Kwalula 20 - Mukanda Wa Zambi 1970

Aisraele yaalimika ni Mose ku Kadeshe

¹ Ha kakweji mutangu Chikungulwila cheswe cha Aisraele yeeza ku puya ya Zine, yaasa musumba ku Kadeshe. Kwenako afwilile Miriame, yaamufunda.

² Kuze asele musumba te kukushi meya, mba atu yaakunguluka kuli Mose ni Arone,

³ yaaketeka ngwo: “Mala! Kachi twafwile kwetu hamwe ni usoko wetu Aisraele kulutwe lia zuwo lia Zambi.

⁴ Mumu yika nwatunehenene mu puya yino? Hanga tukuwile mo hamwe ni yimuna yetu, nyi?

⁵ Mumu yika nwatuchijilile ku chifuchi cha Egiptu ni kutuneha kuno kuma kwa lamba kuze kukushi Chuma nichimwe? Kukushi mbuto, ni mikuyu, ni vinyu, ni mihuko ya granade, chibwe meya akunwa!”

⁶ Mose ni Arone yaakatuka kuli atu, yaamana ku chikolo cha zuwo lia Zambi. Yaafulamana, mba uhenya wa Mwene Zambi yiwasolokela.

⁷ Mwene Zambi yambila Mose ngwenyi:

⁸ “Anda lukanda, yena ni Arone kungululenu akwa Chikungulwila eswe. Hanjika ku liwe lize lili ku meso jo, mba meya maatuhuka. Chenacho munubwa ni meya akuhana kuli atu, ni yimuna yo.”

⁹ Mose yanda lukanda ku meso ja Mwene Zambi ngwe chize amwambile.

¹⁰ Iye ni Arone yaakungulula akwa Chikungulwila kulutwe lia liwe, mba Mose yamba ngwenyi: “Banjikenu, yenu yihulia! Kuma, tunutuhwishile meya mu liwe lino, nyi?”

¹¹ Hohene Mose yanda lukanda, yamulamba ha liwe yisuho yaali, mba meya yaatuhuka anji. Atu eswe ni yimuna yo yaanwa.

¹² Alioze Mwene Zambi yambila Mose ni Arone ngwenyi: “Mumu kunwangufulielele ni kungulemesa ngwe munangi ku meso ja Aisraele, ha chino kunuchi kuhetesa akwa Chikungulwila chino mu chifuchi chize naalakenyene kwaaha.”

¹³ Yuma yino yabwile ku Meriba, kuze Aisraele aketekele Mwene Zambi. Kwenako Mwene Zambi alwezele ulinange wenyi.

Mwanangana wa Edome yalituna Aisraele kubalika mu chifuchi chenyi

¹⁴ Ku Kadeshe Mose yatuma tunganda kuli mwanangana wa Edome. No yaamba ngwo: “Yetu, usoko wenu Aisraele, tunambe ngwetu, Unanyingika lamba lize hitunamono,

¹⁵ ngwe chize tushakulu twetu ayile ku Egiptu, kuze twatwamine miaka yinji. Akwa Egiptu yaahungumiona tushakulu twetu hamwe ni yetu.

¹⁶ Yitulila ku meso ja Mwene Zambi ha kutukwasa. Neye yevwa kulila chetu, yatutumina kanganda ka mwilu, yoze watutuhwishile mu Egiptu. Haliabwila tuli kuno ku Kadeshe, limbo lize lili ku njiza ya chifuchi chenu.

¹⁷ Tunalembe tubalike kama ndusu mu chifuchi chenu. Yetu ni ngombe jetu kutuchi kuhambuluka ni kunjila mu minda yenu ya mbuto hanji ya vinyu, kutuchi kunwa meya mu mashima jenu. Mutukaula lume jila yinene ndoo ni muze mututuhuka mu chifuchi chenu.”

¹⁸ Alioze Aedome yaakumbulula ngwo: “Kunwahashile kubalika mu chifuchi chetu! Nyi ngwe nwacheseka, mutulimika ni yenu.”

¹⁹ Aisraele yaamba ngwo: “Mala! Mutukaula lume jila yetu. Nyi yetu hanji yimuna yetu twanwa amwe meya jenu, mutufweta. Chize tunazange yetu kubalika lume ndusu.”

²⁰ Aedome yaamba nawa ngwo: “Kuusolo!” Mba yaatuhuka ha kulimika ni Aisraele ni tujita anji.

²¹ Chenacho Aedome alitunyine Aisraele kubalika ndusu mu chifuchi cho. Kashika Aisraele yaalumuka, yaaya jila yeka.

Kufwa cha Arone

²² Akwa Chikungulwila eswe ja Aisraele yaakatuka ku Kadeshe, yaaheta ku mulundu wa Hore,

²³ ku njiza ya Edome. Kwenako Mwene Zambi ambilile Mose ni Arone ngwenyi:

²⁴ “Arone kechi kanjila mu chifuchi chize nalakenyene Aisraele, mumu yenu aali nwalimikine ni yami muze nwakolemene Shimbi yami ku Meriba.

²⁵ Twala Arone ni mwanenyi wa lunga Eleazare ha mulundu wa Hore,

²⁶ uzule mahina ja Arone a uhako hanga waajike Eleazare. Arone himafwa.”

²⁷ Mose yalinga chize amwambile Mwene Zambi. Iye ni Arone yaakanduka ha mulundu wa Hore ku meso ja akwa Chikungulwila eswe.

²⁸ Mba Mose yazula Arone mahina ja uhako, yaajika Eleazare. Arone yafwila he ha mulundu, Mose ni Eleazare yaapalumuka ha mulundu yaaheta ku musumba.

²⁹ Akwa Chikungulwila eswe yeevwa ngwo, Arone hafwa. Yaamulila matangwa makumi atatu.