Kwalula 27 - Mukanda Wa Zambi 1970

Ana ja Zelofehade a mapwo

¹ Mala, ni Noa, ni Hogra, ni Milka, ni Tirza, te ana ja Zelofehade a mapwo, mwana wa Hefere, mwana wa Gileade, mwana wa Makire, mwana wa Manase, mwana wa Josefe.

² No yaaya yaamana ku meso ja Mose, ni hako Eleazare, ni akwa lutwe, ni Chikungulwila cheswe ku chikolo cha zuwo lia Zambi lia makubu, yaamba ngwo:

³ “Yetu, tata mu puya afwilile te keshi kwenyi ana a malunga. Kabwile ko kwenyi mukachi ka mbunga ya Kora, yoze walimikine ni Mwene Zambi, yaya mumu ha shili yenyi mwene.

⁴ Kuma, mumu tata kabwile ko ni ana a malunga, kashika chatamba kuchiza jina lienyi mukachi ka Aisraele, nyi? Ni yetu twehenu kama chihinga mukachi ka usoko wa tata.”

⁵ Mose yahetesa chihula chino ku meso ja Mwene Zambi.

⁶ Neye yamwamba ngwenyi:

⁷ “Maliji ja ana ja Zelofehade kaali amwenemwene, chaatamba kwaha chihinga mukachi ka usoko wa tato. Tayiza wahe chihinga cho.

⁸ Lweza Aisraele ngwe mweswawo mafwa nyi kahichikile mwana wa lunga, mwanenyi wa pwo akatambule chihinga cha tato.

⁹ Nyi ngwe keshi mwana wa pwo, anakwo atambule chihinga cha usoko wo.

¹⁰ Nyi ngwe keshi anakwo, anakwo ja tato akachihinga.

¹¹ Nyi ngwe keshi anakwo ni a natu, usoko wenyi akwo waze asala ho akaachihinga. Aisraele chaatamba kufunga Shimbi yino ngwe chize yami Mwene Zambi nakulwezele.”

Zambi yatongola Yoshua kusalakana Mose

¹² Mwene Zambi yalweza Mose ngwenyi: “kanduka ha mulundu wa Abarime utale chifuchi chize hinahana kuli Aisraele.

¹³ Muze hiwachimona, mba muufwa kwe, ngwe chize afwile yayenu Arone,

¹⁴ mumu yenu eswe aali nwakolemene Shimbi yami mu puya ya Zine. Muze Chikungulwila cheswe anguketekele ku Meriba, yinulituna ndundo ja ulinange wami ku meso jo.” (Meriba lili shima lia meya a ku Kadeshe mu puya ya Zine.)

¹⁵ Mose yalemba ngwenyi:

¹⁶ “Mwene Zambi, chishina cha mwono weswe, ngunaliumbu, tongola mutu yoze mahasa kusongwela Chikungulwila,

¹⁷ yoze mahasa kwasongwela mu jita, hanga Chikungulwila che keechi kubwa ngwe mapanga waze keeshi kafunga.”

¹⁸ Mwene Zambi yalweza Mose ngwenyi: “Anda Yoshua mwana wa Nune, lunga wa mana, umuse kwoko ha mutwe.

¹⁹ Umutwale kulutwe lia hako Eleazare ni kulutwe lia Chikungulwila cheswe, hanga umwambulule ku meso ja atu eswe ngwe, mwe swana (pinga) ye.

²⁰ Mwehe chihinga cha chiyulo che, mba Chikungulwila cheswe cha Aisraele akamwononokene.

²¹ Makashachila hali hako Eleazare yoze makamuhulila ubatwilo wa Urime ni Tumime. Chenacho Eleazare masongwela Yoshua ni Chikungulwila cheswe cha Aisraele mu yuma yeswe.”

²² Mose yalinga chize amwambile Mwene Zambi. Yatwala Yoshua ku meso ja hako Eleazare ni Chikungulwila cheswe,

²³ yasa kwoko ha mutwe wa Yoshua ni kumulweza kuli atu ngwenyi: “Mwenawu manguhinga.”