyo chenyi, kanda akatewula kambu jenyi hanji kawewe. Akafunga chilakenyo chenyi ni kambu jenyi.

^6-7 Kambu jenyi jili chinyingi cha kulikunjika chenyi kuli Mwene Zambi. Kashika kanda akalichisa ha kukundama ku mujimba wa mufu, chibwe tato, hanji naye, chibwe mwanakwo, hanji ndumbwenyi.

⁸ Ha matangwa eswe muze achili Kanazireu kali wa chijila kuli Mwene Zambi.

⁹ Nyi susumuku mutu hafwila hakamwihi ni iye, mba hajilula kambu jenyi, chamutamba kushimbwila matangwa shimbiali ni kutewula kambu jenyi ni wevu wenyi.

¹⁰ Ha tangwa lia muchinake akatwala tutele aali hanji ana a membe aali kuli hako ku chikolo cha zuwo lia Zambi lia makubu.

¹¹ Hako akalambula tujila waze, umuwika ha mulambu wa milonga ni mukwo ha mulambu wa kwocha, ha kumubemesa, mumu hakundama ku mujimba wa mufu. Ha tangwa lioliene mutu yoze akakunjika nawa kambu jenyi,

¹² ni kulikunjika iye mwene kuli Mwene Zambi ngwe Kanazireu. Akatwala kuji a panga wa mwaka umuwika hanga akabwe mulambu wa kuhilwisa. Alioze matangwa a kunyima maakatoka mumu halijilula.

¹³ Nyi ngwe matangwa jenyi haahwa Kanazireu akaya ku chikolo cha zuwo lia Zambi,

¹⁴ akatwala ku meso ja Mwene Zambi yimuna yitatu yize kuyishi kapalia, kuji a panga wa mwaka umuwika ha mulambu wa kwocha, ni chihwo wa panga wa mwaka umuwika ha mulambu wa milonga, ni kuji a panga ha mulambu wa kulivwa ni Zambi.

¹⁵ Akalambula nawa kapaya wa mbolo yize kuyishi yitumbo: yikwo yinene yakulinga wunga wa kuchinga ni maji a olive, yikwo yikepe yakukwita maji a olive Akalambula nawa mulambu wa mbuto ni wa vinyu.

¹⁶ Hako akakunjika yino yeswe kuli Mwene Zambi ni kulambula mulambu wa milonga ni mulambu wa kwocha

¹⁷ Akalambula kuji a panga kuli Mwene Zambi. Kuuli mulambu wa kulivwa ni Zambi. Akaulambula hamwe ni kapaya wa mbolo, akalambula nawa mulambu wa mbuto ni wa vinyu.

¹⁸ Kanazireu akatewila kambu jenyi ku chikolo cha zuwo lia Zambi ni kujocha ha kahia haze akulambwila mulambu wa kulivwa ni Zambi.

¹⁹ Muze hateleka chilama cha kuji a panga, hako akachanda nikuchisa ha kwoko lia Kanazireu, hamwe ni yimwe mbolo yinene ni yikepe ya mu kapaya.

²⁰ Ha kusula mwe hako akayihungisa ku meso ja Mwene Zambi. Kuuli mulambu wa kuhungisa wa mbala wa hako. Nikulita ni Shimbi, bambo ni kulu lia panga yili nawa ya mbala ya hako. Mabwamuze Kanazireu mahasa kunwa vinyu.

²¹ Jino je Shimbi ja Kanazireu. Alioze nyi malakenya kulambula nawa mulambu ukwo, chamutamba kumanununa chilakenyo chenyi.

Kuwahisa cha hako

²² Mwene Zambi yambila Mose

²³ ha kulweza Arone ni ana jenyi a malunga ha kuwahisa Aisraele ni maliji wano:

²⁴ Mwene Zambi akuwahise, akufunge.

²⁵ Mwene Zambi akuzange, akulweze utu.

²⁶ Mwene Zambi akutale, akuhwimise mbunge.

²⁷ Mwene Zambi yamba ngwenyi: “Nyi maavulwoka jina liami ha kuwahisa atu jami Aisraele, kachi mungwaawahisa.”