Kwalula 26 - Mukanda Wa Zambi 1970

Mose yalula Aisraele chisuho cha muchaali

¹ Muze chipuho hichahwa Mwene Zambi yambila Mose ni Eleazare mwana wa Arone ngwenyi:

² “Alulenu majiko eswe a Chikungulwila cheswe cha Aisraele, chize kuli malunga a miaka makumi aali ndoo kuli makulwana waze anatela kuya ku jita.”

^3-4 Mose ni Eleazare yoononoka, yaakungulula malunga eswe waze haakola, yaakungulwila mu chana cha Moabe mu sali lia lwiji Yordau hatalanganyi ni Yeriku. Wano e Aisraele waze atuhukile mu chifuchi cha Egiptu.

⁵ Vungu lia Rubene (Rubene mwe wabwile mwana mutangu wa Yakoba): majimo ja Hanoke, ni Palu,

⁶ ni Hezrone, ni Karmi.

⁷ Majimo wano malunga kwoka cho te 43,730.

⁸ Vungu lia Palu te Eliabe,

⁹ ni ana jenyi a malunga Nemuele, ni Datane, ni Abirame. (Datane ni Abirame e atongwele kuli Chikungulwila. Yaalimika ni Mose ni Arone, yaalichinga ni mbunga ya Kora muze alimikine ni Mwene Zambi.

¹⁰ Hashi yihazazuluka yihaamina. No yaafwa hamwe ni Kora ni mbunga yenyi muze kahia kwonwene malunga 250. Sango jo yijikanyamisa Aisraele.

¹¹ Alioze ana ja Kora a malunga kaanongesele ko lia kulu.)

¹² Vungu lia Simeone: majimo ja Nemuele, ni Jamine, ni Jakine,

¹³ ni Zera, ni Shaule.

¹⁴ Majimo wano malunga kwoka cho te 22,200.

¹⁵ Vungu lia Gade: majimo ja Zefone, ni Hagi, ni Shuni,

¹⁶ ni Ozeni, ni Eri,

¹⁷ ni Arode, ni Areli.

¹⁸ Majimo wano malunga kwoka cho te 40,500.

^19-21 Vungu lia Yuda: majimo ja Shela, ni Pereze, ni Zera, ni Hezrone, ni Hamule. (Aali a kuli ana ja Yuda a malunga, Ere ni Onane, yaafwila mu chifuchi cha Kanana.)

²² Majimo wano malunga kwoka cho te 76,500.

²³ Vungu Ka Isakare: majimo ja Tola, ni Puwa,

²⁴ ni Jashube, ni Shimrone.

²⁵ Majimo wano malunga kwoka cho te 64,300.

²⁶ Vungu lia Zabulone: majimo ja Serede, ni Elone, ni Jalele.

²⁷ Majimo wano malunga kwoka cho te 60,500.

²⁸ Vungu lia Josefe, tato ya ana aali a malunga, Manase ni Efraime.

²⁹ Vungu lia Manase: Makire mwana wa Manase te tato ya Gileade. Majimo ja Gileade:

³⁰ Jezere, ni Heleke,

³¹ ni Asriele, ni Shekeme,

³² ni Shemida, ni Hefere.

³³ Zelofehade mwana wa Hefere te keshi ana a malunga, alioze shina ana a mapwo wika. Majina jo: Mala, ni Noa, ni Hogla, ni Milka, ni Tirza.

³⁴ Majimo wano malunga kwoka cho te 52,700.

³⁵ Vungu lia Efraime: majimo ja Shutela, ni Beshere, ni Tahane.

³⁶ Shutela te kashakulu ka jimo lia Erane.

³⁷ Majimo wano malunga kwoka cho te 32,500. Wano e majimo ja Josefe.

³⁸ Vungu lia Benjamine: majimo ja Bela, ni Ashbele, ni Ahirame,

³⁹ ni Shefufame, ni Hufame.

⁴⁰ Bela te kashakulu ka majimo ja Arde ni Namane.

⁴¹ Majimo wano malunga kwoka cho te 45,600.

⁴² Vungu lia Dane: jimo lia Hushime,

⁴³ lize te likwete malunga 64,400.

⁴⁴ Vungu lia Ashere: majimo ja Imna, ni Ishvi, ni Beria.

⁴⁵ Beria te kashakulu ka majimo ja Hebere ni Malkiele.

⁴⁶ Ashere te kakwete mwana wa pwo jina lienyi Sera.

⁴⁷ Majimo wano malunga kwoka cho te 53,400.

⁴⁸ Vungu lia Naftali: majimo ja Jazele, ni Guni,

⁴⁹ ni Jezere, ni Shileme.

⁵⁰ Majimo wano malunga kwoka cho te 45,400.

⁵¹ Malunga mu Israele kwoka cho te 601,730.

⁵² Mwene Zambi yambila Mose ngwenyi:

⁵³ “Tetela mavungu wano chifuchi nikulita ni majimo jo.

^54-56 Teta chifuchi ha kuta chela. Hana chifuchi chinene ku vungu linene ni chifuchi chikepe ku vungu likepe.”

⁵⁷ Vungu lia Levi: majimo ja Gershone, ni Kohate, ni Merari.

⁵⁸ Majiko jo: Libini, ni Hebrone, ni Mali, ni Mushi, ni Kora. Kohate, yasema Amrame.

⁵⁹ Pwo lia Amrame jina lienyi te Jokebede, mwana wa Levi, yoze wasemukinyine mu chifuchi cha Egiptu. Yasema nenyi ana a malunga aali, Arone ni Mose, ni mwana wa pwo umuwika jina lienyi Miriame.

⁶⁰ Arone yabwa ni ana awana a malunga, Nadabe, ni Abihu, ni Eleazare, ni Itamare.

⁶¹ Nadabe ni Abihu yaafwa muze alambwile kahia keka ku meso ja Mwene Zambi.

⁶² Alevi, malunga yaabwa 23,000 chize kuli akwa kakweji umuwika ndoo kuli makulwana. Kaachingile ko hamwe ni Aisraele mumu ayo kaatambwile ko chihinga hamwe ni Aisraele.

⁶³ Wano eswe, Mose ni Eleazare aalwile muze abwile mu chana cha Moabe mu chikulo cha lwiji Yordau ha talanganyi ni Yeriku.

⁶⁴ Kumwabwile ko chibwe mutu umuwika yoze alwile kuli Mose ni Arone ha kwalula chize chitangu mu puya ya Sinai.

⁶⁵ Mwene Zambi te hanambe kulu ngwenyi, eswe maakafwila mu puya, shina lume Kaleba mwana wa Jefune ni Yoshua mwana wa Nune eno maakaheta ko.