Kwalula 32 - Mukanda Wa Zambi 1970

Mavungu a ku chivumbuko cha Yordau

¹ Mavungu ja Rubene ni Gade yaabwa ni ngombe anji. Muze amwene ngwo, yifuchi ya Jazere ni Gileade yabwile yibema mumu ha kubichila mo ngombe,

² yaaya kuli Mose ni hako Eleazare ni kuli miata akwo ja Chikungulwila, yaamba ngwo:

^3-4 “Chifuchi chize Mwene Zambi hakwasa Aisraele ha kukumba chili ni mavu abema akubichila ngombe, mumu tuli ni ngombe anji. Membo jacho: Atarote, ni Dibone, ni Jazere, ni Nimra, ni Heshbone, ni Eleale, ni Sibma, ni Nebo, ni Beone.

⁵ Twalemba mwane, twehenu kama chifuchi chibwe chihinga chetu, kanda nutuzawisa Yordau ni kutunga muze musali.”

⁶ Mose yakumbulula ngwenyi: “Kuma nunazange kusala kuno muze usoko wenu anayi ku jita, nyi?

⁷ Kuchi nunalekumuna Aisraele ha kuzauka Yordau ni kunjila mu chifuchi chize Mwene Zambi haanahe?

⁸ Chenacho alingile atatenu muze twabwile ku Kadeshe Barnea muze naatumine ha kwendesa chifuchi cha Kanana.

⁹ Yaaya ku chikulo cha Eshkole, yaamona chifuchi, alioze muze haahiluka, yaalekumwisa atu mu moko ha kunjila mu chifuchi chize Mwene Zambi aahele.

¹⁰ Mwene Zambi yevwa ufwatulo ha tangwa lize, yalishinga ngwenyi:

¹¹ ‘Ngunalishingi ngwami, niumwe wa kuli malunga a miaka makumi aali ndoo kuli makulwana waze akatukile mu chifuchi cha Egiptu makahinga chifuchi chize nalakenyene Abrahama, ni Isake, ni Yakoba, mumu kangukawile ko ni mbunge yeswe.’

¹² Shina lume Kaleba mwana wa Jefune mukwa Kenaze, ni Yoshua mwana wa Nune, e akawile Mwene Zambi ni mbunge yeswe.

¹³ Mwene Zambi yevwila atu ufwatulo, yeendanganyisa mu puya miaka makumi awana, ndoo ni muze Chisemuko cheswe chize alitachikile ni Zambi ahwile ni kufwa.

¹⁴ Haliabwila ni yenu nawa hinwasalakana atatenu; nuli Chisemuko cha yivulumunyi, nunakoko nawa ufwatulo wa Mwene Zambi hali Aisraele.

¹⁵ Yenu Arubene ni Agade, nyi nwalituna kumukaula haliabwila, Mwene Zambi mehuka atu wano eswe nawa mu puya, ni muze makoonona, milonga yize muyikabwa ya yenu.”

¹⁶ No yaakundama kuli Mose, yaamwamba ngwo: “Hatangu tutayize tutunge kuno matanga a mawe mumu ha yimuna yetu ni membo a kukoleka mumu ha majiko jetu.

¹⁷ Mba mutulilulika ha kuya ni usoko wetu Aisraele mu jita nikwatetekela ndoo mutukaahetesa mu chifuchi cho. Ha shimbu lize majiko jetu maahasa kutwama muno mu uhwimino, mu membo a kukoleka.

¹⁸ Kutuchi kuhiluka ku mahietu ndoo muze Aisraele akwo haatambula chihinga cho.

¹⁹ Kutuchi katambula chihinga hamwe no musali lia Yordau, mumu hitunatambula Chihanda chetu muno musali.”

²⁰ Mose yaakumbulula ngwenyi: “Nyi yize nunambe yili yamwenemwene, lulikenu ha kuya ku jita kunokwene ku meso ja Mwene Zambi.

²¹ Tujita twenu eswe chaatamba kuzauka Yordau ni kwasa jita mu chiyulo cha Mwene Zambi ndoo ni muze haakumba akwa kole jetu,

²² ni muze haatambula che chifuchi. Munukabwamuze mba munukahasa kuhiluka, mumu hinwamanununa chilakenyo chenu kuli Mwene Zambi ni kuli usoko wenu Aisraele. Mba Mwene Zambi makatayiza kunwaha chifuchi chino cha ku chivumbuko cha Yordau

²³ Alioze nyi kunwamanunwine chilakenyo chenu, ngunanukanyamisa ngwami, munuvulumuna ku meso ja Mwene Zambi. Nyi ka, makanumwesa lamba mumu ha shili yenu.

²⁴ Kashika tungenu membo ja majiko jenu ni matanga a yimuna yenu, alioze nulinga chize hinunalakenya!”

²⁵ Malunga ja Agade ni Arubene yaamba ngwo: “Mwata, mutukalinga yeswe yize hiwamba.

²⁶ Mapwo ni ana jetu ni yimuna yetu maatwama hanohene mu membo a mu chifuchi cha Gileade.

²⁷ Alioze yetu eswe tuvumbi twe hitwalulika ni kuya mu jita mu chiyulo cha Mwene Zambi. Mutukazauka Yordau ni kwasa jita ngwe chize hiwamba.”

²⁸ Mba Mose yahana Shimbi jino kuli Eleazare ni Yoshua, ni miata akwo ja Aisraele ngwenyi:

²⁹ “Nyi ngwe malunga ja Agade ni Arubene maakazauka Yordau ni kululika ha kwasa jita mu chiyulo cha Mwene Zambi, nawa nyi ku kukwasa cho hinwakumba akwa chifuchi, mba munwaha chifuchi cha Gileade kubwa chihinga cho.

³⁰ Alioze nyi kaazaukile Yordau ni kuya hamwe ni yenu mu jita, akatambula chifuchi cha chihinga cho cha Kanana ngwe yenu.”

³¹ Malunga ja Agade ni Arubene yaakumbulula ngwo: “Mwata mutukalinga ngwe chize Mwene Zambi hamba.

³² Mutukazauka musali lia Yordau ni kwasa jita mu chiyulo chenyi, mba hanga tufunge chihinga chetu muno musali lia Yordau.”

³³ Mose yahana ku mavungu ja Rubene ni Gade ni Chipinji cha Manase chifuchi cheswe cha mwanangana Sihone wa Aamore, ni cha mwanangana Oge wa ku chifuchi cha Bashane, chinge ko membo ni yifuchi yize yakusulangana.

³⁴ Vungu lia Gade yaatungulula membo a kukoleka ja Dibone, ni Atarote, ni Aroere,

³⁵ ni Atrote Shofane, ni Jazere, ni Jokbeha,

³⁶ ni Bete Nimra, ni Bete Harane.

³⁷ Vungu lia Rubene yaatungulula Heshbone, ni Eliale, ni Kiriataime,

³⁸ ni Nebo, ni Bale Meone, (jina lino yaalialumuna), ni Sibma. Membo waze atungulwile yaaluka majina aha.

³⁹ Jimo lia Makire, mwana wa Manase, yaasa jita ni akwa chifuchi cha Gileade, yaakumba, yaahanga Aamore waze abwile mo.

⁴⁰ Mba Mose yahana Gileade ku jimo lia Makire, no yaatwama mo.

⁴¹ Jaire, wa ku vungu lia Manase, yasa jita ni yimwe yihunda, yayiluka ngwenyi: “Yihunda ya Jaire.”

⁴² Noba yasa jita, yatambula limbo lia Kenate ni ye yihunda yayo, yaliluka ngwenyi: “Noba,” nikulita ni jina lienyi mwene.