Kwalula 22 - Mukanda Wa Zambi 1970

Mwanangana wa Moabe yatambika Balame

¹ Aisraele yaakatuka yaajika musumba mu yana ya Moabe, ku chivumbuko cha Yordau ku Yeriku.

² Muze mwanangana Balake mwana wa Zipore, wa ku chifuchi cha Moabe, hevwa yize Aisraele haalinga kuli Aamore ni kwoka cha Aisraele,

³ iye ni atu jenyi eswe yaalekumuka.

⁴ Amoabe yaambila miata ja Amidiane ngwo: “Ha shimbu likepe kumoonona yuma yetu yeswe, ngwe chize kuji a ngombe akulia yambu.” Mba mwanangana Balake

⁵ yatuma tunganda ha kutambika Balame mwana wa Beore, yoze te watwama ku limbo lia Petore hehi ni lwiji Ufrateze mu chifuchi cha Amau. E tunganda yaamulweza maliji ja mwanangana ngwo: “Mbunga yinene ya limwe vungu anakatuka mu chifuchi cha Egiptu haalitanda mu chifuchi cheswe, kaanazange kutukumba.

⁶ Kaanatuhiana kwoka, kashika tweya ungushingiloo kama. Hanji mutuhasa kwakumba ni kwahanga mu chifuchi. Ngunanyingika ngwami, atu waze wakuwahisa, kaakuwaha; ni waze wakushinga, kaakushingiwa.”

⁷ Miata ja Moabe ni Midiane yaatwala sanga lia kutaha nalio kuli Balame, yaamwambulwila maliji ja mwanangana Balake.

⁸ Balame yaamba ngwenyi: “Bombenu, mba hamene mungukanulumbunwina yize Mwene Zambi mangulweza.” Mba miata ja Moabe yaabomba maha Balame.

⁹ Zambi yeza nikuhula Balame ngwenyi: “Malunga waze ali ku mahie kaali aya?”

¹⁰ Balame ngwenyi: “Mwanangana Balake wa Moabe mwe waatuma ha kungulweza,

¹¹ ngwo: ‘Limwe vungu anakatuka ku chifuchi cha Egiptu, haalitanda mu chifuchi cheswe.’ Kaanazange ngumushingiloo, mba ahase kwasa no jita ni kwahanga.”

¹² Zambi yambila Balame ngwenyi: “Kanda uya no chibwe kanda ushinga Aisraele, mumu hingunaawahisa.”

¹³ Ha chichamene Balame yaya kuli tunganda waze atumine Balake, yaamba ngwenyi: “Hilukenu ku mahienu. Mwene Zambi halituna kuya hamwe ni yenu.”

¹⁴ Mba yaahiluka kuli Balake ni kumulweza ngwo: “Balame halituna kwiza hamwe ni yetu.”

¹⁵ Mba Balake yatuma miata anji kuhiana, alemu kuhiana waze atangu.

¹⁶ No yaaya kuli Balame ni maliji wano ngwo: “Nalemba mwane, Chuma nichimwe kanda chinukwika ha kwiza kuli yami!

¹⁷ Nalemba mwane, tweyenu mungununangamisa kuhiana, cheswacho munwamba munguchilinga. Tweyenu nungushingile kama atu wano.”

¹⁸ Alioze Balame yaakumbulula ngwenyi: “Chibwe Balake angwehe prata ni oru yeswe ya mu zuwo lienyi lia wanangana, yami chahashile ku kolema maliji ja Mwene Zambi yami chibwe hakepe.

¹⁹ Alioze ngunanulweze bombenu mwane, ngwe chize anakalinga akwenu, mba hanga ngunyingike chize Mwene Zambi mangulweza, munguya nyi ka.”

²⁰ Ha ufuku Zambi yeza kuli Balame yamwamba ngwenyi: “Atu wano nyi heeza ni kukusaka hanga uye no, alioze Ulinga lume chize mungukulweza.”

²¹ Mba ha chichamene Balame yalulika chimbulu chenyi yaya hamwe ni miata ja Moabe.

