Kwalula 31 - Mukanda Wa Zambi 1970

Aisraele yaasa jita ni Amidiane

¹ Mwene Zambi yambila Mose ngwenyi:

² “Mwesenu Amidiane lamba ha chize alingile kuli Aisraele. Muze hiwachilinga mba muufwa.”

³ Mba Mose yalweza atu ngwenyi: “Lipakatenu ha kwasa jita ni Amidiane ni kwamwesa lamba ha Chuma chize anakalinga kuli Mwene Zambi.

⁴ Vungu heswe lia Israele atume ku jita kanunu umuwika umuwika.”

⁵ Chenacho vungu lieswe atongolwele kanunu umuwika umuwika. Kwoka cha malunga waze alipakachile tununu kumi ni aali.

⁶ Mose yaatuma ku jita, mwata wo Finehase mwana wa hako Eleazare, yoze ahele milimo ya kufunga yuma ya chijila ni yitavwi ya kunyingikisa nayo.

⁷ No yaaya ku jita ni Amidiane ngwe chize Mwene Zambi ambilile Mose, yaashiha malunga eswe,

⁸ chinge ni mianangana atano ja Midiane: Evi, ni Rekeme, ni Zure, ni Hure, ni Reba. Yaashiha nawa Balame mwana wa Beore.

⁹ Aisraele yaalwa mapwo ja Amidiane hamwe ni ana jo, ni ngombe ni yimuna yo yeswe, ni ubite wo weswe.

¹⁰ Yoocha membo jo eswe hamwe ni misumba yo.

¹¹ Yaambata yuma yo yeswe yize abubile mu jita, chinge ni funge ni yimuna,

¹² yaayitwala kuli Mose ni Eleazare ni Chikungulwila cha Aisraele, waze abwile mu yana ya Moabe mu sali lia Yordau hatalanganyi ni Yeriku.

Tujita yaahiluka

¹³ Mose, ni hako Eleazare ni miata eswe a Chikungulwila yaatuhuka mu musumba ni kubatwiza tujita.

¹⁴ Mose yatenukina miata ni akwa lutwe a tununu twa tujita ni akulakaji, waze te anakatuka ku jita.

¹⁵ Yaahula ngwenyi: “Mumu yika hinwahichika mapwo eswe ni mwono?

¹⁶ Nyingikenu ngwenu, kaali mapwo waze akawile longeso lia Balame ni avulumwishine Aisraele ku Peore. Chenacho chakokele chipuho hali atu ja Mwene Zambi.

¹⁷ Kashika haliabwila shihenu ana malunga eswe ni mapwo eswe waze haanalimono ni malunga,

¹⁸ alioze ana mapwo waze kanda achilimona ni malunga afungenu ni mwono.

¹⁹ Mweswe wa kuli yenu yoze hashiha mutu hanji hakwata ku mujimba wa mufu chamutamba kusala haze lia musumba matangwa shimbiali. Ha tangwa lia muchitatu ni ha tangwa lia muchishimbiali libemesenu hamwe ni mapwo waze nwakwachile mu jita.

²⁰ Chanutamba nawa kubemesa hina heswe ni yuma yeswe ya kulinga ni malambu, ni ngona ja pembe hanji ya mitondo.”

²¹ Hako Eleazare yambila atu waze akatukile ku jita ngwenyi: “Jino jili Shimbi jize Mwene Zambi ahanyine kuli Mose.

^22-23 Chuma cheswe chize kuchishi kuwema mu kahia, ngwe oru, ni prata, ni unengu, ni utale, ni chifolo, ni luchimbo, chatamba kuchibemesa ha kuchibalikisa mu kahia. Yize yikwo chatamba kuyibemesa ni meya.

²⁴ Ha tangwa lia muchishimbiali nukakosa mahina jenu ha kulibemesa, mba maakanutayiza kunjila mu musumba.”

Kuteta cha yuma ya kububa mu jita

²⁵ Mwene Zambi yambila Mose ngwenyi:

²⁶ “Yena ni Eleazare, hamwe ni miata ja Chikungulwila, alulenu yuma yeswe yize nwejile nayo mu jita, chinge ni funge ni yimuna.

²⁷ Nulitetele ye yuma yize nwejile nayo yihanda yaali, Chihanda chimuwika cha tujita chikwo cha Chikungulwila.

²⁸ Ku Chihanda chize munuhana kuli tujita, chiza mutu umuwika kuli funge kulakaji jitano ngwe mulambu wa Mwene Zambi. Lingenu nawa chizechene ni ngombe, ni yimbulu, ni mapanga, ni pembe.

²⁹ Nuyihane kuli hako Eleazare, kuuli mulambu ulemu wa Mwene Zambi.

³⁰ Ku Chihanda chize munuhana ku Chikungulwila chiza mutu umuwika kuli funge makumi atano atano. Lingenu nawa chizechene ni ngombe, ni yimbulu, ni mapanga, ni pembe. Nuyihane kuli Alevi waze akufunga zuwo lia Zambi.”

³¹ Mose ni Eleazare yaalinga ngwe chize Mwene Zambi alwezele.

^32-35 Yuma yeswe yize abubile mu jita chinge ni yize afungile ayo ene yenayi ayi: mapanga ni pembe 675,000, ni ngombe 72,000, ni yimbulu 61,000, ni ana a mapwo waze te kanda achilimona ni malunga 32,000.

^36-40 Chihanda chize atambwile tujita chino: mapanga ni pembe 337,500, Chihanda cha Mwene Zambi 675; ni ngombe 36,000, Chihanda cha Mwene Zambi 72; yimbulu 30,500, Chihanda cha Mwene Zambi 61; ana mapwo waze te kanda achilimona ni malunga 16,000, Chihanda cha Mwene Zambi 32

⁴¹ Mba Mose yahana mulambu wa Mwene Zambi kuli Eleazare, ngwe chize amulwezele.

^42-46 Chihanda cha Chikungulwila te chinalite ni chize cha tujita: mapanga ni pembe 337,500, ni ngombe 36,000 ni yimbulu 30,500, ni ana a mapwo waze te kanda achilimona ni malunga 16,000.

⁴⁷ Ku Chihanda chino Mose yanda umuwika kuli funge makumi atano atano, ni chimuna chimuwika ku yimuna makumi atano atano. Yalinga ngwe chize Mwene Zambi amwambile, yayihana kuli Alevi waze te akufunga zuwo lia Mwene Zambi.

⁴⁸ Mba miata waze te akusongwela tujita yaaheta kuli Mose,

⁴⁹ yaamulweza ngwo: “Mwata, hitwalula tujita waze tuli no, eswe kaanasu.

⁵⁰ Kashika hitwaneha yuma ya oru, ni malenge, ni mikosa, ni tuzeya, ni yingeliengelie, ni yijingo yize hitwabuba. Hitwayineha kuli Mwene Zambi mumu ha mwono wetu, hanga atufunge.”

⁵¹ Mose ni Eleazare yaatambula ye oru yeswe ya uhenya.

⁵² Kwoka cheswe cha milambu yize anehene miata yichibwa kilo kulakaji jaali.

⁵³ Tujita waze akwo yaafunga yize abubile mu jita.

⁵⁴ Mba Mose ni Eleazare yaatwala ye oru ku zuwo lia Zambi, hanga Mwene Zambi afunge Aisraele.