Kwalula 3 - Mukanda Wa Zambi 1970

Ana ja Arone a malunga

¹ Lino lie jiko lia Arone ni Mose ha tangwa lize Mwene Zambi ahanjikile ni Mose ha mulundu wa Sinai.

² Arone te kali ni ana awana a malunga: Nadabe mwe mukulwana, ni Abihu, ni Eleazare, ni Itamare.

³ Yaawahisa ni kwapwisa mahako.

⁴ Alioze Nadabe ni Abihu yaafwa muze alambwile kahia keka kuli Mwene Zambi mu puya ya Sinai. Kaabwile ko ni ana. Chenacho Eleazare ni Itamare alingile milimo ya uhako ha matangwa ja Arone.

Mose yakunjika Alevi ha kulingila mahako

⁵ Mwene Zambi yambila Mose ngwenyi:

⁶ “Neha vungu lia Levi ni kwakunjika ha kulingila hako Arone.

⁷ Akalinga milimo ya ku zuwo lia Zambi lia makubu ni kulingila mahako ni Chikungulwila cheswe.

⁸ Akafunga yikashi ni kulingila Aisraele eswe mu zuwo lia Zambi.

⁹ Akalingila Arone ni ana jenyi a malunga.

¹⁰ Ukajilika Arone ni ana jenyi a malunga ku milimo ya uhako. Nyi umwe Kaisraele mukwo meseka kuchilinga, chatamba kumushiha.”

¹¹ Mwene Zambi yambila Mose ngwenyi:

^12-13 “Haliabwila Alevi kaali niami. Muze nashihile atangu eswe akusemuka mu Egiptu, yingukunjika ana a malunga a makulwana eswe ku majiko ja Aisraele ni atangu kusemuka a kuli yimuna. Haliabwila muli ana atangu kusemuka kuli Aisraele, himwasalakana Alevi. Kumaabwa niami. Yami nguli Mwene Zambi.”

Mose yalula Alevi

¹⁴ Mu puya ya Sinai Mwene Zambi yambila Mose

¹⁵ ha kwalula majimo ni majiko ja Alevi ni kusoneka lunga mweswe wa kakweji umuwika ndoo kuli mukulwana.

¹⁶ Neye yachilinga.

^17-20 Levi te kakwete ana atatu a malunga: Gershone ni Kohate ni Merari. Enoo abwile tushakulu twa majimo jo. Gershone yabwa ni ana aali a malunga: Libni ni Shimei. Kohate yabwa ni ana awana a malunga: Amrame ni Izehare ni Hebrone ni Uziele. Merari yabwa ni ana aali a malunga: Mali ni Mushi. Enoo abwile tushakulu twa majimo jo.

²¹ Jimo lia Gershone e majiko ja Libni ni Shimei.

²² Kwoka cha malunga, chize kuli akwa kakweji umuwika ndoo kuli makulwana, yaabwa 7,500.

²³ Akwa jimo lia Gershone yaajikila mazuwo jo kunyima lia zuwo lia Zambi ku chitokelo,

²⁴ hamwe ni mwata wo, Eliasafe mwana wa Laele.

²⁵ Akwa Gershone e abwile tufunga twa zuwo lia Zambi lia makubu, ni fulumba lialio lia muchima ni lia haze, ni chikalakala cha ku chikolo,

²⁶ ni yikalakala ya chipanga, ni chilumbilo, ni chikalakala cha ku chikolo cha chipanga. Milimo yo kufunga yuma yino yeswe ni kuyilulieka.

²⁷ Akwa jimo lia Amrame, ni Izehare, ni Hebrone, ni Uziele, enoo a ku jimo lia Kohate.

²⁸ Kwoka cha malunga, chize kuli akwa kakweji umuwika ndoo kuli makulwana, yabwa 8,600.

²⁹ Akwa jimo lino yaajikila mazuwo jo ku sali lia sude lia zuwo lia Zambi,

³⁰ hamwe ni Elisafane, mwana wa Uziele, mwata wo.

³¹ Enoo te akufunga mushete wa Usendo, ni mesa, ni ndeya, ni yilumbilo, ni yikashi yize te mahako akulinga nayo milimo muma mwa chijila, ni chikalakala cha ku chikolo cha muma mwa chijila kuhiana. Milimo yo kufunga yuma yino yeswe ni kuyilulieka.

³² Mwata wa Alevi jina lienyi te Eleazare, mwana wa hako Arone. Milimo yenyi kufunga ni kululieka milimo ya muma mwa chijila.

³³ Akwa jiko lia Mali ni Mushi, enoo a ku jimo lia Merari.

³⁴ Kwoka cha malunga, chize kuli akwa kakweji umuwika ndoo kuli makulwana, yaabwa 6,200.

³⁵ Akwa jimo lino yaajikila mazuwo jo ku sali lia norde lia zuwo lia Zambi, hamwe ni mwata wo Zuriele, mwana wa Abihaile.

³⁶ Yaaha milimo ya kufunga ni kululieka yuma yino ya ku zuwo lia Zambi; mabaya, ni mikambo, ni manguji, ni yimanyino, hamwe ni yuma yayo yeswe.

³⁷ Yaaha nawa milimo ya kufunga ni kululieka yuma yino ya ku chipanga: manguji, ni yimanyino, ni mbambo, ni mihipu.

³⁸ Mose ni Arone ni ana jenyi a malunga yaajikila mazuwo jo kulutwe lia zuwo lia Zambi ku chivumbuko. Yaabwa akwa milimo ya uhako muma mwa chijila mumu hali Aisraele. Nyi umwe Kaisraele mukwo meseka kuchilinga, chatamba kumushiha.

³⁹ Kwoka cha Alevi a malunga, chize kuli akwa kakweji umuwika ndoo kuli makulwana yaabwa 22,000.

Alevi yaasalakana ana malunga atangu kusemuka

^40-41 Mwene Zambi yambila Mose ngwenyi: “Ana malunga eswe atangu kusemuka mu Israele kaali niami. Kashika Soneka mwana wa lunga mweswe mutangu kusemuka mu Israele, chize kuli akwa kakweji umuwika ndoo kuli makulwana. Alioze muli ayo nasalakanyisa mo Alevi eswe abwe niami! Yami nguli Mwene Zambi! Hinatambula nawa ngombe ja Alevi ha kusalakanyisa mo atangu kusemuka a ku ngombe eswe ja Aisraele.”

⁴² Mose yononoka, yasoneka malunga atangu kusemuka eswe,

⁴³ chize kuli akwa kakweji umuwika ndoo kuli makulwana. Kwoka cho 22,273.

⁴⁴ Mwene Zambi yambila Mose ngwenyi:

⁴⁵ “Haliabwila kunjika Alevi abwe niami, ha kusalakanyisa ana malunga atangu kusemuka kuli Aisraele. Kunjika nawa ngombe ja Alevi ha kusalakanyisa ngombe atangu kusemuka ja Aisraele.

⁴⁶ Kwoka cha ana malunga atangu kusemuka ja Aisraele chinahiana kwoka cha Alevi 273. Kashika chatamba kukula waze anahiana.

⁴⁷ Ukafweta prata jitano mumu hali mutu mweswe, nikulita ni ulemu wa mbongo ja miaka yino.

⁴⁸ Ukahana mbongo jize kuli Arone ni ana jenyi a malunga.”

^49-51 Mose yononoka, yanda mbongo ja prata 1,365, yajaha Arone ni ana jenyi a malunga.