Kwalula 4 - Mukanda Wa Zambi 1970

Milimo ya akwa jimo lia Kohate

¹ Mwene Zambi yambila Mose

² ha kwalula akwa jimo lia Kohate wa ku vungu lia Levi nikulita ni majiko jo,

³ ni kusoneka malunga eswe waze haabwa ni miaka makumi atatu ndoo ku miaka makumi atano, waze atela kulinga milimo mu zuwo lia Zambi.

⁴ Milimo yo kufunga ni kululieka yuma ya chijila kuhiana.

⁵ Mwene Zambi yamwaha Mose Shimbi yikwo. Muze Aisraele maamba kukatuka ha musumba, Arone ni ana jenyi a malunga akanjila mu zuwo lia Zambi, akalemuna chikalakala kulutwe lia mushete wa Usendo ni kufuka nacho we mushete.

⁶ Akafuka ho chifuko cha malambu abema, akazazulwila ho hina lilauluka, mba maakanjisa mo mikambo ya kumbachila.

⁷ Ha mesa ya kutumbieka mbolo ya Mwene Zambi akafuka ho hina lilauluka ni kusa ho yenga, ni misenge ya kusa yuma ya vumba libema, ni misenge ya milambu, ni milondo ya vinyu ya milambu. Chatamba kubwa ni mbolo ha mesa matangwa eswe.

⁸ Akafuka ho hina lichila ni lambu libema, mba akayise ha mikambo ya kumbachila.

⁹ Akanda hina lilauluka hanga akafuke ndeya, ni yenga ya kukwachila uto, ni mana, ni yikashi yeswe ya maji a olive.

¹⁰ Akasa yikashi yeswe mu lambu libema mba akayise ha mikambo ya kumbachila.

¹¹ Ha chilumbilo cha oru akafuka ho hina lilauluka, ni lambu libema, akanjisa mikambo ya kumbachila mu ngo.

¹² Akanda yikashi ya kulinga nayo muma mwa chijila, akayivunga mu hina lilauluka, ni kufuka ho lambu libema, mba akayise ha mikambo ya kumbachila.

¹³ Akakomba uto wa ku chilumbilo ni kufuka ho hina lia ufungo.

¹⁴ Akasa ho yikashi yeswe ya milimo ya ha chilumbilo: yenga ya kwokwela kahia, ni somo, ni makombo, ni mbashila. Akafuka ho lambu libema ni kunjisa mo mikambo ya kumbachila.

¹⁵ Muze tangwa lia kukatuka ha musumba hiliaheta, akwa jimo lia Kohate akeza ni kumbata yikashi ya chijila, alioze shina muze Arone ni ana jenyi a malunga haamanununa kuyifuka yeswe. Akwa jimo lia Kohate kuchaatambile kukwata ku yuma ya chijila. Nyi ka, kumaafwa. Yino ye milimo ya akwa jimo lia Kohate muze maazanga kulemuna zuwo lia Zambi lia makubu.

¹⁶ Eleazare, mwana wa hako Arone, akabwa ni milimo ya kutala zuwo Heswe lia Zambi, ni maji a ndeya, ni yuma ya vumba libema, ni milambu ya mbuto, ni maji akuwayisa no, ni yuma yeswe yikwo ya mu zuwo lia Zambi yize hayikunjika kuli Zambi.

¹⁷ Mwene Zambi yambila Mose ni Arone ngwenyi:

¹⁸ “Talenu kanawa, akwa jimo lia Kohate

¹⁹ kanda akundama ku yuma ya chijila. Nyi ka, kumaafwa. Alioze Arone ni ana jenyi a malunga chaatamba kunjila mu zuwo liami ni kulweza mutu mweswe chize mambata.

²⁰ Alioze nyi akwa Kohate maanjila mu zuwo lia Zambi ni kumona chize mahako analulieka yuma ya chijila ha kuyimbata, kumaafwa.”

Milimo ya akwa jimo lia Gershone

²¹ Mwene Zambi yambila Mose

²² ha kwalula akwa jimo lia Gershone, wa ku vungu lia Levi, nikulita ni majiko jo,

²³ ni kusoneka malunga eswe, waze haabwa ni miaka makumi atatu ndoo ku miaka makumi atano, waze atela kulinga milimo mu zuwo lia Zambi.

²⁴ Milimo yo kumbata yuma yino:

²⁵ zuwo lia Zambi lia makubu, ni mafulumba jalio (limuwika lia mahina lia mushi, limuwika lia makubu lia muchima, ni limuwika lia malambu abema lia helu), ni chikalakala cha ku chikolo cha zuwo lia Zambi,

²⁶ ni yikalakala ya chipanga, ni mihipu yacho, ni chilumbilo, ni yikalakala ya ku chikolo cha chipanga, ni yuma yayo yeswe. Akalinga milimo yino yeswe.

²⁷ Milimo yeswe ya akwa Gershone, kafwa ngwe kululieka ni kumbata, Mose ni Arone ni ana jenyi a malunga chaatamba kuyitala.

²⁸ Yino ye milimo ya akwa jimo lia Gershone mu zuwo lia Zambi lia makubu. Itamare, mwana wa hako Arone, akabwa mwata wo.

Milimo ya akwa jimo lia Merari

²⁹ Mwene Zambi yambila Mose ha kwalula akwa jimo lia Merari, a ku vungu lia Levi, nikulita ni majiko jo,

³⁰ ni kusoneka mahinga eswe, waze haabwa ni miaka makumi atatu ndoo ku miaka makumi atano, waze atela kulinga milimo mu zuwo lia Zambi.

³¹ Milimo yo kumbata yuma yino: mabaya, ni mikambo, ni manguji, ni yimanyino ya ku zuwo lia Zambi,

³² ni manguji, ni yimanyino, ni mbambo, ni mihipu ya chipanga, ni yuma yayo yeswe. Mutu ni mutu akambata yimwe yuma.

³³ Yino ye milimo ya akwa jimo lia Merari ku zuwo lia Zambi lia makubu. Itamare, mwana wa hako Arone, akabwa mwata wo.

Mose yalula Alevi

^34-48 Mwene Zambi yambila Mose ni Arone ni miata ya Chikungulwila ha kwalula majimo atatu ja Alevi: Kohate, ni Gershone, ni Merari. Yaachilinga nikulita ni majiko jo, nikusoneka malunga eswe, waze haabwa ni miaka makumi atatu ndoo ku miaka makumi atano, waze atela kulinga milimo mu zuwo lia Zambi. Majimo jo ni kwoka cho wano: Jimo Kwoka cho Kohate 2,750 Gershone 2,630 Merari 3,200 Malunga eswe: 8,580

Jimo Kwoka cho

⁴⁹ Mose yasoneka mutu mweswe nikulita ni maliji ja Mwene Zambi. Yaaha milimo ya kulinga ni kumbata ngwe chize Mwene Zambi amwambile.