Kwalula 23 - Mukanda Wa Zambi 1970

¹ Yambila Balake ngwenyi: “Ngutungile kama yilumbilo shimbiali hano, ngunehene makuji a ngombe shimbiali ni a mapanga shimbiali.”

² Balake yalinga ngwe chize amwambile, mba iye ni Balame yaalambula kuji a ngombe ni kuji a panga ha chilumbilo ni chilumbilo.

³ Balame yambila Balake ngwenyi: “Mana hano hehi ni mulambu we wakwocha, shimbu yami ngunayi ni kutala hanji Mwene Zambi matayiza kulitakana ni yami nyi ka. Mba mungukwambulwila yeswe yize mangulweza.” Chenacho ayile ukawenyi ha mulundu,

⁴ mba Zambi yamubatwiza. Balame yamba ngwenyi: “Hinatunga yilumbilo shimbiali ni hinalambula kuji a ngombe ni kuji a panga ha chilumbilo ni chilumbilo.”

⁵ Mwene Zambi yalweza Balame chize chatamba kwamba, yamuhilwisa kuli Balake ha kumulweza maliji jenyi.

⁶ Neye yahiluka, yawana Balake te kanamana ku mulambu wenyi wa kwocha hamwe ni miata eswe a Moabe.

⁷ Balame yahanjika munanyi ngwenyi: “Balake mwanangana wa Moabe hanangutambika chize ku Siria, ku milundu ya ku chivumbuko ‘Tweya unguhanjikile, ungushingile Aisraele.’

⁸ Ngwe kuchi munguhasa kushinga chize Zambi kashingile, hanji kukumika yoze Mwene Zambi kakumikine?

⁹ Hano ngunatwama ha milundu, ngunahase kwamona, ngunahase kwatala. Kulili vungu lize atwama ukawo; kaananyingika ngwo, kaali atu waze Zambi hanaawahisa kuhiana mavungu akwo.

¹⁰ Vungu lia Israele kaali ngwe fufuta, unji wo kaahashile kwalula. Ngufwe kama ngwe akwa ululi; songo liami likabwe ngwe lia ayo.”

¹¹ Mba Balake yambila Balame ngwenyi: “Chika chino Wangulinga? Nakutambikile kuno ha kushinga akwa kole jami, alioze yena hiwawahisa.”

¹² Balame ngwenyi: “Kuma kuchangutambile kuhanjika yize Mwene Zambi mangulweza nyi?”

Balame yahanjika munanyi wa muchaali

¹³ Mba Balake yambila Balame ngwenyi: “Tatuye sali likwo kuze mumwena shina amwe Aisraele. Ungushingiloo kama!”

¹⁴ Yamutwala ku munda wa Zofime ha mulundu wa Pisga. Neko yatunga nawa yilumbilo shimbiali, yalambwila kuji a ngombe ni kuji a panga ha chilumbilo ni chilumbilo.

¹⁵ Balame yambila Balake ngwenyi: “Mana hano hehi ni mulambu we wa kwocha, yami ngunayi akuze ni kubatwiza Zambi.”

¹⁶ Mwene Zambi yabatwiza Balame, yamulweza chize chatamba kwamba, yamuhilwisa kuli Balake ha kumulweza maliji jenyi.

¹⁷ Neye yahiluka, yawana Balake te kanamana ku mulambu wenyi wa kwocha hamwe ni miata ja Moabe. Balake yahula chize Mwene Zambi hamba,

¹⁸ mba Balame yahanjika munanyi ngwenyi: “Tweya, Balake mwana wa Zipore, ubanjike yize ngunahanjika.

¹⁹ Zambi keshi ngwe atu waze akuhanjika mahuza; keshi ngwe mwana mutu yoze wakwalumiona mbunge yenyi. Cheswacho halakenya kumachilinga, chize mahanjika muchilingiwa.

²⁰ “Hangwaha Shimbi ya kuwahisa. Muze Zambi hawahisa, chahashile kwalumuna.

²¹ Ngunamono ngwami, Aisraele keechi kabwa ni lamba ni luyinda. Mwene Zambi yo kali hamwe no. Aisraele kaakwamba ngwo: “Zambi kali mwanangana wetu.”

²² Zambi hanaatuhwisa mu chifuchi cha Egiptu; hali ayo kakuhamika ngwe kuji a mbau.

²³ Kuli Aisraele chibwe wanga chibwe ngombo kuyichi kulinga nichimwe, unalikatalisa tuhu. Atu kumaahanjika hakutwala kuli Aisraele ngwo: “Talenu chize Zambi halinga!”

²⁴ Vungu lia Israele kaali ngwe chihwo cha tambwe: ngwe kuji a tambwe yoze keshi kuutama ndoo muze halia yifwo, ndoo muze hanwa manyinga ja kashitu yoze ashihanga.”

²⁵ Mba Balake yambila Balame ngwenyi: “Hiwalituna ha kushinga Aisraele, alioze kanda wawahisa!”

²⁶ Balame ngwenyi: “Chakulwezele ngwami, Changutamba kwamba yuma yize Zambi mangulweza, nyi?”

Balame yahanjika munanyi wa muchitatu

²⁷ Balake ngwenyi: “Tatuye, ngukutwale sali likwo. Hanji Zambi matayiza kama kungushingiloo.”

²⁸ Mba yatwala Balame helu lia mulundu wa Peore ha talanganyi ni puya.

²⁹ Balame yambila Balake ngwenyi: “Ngutungile kama yilumbilo shimbiali hano, ngunehene makuji a ngombe shimbiali ni makuji a panga shimbiali.”

³⁰ Balake yalinga ngwe chize amwambile, yalambula kuji a ngombe ni a panga ha chilumbilo ni chilumbilo.