Kwalula 28 - Mukanda Wa Zambi 1970

Milambu ya tangwa ha tangwa

¹ Mwene Zambi yambila Mose,

² hanga alweze Aisraele ha kulambula milambu ya yakulia ha shimbu liayo yize yinamuwahila.

³ Yino yili milambu ya yakulia yize chatamba kulambula ku meso ja Mwene Zambi, milambu ya kwocha ya tangwa ha tangwa, makuji a panga aali a mwaka umuwika waze keeshi kapalia.

⁴ Panga mutangu ukamulambula ha chichamene, wa muchaali ha chingoloshi.

⁵ Hamwe ni milambu yize, ukalambula nawa kilo yimuwika ya wunga, wakuchinga ni maji abema a olive.

⁶ Kuuli mulambu wa tangwa ha tangwa awoche uweme. Uli mulambu uze aliangile kulambula ha mulundu, wa Sinai ngwe mulambu wa yakulia, hanga lupembo mubema awahile kuli Mwene Zambi.

⁷ Ukalambula mulambu wa vinyu hamwe ni panga mutangu; ha chilumbilo uzujila ho litro limuwika.

⁸ Ha chingoloshi ukalambula mwana panga wa muchaali ngwe chize walambulanga wa chichamene hamwe ni vinyu. Newo nawa uli mulambu wa yakulia, lupembo wawo kakuwahila kuli Mwene Zambi.

Mulambu wa tangwa lia kuhwima

⁹ Ha tangwa lia kuhwima makalambula milambu yino yitatu: makuji a panga aali a mwaka umuwika waze keeshi kapalia, ni mulambu wa mbuto kilo ja kanda nukawunga jaali wa kuchinga ni maji a olive, ni mulambu wa vinyu.

¹⁰ Mulambu uno wa kwocha chatamba kuulambula ha tangwa lieswe lia kuhwima ni kuweza ho mulambu wa tangwa ha tangwa ni ye vinyu yawo.

Mulambu wa tangwa litangu lia kakweji

¹¹ Ha kubutuka cha kakweji mweswe nukalambula mulambu kuli Mwene Zambi: yimbembe aali a kuji, ni kuji a panga umuwika, ni makuji a panga shimbiali a mwaka umuwika, waze keeshi kapalia.

¹² Muze munukunjika milambu ya mbuto, nukalambula wunga wakuchinga ni maji a olive: kilo jitatu hamwe ni kuji mweswe wa ngombe, kilo jaali hamwe ni kuji a panga,

¹³ kilo yimuwika hamwe ni mwana panga mweswe. Milambu yino ya kwocha yili ya yakulia, lupembo wayo mubema kakuwahila kuli Mwene Zambi.

¹⁴ Ha kulambula kuji a ngombe, zuzenu litro jaali ja vinyu ku chilumbilo, ha kulambula kuji a panga litro yimuwika ni Chipinji, ha kulambula mwana panga mweswe litro yimuwika. Yino ye Shimbi ya milambu ya kwocha ya ha tangwa litangu lia kakweji mweswe wa mwaka.

¹⁵ Mulambu uze wa kwocha ni wa vinyu wa tangwa ha tangwa, wezenu ho kuji a pembe ha mulambu wa mulonga.

Milambu ya chiwanyino cha Mbolo Yize Kuyishi Yitumbo

¹⁶ Chiwanyino cha Kubalika cha kulemesa Mwene Zambi nukachilinga ha tangwa kumi ni lia muchiwana ha kakweji mutangu.

¹⁷ Ha tangwa kumi ni lia muchitano chiwanyino muchikabutuka chize muchikabwa cha matangwa shimbiali. Ha matangwa waze nukalia lume mbolo yize kuyishi yitumbo.

¹⁸ Ha tangwa litangu lia chiwanyino chatamba kulikungulula ha kuwayila, kanda nukalinga ho mulimo niumwe.

¹⁹ Nukalambula mulambu wa kwocha: yimbembe aali a kuji, ni makuji a panga shimbiali a mwaka umuwika waze keeshi kapalia; kuuli mulambu wa yakulia kuli Mwene Zambi.

²⁰ Nukalambula mulambu wa mbuto wa wunga wa kuchinga ni maji a olive: kilo jitatu hamwe ni kuji a ngombe mweswe, ni kilo jaali hamwe ni kuji a panga,

²¹ ni kilo yimuwika hamwe ni mwana panga mweswe.

²² Nukalambula nawa kuji a pembe umuwika wa mulambu wa milonga. Chenacho munukabemesa shili ya atu.

²³ Wezenu ho mulambu uno ku milambu ya kwocha ya tangwa ha tangwa.

²⁴ Nukalinga chizechene ha matangwa shimbiali muze munukalambula mulambu wa yakulia kuli Mwene Zambi. Kuuli lupembo mubema yoze mamuwahila. Wezenu ho ku milambu ya kwocha ni ya vinyu ya tangwa ha tangwa.

²⁵ Ha tangwa lia muchishimbiali nukalikungulula ha kuwayila, kanda nukalinga ho mulimo niumwe.

Milambu ya chiwanyino cha Kubatula Mbuto

²⁶ Ha tangwa litangu lia chiwanyino cha Kubatula Mbuto, muze munukalambula Mwene Zambi milambu ya mbuto yaha, chaatamba kulikungulula ha kuwayila, kanda nulinga ho mulimo niumwe.

²⁷ Nukalambula, mulambu wa kwocha ngwe lupembo yoze mawahila kuli Mwene Zambi: yimbembe aali ni makuji a panga shimbiali a mwaka umuwika, waze keeshi kapalia.

²⁸ Nukalambula mulambu wa mbuto wa wunga wa kuchinga ni maji a olive: kilo jitatu hamwe ni kuji a ngombe mweswe, ni kilo jaali hamwe ni kuji a panga,

²⁹ ni kilo yimuwika hamwe ni mwana panga mweswe.

³⁰ Nukalambula nawa kuji a pembe, kuuli mulambu wa milonga. Chenacho munukabemesa atu ku shili yo.

³¹ Wezenu ho milambu yino ni mulambu wa vinyu ku milambu ya kwocha ni ya mbuto ya tangwa ha tangwa.