Kwalula 30 - Mukanda Wa Zambi 1970

Shimbi ja yilakenyo

¹ Mose yahana Shimbi kuli miata ja mavungu ja Aisraele.

² Nyi lunga malakenya kumwaha Mwene Zambi chimwe Chuma hanji kujila chimwe Chuma, kanda avulama chilakenyo chenyi, alioze achikolese.

³ Nyi mwana wa pwo yoze watwama ku zuwo lia tato malakenya ha kumwaha Mwene Zambi chimwe Chuma hanji malakenya kujila chimwe Chuma,

⁴ chatamba kukolesa chilakenyo ni chijila chenyi. Shina tato mamukanjisa muze mevwa maliji jenyi.

⁵ Alioze nyi tato hamukanjisa ha tangwa lizeliene hachivwa, chilakenyo kuchabwa chamokomoko. Mwene Zambi makamukonekena, muze tato hamukanjisa.

⁶ Nyi ngwe pwo yoze kanda achiya ku ulo malakenya chimwe Chuma ni mbunge yeswe chibwe ni kulipupula, hanji malijilula chimwe Chuma, mba maya ku ulo,

⁷ chamutamba kuchikolesa, shina lunga lienyi mamukanjisa muze mevwa maliji jenyi.

⁸ Alioze nyi lunga lienyi ha tangwa lizeliene hachivwa hamukanjisa, chilakenyo kuchabwa chamokomoko. Mwene Zambi makamukonekena.

⁹ Alioze pwo, twamishi hanji yoze haanalakula, chamutamba kukolesa chilakenyo ni kujila cheswe chize alakenyene.

¹⁰ Nyi umwe pwo uli ku ulo malakenya hanji kujila chimwe Chuma,

¹¹ chamutamba kukolesa cheswe chize hamba, shina lunga lienyi mamukanjisa muze hevwa maliji jenyi.

¹² Alioze nyi lunga lienyi hamukanjisa ha tangwa lizeliene hachivwa, chilakenyo kuchabwa chamokomoko. Mwene Zambi mamukonekena, mumu lunga lienyi hamukanjisa.

¹³ Lunga lienyi kali ni chiyulo cha kumukanjisa hanji kumutayiza.

¹⁴ Nyi lunga hevwa chilakenyo cha pwo lienyi, alioze kambile nichimwe ha tangwa lize, pwo chamutamba kukolesa yuma yeswe yize halakenya. Lunga hatayiza chilakenyo cha pwo lienyi mumu kamukanjishile muze hachivwa.

¹⁵ Alioze nyi lunga mamukanjisa muze amwe matangwa haabalika, nyi pwo kakolesele chilakenyo chenyi, lamba mulibwa lia lunga.

¹⁶ Mwene Zambi yalweza Mose hakutwala ku yilakenyo ya pwo yoze kanda achiya ku ulo, uchili ku zuwo lia tato, hanji pwo yoze hanayi ku ulo.