Kwalula 5 - Mukanda Wa Zambi 1970

Akwa luchisa

¹ Mwene Zambi yambila Mose ngwenyi:

² “Lweza Aisraele akachize mu musumba mweswawo uli ni musongo ukalu wa ha chikowa, hanji wakuhita, chibwe yoze halichisa ni mufu.

³ Chipwe lunga hanji pwo nukamuhuma, akabwe haze lia musumba, kuchina makachisa musumba muze natwama yami hamwe ni atu jami.”

⁴ Mba Aisraele yoononoka, yaatuhwisa waze eswe mu musumba.

Kuhilwisa ni kuwezela

⁵ Mwene Zambi yahana Shimbi jino kuli Mose

⁶ hakutwala kuli Aisraele. Nyi ngwe umwe mutu havulumuna Mwene Zambi ha kulinga mukwo chibi,

⁷ chamutamba kushikisa mulonga wenyi ni kufweta yeswe. Maweza ho nawa Chihanda cha muchitano.

⁸ Alioze nyi mutu yoze unakavulumuna hafwa kwenyi, nyi keshi usoko, yoze unakamuvulumuna akahana ubite uze kuli Mwene Zambi, ukabwe wa mbala wa hako. Fweto yino yili ya kuweza ha mulambu wa kuji a panga yoze te chatamba kulambula ha kumukonekena mulonga wenyi.

⁹ Milambu yeswe yize Aisraele maakalambula kuli Zambi ku kuzanga cho ene, muyikabwa ya mbala ya hako.

¹⁰ Hako mweswe akatambula yuma yize hamukunjika.

Shimbi hakutwala ku ukwa

¹¹ Mwene Zambi yambila Mose

^12-14 ha kwaha Aisraele Shimbi jino. Tangwa likwo nyi mutu hanyongena pwo lienyi ngwenyi, halimona ni lunga weka, nyi mwe lunga lienyi kanayambashana; hanji pwo kanakalinga yibi, hachisweka, niumwe kachimwene; hanji pwo kalingile kwenyi yibi, alioze lunga kanevu ukwa;

¹⁵ ha chino lunga atwale pwo lienyi kuli hako hamwe ni mulambu wa wunga kilo yimuwika. Alioze kanda azujila ho maji a olive hanji yuma ya vumba libema, mumu kuuli mulambu wa ukwa wa lunga. Kanaulambula hanga umwenemwene usoloke.

¹⁶ Hako atetekese mwe pwo ni kumumanyisa kulutwe lia chilumbilo.

¹⁷ Hako ase amwe meya a chijila mu musenge wa uma, azomone amwe mavu a mu zuwo lia Zambi lia makubu ni kwasa mu meya ha kwapwisa asasu.

¹⁸ Hako akasulule kambu ja pwo ni kusa mulambu wa wunga wa ukwa mu moko ja mwe pwo. Hako akwate mu moko jenyi musenge wa meya asasu, waze maahasa kuneha Shingo.

¹⁹ Ashingise mwe pwo ngwenyi: “Nyi kuwalingile kwe utanji, kuuchi kukwachika ku Shingo lia meya wano.

²⁰ Alioze nyi unakalinga utanji,

²¹ Mwene Zambi akushinge mukachi ka atu je, akusosewese ku mahie ni kujimbisa jimo lie.

²² Meya wano anjile mu jimo lie, alijimbise, ni asosewese ku mahie.” Mwe pwo akumbulule ngwenyi: “Chibwe Chenacho. Mwene Zambi achilinge.”

²³ Hako asoneke Shingo lino ha mukanda nikujimuna sona jize ni meya waze asasu.

²⁴ Shimbu kanda achinwisa mwe pwo meya asasu waze maahasa kuneha Shingo,

²⁵ hako atambule mulambu wa wunga wa ukwa ku kwoko lia pwo, ahungise we mulambu ku meso ja Mwene Zambi, nikuusa ha chilumbilo.

²⁶ Azomone ho kwoko lia wunga ngwe Chihanda cha mulambu, nikuwocha ha chilumbilo. Mba manwisa pwo meya waze.

²⁷ Nyi ngwe kanakalinga utanji, meya maamukokela lamba. Jimo lienyi mulijimba ni ku mahienyi mukusosewa. Mashingiwa mukachi ka atu jenyi.

²⁸ Alioze nyi kali kwenyi mukwa kwamba, kechi kumona lamba, makasema kwenyi.

^29-30 Yino ye Shimbi mu zuwo lize lunga uli ni ukwa ni hanyongena pwo lienyi ngwenyi, halinga utanji. Mwe pwo chatamba kumana kulutwe lia chilumbilo, mba hako mamweseka.

³¹ Lunga masamba ku mulonga, alioze pwo, nyi ngwe kali ni mulonga, chamutamba kumona lamba.