Kwalula 25 - Mukanda Wa Zambi 1970

Aisraele ku Peore

¹ Muze Aisraele haajika musumba mu chikulo cha Akasia, malunga yaabutuka kulimona ni mapwo ja Amoabe waze abwile ko.

² Mapwo waze yaatambieka Aisraele ku milambu ya zambi yo; Aisraele yaahaha, yaawayila zambi Bale wa ku Peore.

³ Mba Mwene Zambi yaatenukina,

⁴ yambila Mose ngwenyi: “Twala miata ja Aisraele eswe waze haangukolema, waashihe ku meso ja atu eswe, mba chichi kutenukina nawa atu.”

⁵ Mose yambila miata ngwenyi: “Mweswe wa kuli yenu ashihe mutu mweswe wa ko vungu lienyi yoze wakukombelela Bale wa ku Peore.”

⁶ Umwe lunga Kaisraele yanjila ni umwe pwo mukwa Midiane mu zuwo lienyi ku meso ja Mose ni chikungulwila cheswe, shimbu lize te atu maachilila mbimbi ku chikolo cha zuwo ha Mwene Zambi.

⁷ Muze Finehase, mwana wa Eleazare mujikulu wa Arone, hachimona, yakatuka mu Chikungulwila, yanda kunga,

⁸ yakaula mutu yoze ni mwe pwo ku zuwo lio, yaatuwatuwa kunga eswe aali. Muze hachilinga mba chipuho yichihwa hali Aisraele,

⁹ alioze te hichashiha kulu atu 24,000.

¹⁰ Mwene Zambi yambila Mose ngwenyi:

¹¹ “Mumu ha chize Finehase halinga chichi kwonona nawa atu ni utenu wami. Iye halituna kuwayila zambi weka shina yami, kashika chichi kunongesa Aisraele mu ufwatulo wami.

¹² Mulweze ngwe, ngunakolesa nenyi Usendo uze muulinduluka ndoo ku miaka yeswe.

¹³ Iye ni vungu lienyi maabwa mahako ndoo ku miaka yeswe, mumu halituna Aisraele kuwayila mazambi eka, hahakwila Aisraele ha mulonga wo.”

¹⁴ Kaisraele yoze ashihile hamwe ni mukwa Midiane jina lienyi Zimri mwana wa Salu, mukwa lutwe wa limwe jiko ha ku vungu ha Simeone.

¹⁵ Pwo jina lienyi Kozbi, mwana wa Zure, te mwata wa ku mbunga ya majimo ja Amidiane.

¹⁶ Mwene Zambi yambila Mose ngwenyi:

¹⁷ “Asenu jita ni Amidiane ni kwonona,

¹⁸ mumu ha yibi yize anulingilile muze anwongele ku Peore, ni mumu hali Kozbi, yoze ashihile ha matangwa ja chipuho ku Peore.”