Kwalula 34 - Mukanda Wa Zambi 1970

Njiza ja chifuchi

¹ Mwene Zambi yambila Mose

² ha kulweza Aisraele Shimbi jino ngwenyi: “Muze munukanjila mu chifuchi cha Kanana, chifuchi chize ngunanwehe, njiza ja chifuchi jikabwe chino.

³ Njiza ya ku sali lia sude yikakatuka ku puya ya Zine, ni kukaula njize ya Edome. Ku chivumbuko njiza yikabutuka ku sali lia sude lia chitende che Kufwa.

⁴ Mba muyikalikonyeka ni kuzukisa ku sude ku Akrabime mukachi ke milundu, mba muyikabalika mu puya ya Zine ndoo ku Kadeshe Barnea. Mba muyikalikonyeka ni kuya ku norde ku sali lia chitende ndoo ku Hazare hadare ni ku Azmone.

⁵ Kwenako muyikalikonyeka ni kubalika ku chikulo cha njize ya Egiptu ni kusulila ku kalunga lwiji Mediterane.

⁶ “Njiza ya ku chitokelo muyikabwa ku mbumbulu ya kalunga lwiji Mediterane.

⁷ “Njiza ya ku norde muyikakatuka ku kalunga lwiji Mediterane ni kuya ndoo ku mulundu wa Hore,

⁸ chize kwekuze ndoo ku jila Hamate mukachi ka milundu. Muyikaya lume ndoo ku Zedade,

⁹ ni ku Zifrone, ni kusulila ku Hazare Enane.

¹⁰ “Njiza ya ku chivumbuko muyikatuka ku Hazare Enane ni kuya ndoo ku Shefame.

¹¹ Chize kwekuze muyikaya ku sude ndoo ku Harbele, ku chivumbuko cha Ayine, ndoo ku milundu ya ku chivumbuko cha chitende cha Galilea,

¹² mba muyikakaula lwiji Yordau ku sude ku chitende cha Kufwa. “Jino mujikabwa njiza ja chifuchi chenu.”

¹³ Mba Mose yambila Aisraele ngwenyi: “Chino chili chifuchi chize munukatambula ha kuta chela, chifuchi chize Mwene Zambi hanahana kuli mavungu livwa ni Chipinji.

¹⁴ Mavungu ja Rubene ni Gade, ni Chipinji cha Manase ku chivumbuko haatambula chihinga cho, haalitetela cho nikulita ni majiko jo,

¹⁵ mu sali lia Yordau ku chivumbuko, hatalanganyi ni Yeriku.”

Miata waze atongwele ha kuteta chifuchi

¹⁶ Mwene Zambi yambila Mose ngwenyi:

¹⁷ “Hako Eleazare ni Yoshua mwana wa Nune enoo maakatetela atu chifuchi.

¹⁸ Wanda nawa mwata umuwika ku vungu ni vungu hanga akaakwase.”

^19-28 Wano e malunga waze Mwene Zambi atongwele: Vungu Mwata Yuda Kaleba mwana wa Jefune, Simeone Shelumiele mwana wa Amihude, Benjamine Elidade mwana wa Chislone, Dane Buki mwana wa Jogli, Manase Haniele mwana wa Efode, Efraime Kemwele mwana wa Shiftane, Zabulone Elizafane mwana wa Parnake, Isakare Paltiele mwana wa Azane, Ashere Ahihude mwana wa Shelomi, Naftali Pedahele mwana wa Amihude.

Vungu Mwata

²⁹ Wano e malunga waze Mwene Zambi atongwele ha kutetela Aisraele chifuchi cha chihinga cho mu Kanana.