Kwalula 24 - Mukanda Wa Zambi 1970

¹ Balame, muze hanyingika ngwenyi Mwene Zambi kanafupu kuwahisa Aisraele, hi kafupile ko nawa yinyingi ngwe hatangu. Yatala ku puya,

² yamona Aisraele haajika misumba yo nikulita ni vungu ni vungu. Mwiku wa Zambi yiuhulumuka muli iye,

³ yahanjika munanyi ngwenyi: “Maliji ja Balame mwana wa Beore, maliji ja mutu yoze unamono zwalala,

⁴ yoze unevu yize Zambi anahanjika. Ngunamono mu Usolwelo Zambi Mukwa Ndundo jeswe.

⁵ Yakoba, mazuwo jenu a makubu cho kubema,

⁶ Aisraele misumba yenu cho kuwaha! Yinalilongo ngwe mingaji, hanji ngwe minda ku mbumbulu ya lwiji, ngwe yilombo yize atumbile Mwene Zambi, hanji ngwe mitondo ya sedru ku mbumbulu ya lwiji.

⁷ Mu milondo yo meya kaanasupwoka, maakatumba mbuto ya mu minda yize yili ni meya anji. Mwanangana wo makabwa munene kuhiana Agage, wanangana wenyi kumuukatanda sali ni sali.

⁸ Zambi hanaatuhwisa mu Egiptu; Aisraele kaali ni tachi ngwe kuji a mbau. Kaanamanununa akwa kole jo, kaanabubu yifwaha yo, kaanamakwona mivu yo.

⁹ Aisraele kaali ngwe kuji a tambwe yoze unautama, ngwe chihwo cha tambwe, iya mahasa kumuhindwisa? Mweswawo mawahisa Aisraele neye kumaamuwahisa, mweswawo mashinga Aisraele neye kumashingiwa.”

¹⁰ Balake yatenukina Balame; yaamba moko bwaa ngwenyi: “Ngunakutambika ha kushinga akwa kole jami, alioze yena hiwawahisa yisuho yitatu.

¹¹ Katuka yako ku mahie! Nalakenyene ku kufweta kanawa, alioze Mwene Zambi kasolo.”

¹² Balame ngwenyi: “Nalwezele tunganda waze wangutuminyine ngwami,

¹³ chibwe ungwehe prata ni oru yeswe ya mu zuwo lie lia wanangana, chahashile kukolema maliji a Mwene Zambi ha kulinga chimwe Chuma ukawami. Munguhanjika lume chize Mwene Zambi mangulweza.”

Balame yahanjika munanyi wa kusula

¹⁴ Balame yambila Balake ngwenyi: “Haliabwila ngunahiluka kuli atu jami, alioze shimbu kanda nguchiya, ngunakutoweza chize Aisraele maakalinga kuli atu je.”

¹⁵ Yahanjika munanyi ngwenyi: “Maliji ja Balame mwana wa Beore, maliji ja mutu yoze unamono zwalala,

¹⁶ yoze unevu yize Zambi anahanjika, ni kutambula yinyingi yize yineza kuli Zambi Mwilu Mwahiana, ni kumona mu Usolwelo, usolwelo wa Zambi Mukwa Ndundo Jeswe.

¹⁷ Ngunatale kulutwe, ngumone vungu lia Israele. Umwe mwanangana, ngwe lutongonoshi wa kutemuka, makavumbuka mu vungu lia Israele; ngwe mutumbu yoze unakatuka kuli Israele. Makalamba miata ja Moabe, makalimbwila Asete eswe.

¹⁸ Makakumba akwa kole jenyi mu Edome, makazuka chifuchi cho, muze Aisraele maakanyongonona ni kukumba.

¹⁹ Mukwa kuyula makatuka ku vungu lia Yakoba, makonona masalila eswe.”

²⁰ Mba mu Usolwelo Balame yamona Aamaleke, yahanjika munanyi uno ngwenyi: “Aamaleke tachi abwile najo kuhiana mavungu akwo eswe, alioze ku songo maakatoka ku miaka yeswe.”

²¹ Mu Usolwelo Balame yamona Akene, yahanjika munanyi ngwenyi: “Muma lie muze watwama mwa uhwimino, ngwe chaswa cha kutunga ha mulundu.

²² Alioze yenu Akene maakanwonona, muze Aasuria maakanumbata mu ufunge.”

²³ Balame yahanjika munanyi uno ngwenyi: “Atu waze anakunguluka ku sali lia norde, aya?

²⁴ Mato maakakatuka ku hongo lia Shipre, maakakunga Aasuria ni Aebere, alioze ayo maakatoka nawa ku miaka yeswe.”

²⁵ Mba Balame yakatuka, yahiluka ku mahienyi, Balake neye yaya mu jila yeni.