Kwalula 35 - Mukanda Wa Zambi 1970

Membo ja Alevi

¹ Musali lia Yordau mu yana ya Moabe hatalanganyi ni Yeriku Mwene Zambi yambila Mose ngwenyi:

² “Lweza Aisraele ngwe, ku Chihanda cha chihinga cho chize maakatambula chatamba kuhana amwe membo kuli Alevi ha kutwama mo ni ulishilo wa yimuna yo.

³ Membo waze maakabwa a Alevi akatwame mo. Ulishilo muukabwa wa ngombe jo ni yimuna yo.

⁴ Ulishilo wa yimuna ukabwa chize ku chipanga cha limbo metro 450,

⁵ nukeseka Usuhwe metro 900 ku sali heswe Mwana lia limbo, sali ni sali likabwa chimuwika.

⁶ Chatamba nawa kuhana membo asambano kuli Alevi a uchinyino kuze mutu mahasa kuchinyina, nyi mutu hashiha mukwo te kachinyongene. Chikwo nawa, nukaaha membo makumi awana ni aali,

⁷ hamwe ni we ulishilo wa yimuna yo. Membo akabwa makumi awana ni nake.

⁸ Unji wa membo ja Alevi ku vungu ni vungu lia Aisraele ukalita ni unene wa chifuchi cho.”

Membo a kuchinyina

⁹ Mwene Zambi yambila Mose

¹⁰ alweze Aisraele ngwenyi: “Muze munukazauka Yordau ni kunjila mu chifuchi cha Kanana,

¹¹ nukatongola membo a kuchinyina muze mutu mahasa kuchinyina nyi hashiha mukwo te kachizangile.

¹² Kwenako malilamwina kuli yoze unambe kukala usoko wenyi. Mutu yoze hasuma mulonga wa kushiha mukwo kuchatambile kumushiha shina muze ngaji haamusopesa mukachi ka atu.

¹³ Nukatongola membo asambano a kuchinyina,

¹⁴ ku chivumbuko cha Yordau membo atatu, mu chifuchi cha Kanana membo atatu.

¹⁵ Membo wano a kuchinyina maakakwasa Aisraele ni yilambala ni ngeji waze ali mukachi ko. Nyi umwe hashiha mutu te kachinyongene, mahasa kuchinyina ku limwe lia membo waze.

^16-18 “Alioze nyi umwe mutu mashiha mukwo ni utale, hanji ni liwe, hanji ni mutondo, kali chingalwe; chatamba kumushiha.

¹⁹ Usoko wa yoze hafwa mwe makamushiha. Akachilinga muze mamuwana.

²⁰ “Nyi umwe mutu kali ni kole ni mukwo, mba mamushiha ha kumunungwina hashi, hanji ni kumwasa chimwe Chuma,

²¹ hanji kumushiha ni kome, kali chingalwe. Chatamba kumushiha. Usoko wa yoze hafwa mwe makamushiha. Akachilinga muze mamuwana.

²² “Tangwa likwo nyi mutu hashiha mukwo te keshi nenyi kole, chibwe ha munungwina hashi, hanji hamwasa chimwe Chuma, mba wafwa,

²³ hanji tangwa likwo hakonga limwe liwe te kamumwene, mba hamushiha, te kachizangile, keshi nenyi kole,

²⁴ ha milonga ngwe yino akwa Chikungulwila akasambisa mutu yoze hashiha mukwo, hi yoze ko mukwa usoko wenyi.

²⁵ Akwa Chikungulwila akalamwina yoze hashiha mukwo muze usoko wenyi anazange kumukala, akamuhilwisa ku limbo lia kuchinyina kuze hachinyina. Akatwama ko ndoo muze mwata wa mahako hafwa.

²⁶ Nyi mutu yoze hashiha mukwo makatuka mu limbo lia kuchinyina,

²⁷ nyi mukwa kukala mamutakana mamushiha, kukala chino hi cha ungalwe ko.

²⁸ Mutu yoze hashiha mukwo chatamba kutwama mu limbo lia kuchinyina ndoo ku kufwa cha mwata wa mahako, mba makahiluka ku mahio.

²⁹ Shimbi jino chatamba kujifunga kweswako munutwama yenu ni vungu lienu.

³⁰ “Mutu yoze haasuma mulonga wa ungalwe, shina ku shindakenyo ya yela aali hanji kuhiana. Alioze kuchatambile kumushiha ku shindakenyo ya mutu umuwika.

³¹ Chingalwe chatamba kumushiha. Kuchatambile kumulamwina ni mbongo ja sambilo.

³² Nyi umwe mutu hachinyina ku limbo lia kuchinyina, kanda numutambula mbongo ja sambilo hanga ahiluke ku mahio shimbu mwata wa mahako kanda achifwa.

³³ Nyi nwachilinga nwabihisa chifuchi muze nunatwama. Ungalwe wakubihisa chifuchi. Kunwahashile kuchibemesa shina kushiha chingalwe.

³⁴ Kanda nubihisa chifuchi muze nwatwama, mumu ni yami Mwene Zambi nakutwama mukachi ka Aisraele.”