Balame ni chimbulu chenyi

²² Muze Balame halulika chimbulu chenyi nikuya hamwe ni ngamba jenyi aali, Zambi yamutenukina. Kanganda ka Mwene Zambi yamana mu jila ha kumukinda.

²³ Muze chimbulu hamona kanganda ka Mwene Zambi kanamana mu jila kanakwata mukwale mu kwoko lienyi, yakatuka mu jila yatalikisa mu minda. Balame yalamba chimbulu, yamutewulula ha kumutalikisa mu jila.

²⁴ Mba kanganda ka Mwene yamana mu jila mukachi ka minda yaali ya vinyu yikubwa chipanga cha mawe sali ni sali.

²⁵ Chimbulu ha kumona kanganda ka mwilu, yatumbuka, yabalakenya kulu lia Balame ku chipanga. Balame yamulamba nawa.

²⁶ Kanganda ka mwilu yaya nawa kulutwe, yamana homa hakepe haze chimbulu kechi kuhasa kubalikila ku chindume hanji ku chimeso.

²⁷ Ha chisuho chino, muze chimbulu hamona kanganda ka mwilu, yautama hashi. Balame yamutenukina yabutuka kumulamba ni lukanda wenyi.

²⁸ Mba Mwene Zambi yamwaha chimbulu maliji ja kuhanjika, yamba ngwenyi: “Mama! Kuchi nakulinga kama? Mumu yika hiwangulamba yisuho yino yitatu?”

²⁹ Balame ngwenyi: “Mumu hiwangupwisa chihepuke! Nyi ngwe nabwanga ni mukwale, kachi te nakushiha.”

³⁰ Chimbulu ngwenyi: “Yami hi nguli ko chimbulu che yoze wakwendela matangwa eswe, nyi? Tangwa likwo hingunakulingi cho nawa, nyi?” Balame ngwenyi: “Ka kevwe.”

³¹ Mba Mwene Zambi yalawisa meso ja Balame. Neye yamona kanganda ka mwilu te kanamana ni mukwale. Balame yafulamana.

³² Kanganda ka mwilu yamuhula ngwenyi: “Mumu yika walambila chimbulu che chichize yisuho yitatu? Yami najika jila ye, mumu te kuchatambile kuya wenyi uno.

³³ Alioze chimbulu che kangumonanga yangukondolwela yisuho yitatu. Nyi ngwe kachilingile, chamwenemwene kachi nakushiha lume haliabwila, chimbulu masala.”

³⁴ Balame ngwenyi: “Yami Havulumuna. Te Chanyingikine ngwami yena unamana mu jila ha kungukinda. Alioze haliabwila nyi Unanyongo ngwe, kuchalitele yami kuya, munguhiluka ku mahiami.”

³⁵ Alioze kanganda ka mwilu yamwamba ngwenyi: “Ka! yako hamwe ni atu wano, alioze uhanjika lume yize mungukulweza.” Mba Balame yaya hamwe ni miata ja Balake.

Balake yasambilila Balame

³⁶ Muze Balake hevwa ngwo Balame kaneza, yaya nikumubatwiza ku Are, limbo lize lili ku mbumbulu ya lwiji Amone ku njiza ya Moabe.

³⁷ Balake yambila Balame ngwenyi: “Mumu yika walitunyine kwiza muze nakutuminyine atu chisuho chize chitangu? Kafwa wanyongene ngwe, yami chichi kuhasa kukufweta mbongo jinji, nyi?”

³⁸ Balame ngwenyi: “Mba chejile, nyi? Alioze haliabwila, chiyulo chika nguli nacho? Munguhanjika lume chize Zambi mangulweza.”

³⁹ Mba Balame yaya hamwe ni Balake ku limbo lia Huzote.

⁴⁰ Kwenako Balake alambwilile ngombe ni mapanga, yahana yimwe yifwo kuli Balame ni kuli miata waze abwile hamwe no.

Balame yahanjika munanyi utangu

⁴¹ Muze hikwacha, Balake yakanduka hamwe ni Balame ku Bamote Bale, kwenako Balame amwenene Chihanda cha mbunga ya Aisraele.