Kwalula 21 - Mukanda Wa Zambi 1970

Aisraele yaakumba Akanana

¹ Muze mwanangana wa ku limbo lia Arade, mu chifuchi cha Kanana ku sali lia sude ya che chifuchi, hevwa ngwo, Aisraele kaanejilila ku jila ya Atarime, yaasa no jita, yaakwata amwe hakachi ko, yaaya no.

² Mba Aisraele yaalakenya Mwene Zambi ngwo: “Nyi mututayiza kukumba atu wano, kachi mutwakuwisa ni kububa membo jo.”

³ Mwene Zambi yeevwa, yaakwasa ha kukumba Akanana. Mba Aisraele yoonona Akanana liakulu hamwe ni e membo jo, yaaluka ho jina ngwo, Horma.

Kapela wa unengu

⁴ Aisraele yaakatuka ku mulundu wa Hore, yaatalikisa ku jila ya kuya ku kalunga lwiji Akaba, ni kujinga chifuchi cha Edome. Alioze mu jila atu yeevwa kubiha,

⁵ yaalimika ni Zambi ni Mose, yaalinyenga ngwo: “Mumu yika nwatutuhwishile mu chifuchi cha Egiptu hanga tufwile mu puya yino, muze kumushi yakulia ni meya? Yakulia yamokomoko hiyatusekela!”

⁶ Mba Mwene Zambi yatuma tupela a ulembe mukachi ka atu, yaasuma atu anji, no yaafwafwa.

⁷ Atu yeeza kuli Mose, yaamba ngwo: “Mala! Hitwavulumuna, hitwalimika ni Zambi ni yena Mose. Haliabwila lemba kuli Mwene Zambi achize tupela wano.” Mose yalembela atu Zambi,

⁸ Mwene Zambi yambila Mose afule kapela wa unengu amuzezeleke ha mutondo, hanga mweswawo matala kuli mwe kapela, mahinduka.

⁹ Mba Mose yafula kapela wa unengu, yamuzezeleka ha mutondo. Mweswe yoze aasumine nyi hatala kuli mwe kapela wa unengu yahinduka.

Chize ku mulundu wa Hore ndoo mu chikulo cha Amoabe

¹⁰ Aisraele yaaya yaasa musumba ku Obote.

¹¹ Muze haakatuka homa haze yaaya, yaasa musumba wo mu yikulo ya Abarime, mu puya, ku chivumbuko cha chifuchi cha Moabe.

¹² Yaakatuka ko, yaasa musumba ku chikulo cha Zerede.

¹³ Katu kwekuze yaasa musumba ku sali lia ku norde lia lwiji Arnone, mu puya yize yaheta ndoo ku chifuchi cha Aamore. Lwiji Amone te njiza hakachi ka Amoabe ni Aamore.

¹⁴ Kashika Mukanda wa Jita ja Mwene Zambi unambe ngwo: “…chihunda cha Wahebe mu chifuchi cha Sufa ni mu yikulo; lwiji Amone,

¹⁵ ni mihwahwa yize yakuya ku chihunda cha Are ni kunjiza ya Moabe.”

¹⁶ Mwakatuka ko yaaya kuma kuze te akuvuluka ngwo; Mashima, kuze Mwene Zambi alwezele Mose ngwenyi: “Kungulula atu, hanga ngwahe meya.”

¹⁷ Ha tangwa lize Aisraele yeemba mwaso uno ngwo: “Yenu mashima velwokenu; mba mutunuhalisa ni mwaso!

¹⁸ Lie shima, ana ja mianangana alifulile, ni miata ja atu; yaalifula ni lukanda wa wanangana ni kanda jo.” Aisraele yaakatuka ko, yaaya ku Matana.

¹⁹ Yaakatuka ko, yaaya ku Nahaliele. Mwakatuka ko yaaya ku Bamote.

²⁰ Katu kwekuze yaaya ku chikulo mu chifuchi cha Moabe, yaabalika ha mulundu wa Pisga, uze watala mu puya.

Aisraele yaakumba mianangana Sihone ni Oge

²¹ Hohene Aisraele yaatumina Sihone mwanangana wa Aamore, maliji ngwo:

²² “Tutayizenu mwane, tubalikile mu chifuchi chenu. Yetu ni ngombe jetu kutuchi kuhambuluka ni kunjila mu minda yenu ya mbuto, hanji ya vinyu, kutuchi kunwa meya mu mashima jenu. Mutukaula lume jila yinene ndoo ni muze mututuhuka mu chifuchi chenu.”

²³ Alioze Sihone kaatayijile ko Aisraele kubalikila mu chifuchi chenyi. Yakungulula tujita twenyi, yaaya ku Jahaze mu puya ha kwasa no jita.

²⁴ Alioze mu jita yize Aisraele yaashiha akwa kole jo anji, yaatambula chifuchi cho, chize ku lwiji Amone ndoo ku lwiji Jaboke ku norde, kulumbunuka ngwo, ndoo ku chifuchi cha Aamone. Alioze ku njiza ya Aamone yikubwa tujita anji.

²⁵ Chenacho Aisraele akumbile membo ja Aamore eswe, ni limbo lia Heshbone ni ye yihunda yalio yeswe, mba yaatwama mo.

²⁶ Heshbone lie limbo linene lia Sihone mwanangana wa Aamore, yoze walimikine ni mwanangana wa Moabe, ni watambwile chifuchi chenyi cheswe ndoo ku lwiji Amone.

²⁷ Kashika akwa miaso akwimba ngwo: “Tweyenu ku Heshbone, ku limbo lia mwanangana Sihone! Tutale chize analitungulula ni kulikolesa.

²⁸ Ku limbo lia Heshbone, ha miaka ya kunyima, tujita twa Sihone yaalundumuka ngwe milengi ya kahia; yoonona akwa limbo lia Are mu chifuchi cha Moabe ni miata waze te atwama hehi ni lwiji Amone.

²⁹ Lamba lienu Amoabe, akwa kukombelela Chemoshe! Zambi yenu hatayiza malunga jenu kubwa njize, ni mapwo jenu kubwa ndungo ja mwanangana wa Aamore.

³⁰ Alioze haliabwila ajikulu jo hoonona, chize ku Heshbone ndoo ku Dibono, chize ku Nashime ndoo ku Nofa, hehi ni Medeba.”

³¹ Chenacho Aisraele atwamine mu chifuchi cha Aamore,

³² Mose yatuma ngendeshi ha kutala chize maakasa jita ni akwa limbo lia Jazere. Aisraele yaakumba, yaahanga Aamore eswe waze te atwama mu yihunda ya lie limbo.

³³ Hohene Aisraele yaatewuluka, yaaya mu jila ya kuya ku chifuchi cha Bashane. Mba mwanangana Oge wa ku Bashane yatuhuka hamwe ni tujita twenyi ha kwasa no jita ku limbo lia Edrei.

³⁴ Mwene Zambi yambila Mose ngwenyi: “Kanda numuvwila woma, mungunukwasa ha kumukumba hamwe ni atu jenyi eswe, ni kutambula che chifuchi chenyi. Mulingenu ngwe chize nunakalinga Sihone, mwanangana wa Aamore, yoze te wakuyula mu Heshbone.”

³⁵ Mba Aisraele yaashiha Oge, ni ana jenyi a malunga, ni atu jenyi eswe, niumwe kasalile ko ni mwono. Chenacho Aisraele azukile chifuchi.