Kwalula 29 - Mukanda Wa Zambi 1970

Milambu ya chiwanyino cha Mwaka Waha

¹ Ha tangwa litangu lia kakweji wa muchishimbiali chatamba kulikungulula ha kuwayila, kanda nukalinga ho mulimo niumwe. Ha lie tangwa alio lili tangwa lia kwimba yitavwi.

² Nukalambula mulambu wa kwocha kuli Mwene Zambi: chimbembe wa kuji umuwika, ni kuji a panga umuwika, ni makuji a panga shimbiali a mwaka umuwika, waze keeshi kapalia; kuuli mulambu wa lupembo mubema yoze wakumuwahila.

³ Nukalambula mulambu wa mbuto wa wunga wakuchinga ni maji a olive: kilo jitatu hamwe ni chimbembe wa kuji, ni kilo jaali hamwe ni kuji a panga,

⁴ ni kilo yimuwika hamwe ni mwana panga mweswe.

⁵ Nukalambula nawa kuji a pembe umuwika ha mulambu wa milonga. Chenacho munukabemesa shili ya atu.

⁶ Wezenu ho milambu yino ku milambu ya kwocha ha tangwa litangu lia kakweji ni milambu ya mbuto, ni milambu ya kwocha ya tangwa ha tangwa hamwe ni ye mbuto yayo ni milambu ya vinyu. Milambu yino ya yakulia yili ni lupembo mubema yoze kakuwahila kuli Mwene Zambi.

Milambu ya Tangwa lia Kuwana ni Zambi

⁷ Ha tangwa lia muchikumi lia kakweji wa muchishimbiali, nukalikungulula ha kuwayila; kanda nukalia ho chibwe kulinga ho mulimo niumwe.

⁸ Nukalambula mulambu wa kwocha kuli Mwene Zambi: chimbembe umuwika wa kuji, ni kuji a panga umuwika, ni makuji a panga shimbiali a mwaka umuwika, waze keeshi kapalia. Mulambu uno kuuli wa lupembo mubema yoze unawahila kuli Mwene Zambi.

⁹ Nukalambula mulambu wa mbuto wa wunga wakuchinga ni maji a olive: kilo jitatu hamwe ni chimbembe wa kuji, ni kilo jaali hamwe ni kuji a panga,

¹⁰ ni kilo yimuwika hamwe ni mwana panga mweswe.

¹¹ Ku mulambu wa pembe wa kubemesa atu ku shili yo, ni milambu ya kwocha ya tangwa ha tangwa ya mbuto ni ya vinyu nukaweza ho kuji a pembe umuwika, kuuli mulambu wa milonga.

Milambu ya chiwanyino cha Yikulika

¹² Ha tangwa kumi ni lia muchitano lia kakweji wa muchishimbiali nukalikungulula ha kuwayila. Nukafunga chiwanyino chino ha matangwa shimbiali ha kulemesa Mwene Zambi, kanda nukalinga ho mulimo niumwe.

¹³ Ha tangwa litangu nukalambula mulambu wa yakulia kuli Mwene Zambi: yimbembe a kuji kumi ni atatu, ni makuji a panga aali, ni makuji a panga kumi ni awana a mwaka umuwika, waze keeshi kapalia. Mulambu uno kuuli wa lupembo mubema yoze unawahila kuli Mwene Zambi.

¹⁴ Nukalambula mulambu wa mbuto, ni wa wunga wa kuchinga ni maji a olive: kilo jitatu hamwe ni kuji a ngombe mweswe, ni kilo jaali hamwe ni kuji a panga mweswe,

¹⁵ ni kilo yimuwika hamwe ni mwana panga mweswe, hamwe ni vinyu ya mulambu yize aanechi.

¹⁶ Nukalambula nawa kuji a pembe ngwe mulambu wa mulonga. Nukaweza ho mlambu yino ku mulambu wa kwocha wa tangwa ha tangwa ya mbuto ni ya vinyu yawo.

¹⁷ Ha tangwa lia muchaali nukalambula yimbembe a kuji kumi ni aali, ni makuji a panga aali, ni makuji a panga kumi ni awana a mwaka umuwika waze keeshi kapalia.

^18-19 Nukaalambula ngwe chize nwalambwile milambu yikwo ya tangwa litangu.

²⁰ Ha tangwa lia muchitatu nukalambula yimbembe a kuji kumi ni umuwika, ni makuji a panga aali, ni makuji a panga kumi ni awana a mwaka umuwika, waze keeshi kapalia.

^21-22 Nukaalambula ngwe chize nwalambwile milambu yikwo ya tangwa litangu.

²³ Ha tangwa lia muchiwana nukalambula yimbembe a kuji kumi, ni kuji a panga aali, ni makuji a panga kumi ni awana a mwaka umuwika, waze keeshi kapalia.

^24-25 Nukaalambula ngwe chize nwalambwile milambu yikwo ya tangwa litangu.

²⁶ Ha tangwa lia muchitano nukalambula yimbembe a kuji livwa, ni kuji a panga aali, ni makuji a panga kumi ni awana a mwaka umuwika, waze keeshi kapalia.

^27-28 Nukaalambula ngwe chize nwalambwile milambu yikwo ya tangwa litangu.

²⁹ Ha tangwa lia muchisambano nukalambula yimbembe a kuji nake, ni kuji a panga aali, ni makuji a panga kumi ni awana a mwaka umuwika, waze keeshi kapalia.

^30-31 Nukaalambula ngwe chize nwalambwile milambu yikwo ya tangwa litangu.

³² Ha tangwa lia muchishimbiali nukalambula yimbembe a kuji shimbiali, ni kuji a panga aali, ni makuji a panga kumi ni awana a mwaka umuwika waze keeshi kapalia.

^33-34 Nukaalambula ngwe chize nwalambwile milambu yikwo ya tangwa litangu.

³⁵ Ha tangwa lia muchinake nukakunguluka ha kuwayila, kanda nukalinga ho mulimo niumwe.

³⁶ Nukalambula mulambu wa kwocha kuli Mwene Zambi: chimbembe wa kuji umuwika, ni kuji a panga umuwika, ni makuji a panga shimbiali a mwaka umuwika, waze keeshi kapalia; kuuli mulambu wa yakulia.

^37-38 Nukaalambula ngwe chize nwalambwile milambu yikwo ya tangwa litangu.

³⁹ Yino ye Shimbi hakutwala ku milambu ya kwocha, ni ya mbuto, ni ya vinyu, ni milambu ya kulivwa, ni Zambi yize chatamba kulambula kuli Mwene Zambi ha yiwanyino yenu. Milambu yino nukayiwezela ku milambu ya yilakenyo ni ku milambu ya kuzanga chenu.

⁴⁰ Mba Mose yalumbunwina Aisraele yuma yeswe yize amwambile kuli Mwene Zambi.