Kwalula 36 - Mukanda Wa Zambi 1970

Chihinga cha pwo yoze uli ku ulo

¹ Akwa lutwe ja majiko a ku jimo lia Gileade, mwana wa Makire, mujikulu wa Manase mwana wa Josefe, yeeza kuli Mose ni miata akwo.

² Yaamba ngwo: “Mwene Zambi hanakulweze ha kutetela atu chifuchi ha kuta chela. Hanakulweze nawa hakuhana chihinga cha usoko wetu Zelofehade kuli ana jenyi a mapwo.

³ Alioze nyi ngwe alimbata ni malunga a vungu lieka, chihinga muchibwa cha lie vungu lize, chihinga chetu muchikeha.

⁴ Ha Mwaka wa Kuhilwisa, muze atu akahilwisa yuma yeswe yize alanjile, chihinga cha ana ja Zelofehade a mapwo maachiwezela ku mavungu waze anaambata. Muchibwa chihinga cho cha miaka yeswe.”

⁵ Mose yahana Shimbi jino kuli Aisraele nikulita ni maliji a Mwene Zambi, ngwenyi: “Yize anambe vungu lia Manase yili yamwenemwne.

⁶ Mwene Zambi kanambe ngwenyi, ana mapwo ja Zelofehade kaanatusuka ha kulimbata ni mweswawo anazange, alioze shina a ku vungu lio ene.

⁷ Chenacho chihinga cha Kaisraele mweswe muchikasala ku vungu lienyi.

⁸ Pwo mweswe yoze uli ni chimwe chihinga cha limwe vungu lia Israele, chatamba kulimbata ni umwe lunga wa ku vungu lienyi. Chenacho Kaisraele mweswe makahinga chihinga cha tushakulu twenyi,

⁹ hanga chihinga kuchichi katutuluka ni kuya ku vungu likwo. Vungu heswe mulifunga chihinga cho ene.”

^10-11 Ana ja Zelofehade yaalinga ngwe chize Mwene Zambi alwezele Mose. Mala, ni Tirza, ni Hogla, ni Milka, ni Noa, yaalimbata ni asonyi jo.

¹² Yaalimbata ni akwa jimo lia vungu lia Manase mwana wa Josefe, chihinga cho yichibwa ku vungu lia tushakulu two.

¹³ Jino je Shimbi ni yiyulo yize Mwene Zambi ahanyine kuli Aisraele ku kanwa lia Mose mu yana ya Moabe mu sali lia Yordau ha talanganyi ni Yeriku.