Kwalula 33 - Mukanda Wa Zambi 1970

Wenyi wa Aisraele chize ku Egiptu ndoo ku Moabe

¹ Jino je sango ja homa haze Aisraele ajikile misumba muze atuhukile mu chifuchi cha Egiptu ndoo ni muze ahetele mu chifuchi cha Moabe. Tetekeli jo te Mose ni Arone.

² Mose yasoneka majina a homa haze ajikiele misumba nikulita ni maliji a Mwene Zambi.

³ Aisraele yaatuhuka mu Egiptu ha tangwa kumi ni lia muchitano ha kakweji mutangu wa mwaka, ha tangwa lize liakawile chiwanyino chitangu cha Kubalika. Ku ndundo ja Mwene Zambi yaatuhuka mu limbo lia Ramesese ku meso ja akwa Egiptu,

⁴ muze to akwa Egiptu anafundu ana jo atangu waze Mwene Zambi ashihile. Ha kulinga chino, Mwene Zambi yaalweza ngwenyi, ndundo jenyi jinahiana jize ja mazambi a mu Egiptu.

⁵ Aisraele yaakatuka ku Ramesese, yaajika musumba ku Sukote.

⁶ Yaakatuka ko, yaajika musumba ku Etame kuze kwabutukila puya.

⁷ Yaakatuka ko yaahiluka ku Pi Hahirote, ku chivumbuko cha Bale Zefone. Yaajika musumba hehi ni Migdole.

⁸ Yaakatuka ko yaabalika ndusu mu kalunga lwiji Muchila ni kunjila mu puya ya Shure. Yeenda matangwa atatu mu puya, mba yaajika musumba ku Mara.

⁹ Yaakatuka ko, yaaya ku Elime, yaajika ko musumba, mumu kwabwile mashima a meya kumi ni aali ni mingaji makumi shimbiali.

¹⁰ Yaakatuka ko, yaajika musumba hehi ni kalunga lwiji Muchila.

¹¹ Yaakatuka ko, yaajika musumba mu puya Sine.

¹² Yaakatuka ko yaajika musumba ku Dofka,

¹³ mba yaaya ku Alushe.

¹⁴ Mba yaaya ku Refidime, meya akunwa kaabwile ko.

^15-37 Chize ku Refidime ndoo ku mulundu wa Hore, yaajika misumba mu puya ya Sinai, ni ku Kibrote Hatava (hanji ku “Mafuka ja akwa usolo ubi”), ni ku Hazerote, ni ku Ritma, ni ku Rimone Pereze, ni ku Libna, ni ku Risa, ni ku Kehelata, ni ku mulundu wa Shefere, ni ku Harada, ni ku Makelote, ni ku Tahate, ni ku Tera, ni ku Mitka, ni ku Hashmona, ni ku Moserote, ni ku Bene Jakane, ni ku Hore Hagidgade, ni ku Jotbata, ni ku Abrona, ni ku Eziongebere, ni mu puya ya Zine (Kadeshe) ni ku mulundu wa Hore, ku ngiza ya chifuchi cha Edome.

^38-39 Hako Arone yakanduka ha mulundu wa Hore nikulita ni maliji a Mwene Zambi. Kwenako afwilile, muze te habwa ni miaka 123. Te hikwabalika miaka makumi awana chize kuze Aisraele atuhukile ku Egiptu, ha tangwa litangu lia kakweji wa muchitano.

⁴⁰ Mwanangana wa mu limbo lia Arade, ku sali lia sude mu chifuchi cha Kanana, yevwa ngwo, Aisraele kaaneza.

^41-49 Chize ku mulundu wa Hore ndoo ku yana ya Moabe, Aisraele yaajika misumba yo ku Zalmona, ni ku Punone, ni ku Obote, ni mu yikulu ya Abarime mu chifuchi cha Moabe, ni ku Dibone Gade, ni ku Almone Diblataime, ni ha mulundu wa Abarime hehi ni mulundu wa Nebo, ni mu yana ya Moabe musali lia Yordau hatalanganyi ni Yeriku, mukachi ka Bete Jeshimote ni mu chikulo cha Akasia.

Longeso ha kukumba Kanana

⁵⁰ Mu yana ya Moabe, mu sali lia Yordau hatalanganyi ni Yeriku, Mwene Zambi yambila Mose

⁵¹ ha kulweza Aisraele Shimbi jino ngwenyi: “Muze munukazauka Yordau ni kunjila mu chifuchi cha Kanana,

⁵² atu eswe waze alimo nukaahanga, nukamwanga mahamba jo eswe a mawe ni a utale ni yilumbilo yo yeswe.

⁵³ Nukatambula che chifuchi nukatwame mo, mumu hinanwaha cho.

⁵⁴ Nukateta chifuchi ku mavungu nikulita ni majimo jo, nukahana Chihanda chinene cha chihinga ku jimo linene, chikepe ku jimo likepe

⁵⁵ Alioze nyi kunwahumine enya chifuchi waze maakasala mo makabwa ngwe misongolwela mu meso jenu ni mbimbo mu pachi jenu, kumaakanubinjisa mu chifuchi chize munukatwama.

⁵⁶ Nyi kunwahumine, mungukanwonona, ngwe chize nambile kwonona ayo.”