Kwalula 19 - Mukanda Wa Zambi 1970

Uto wa chimbembe wa chihwo muchila

¹ Mwene Zambi yambila Mose ni Arone,

² ha kwaha Aisraele Shimbi jino, ngwenyi: “Anehe chimbembe wa chihwo muchila yoze keshi kapalia, yoze kanda alinga nenyi milimo,

³ amuhane kuli hako Eleazare. Mba umwe lunga atuhwise chimbembe yoze mu musumba, amushiha, ku meso ja mwe hako.

⁴ Neye achubike munwe wenyi mu manyinga a mwe chimbembe, aasapwile yisuho shimbiali ni kutalikisa ku zuwo lia Zambi.

⁵ Chimbembe mweswe wa muundu, ni lambu, ni yifwo, ni manyinga, ni yuma ya mu jimo, ayoche yiweme ku meso ja hako.

⁶ Mwe hako ande mutondo sedru, ni mafwo a chisapo, ni muhipu uchila, ni kuyimbila mu kahia.

⁷ Mabwamuze hako akose mahina jenyi ni kulihinjila meya, mba himanjila mu musumba. Alioze mabwa wa luchisa ndoo ku chingoloshi.

⁸ Mutu yoze hocha mwe ngombe, neye akose mahina jenyi ni Vulihinjila meya. Neye mabwa wa luchisa ndoo ku chingoloshi.

⁹ Mba umwe lunga yoze kalichishile, akunge uto wa mwe chimbembe ni kuusa homa habema haze lia musumba, kuze akuufungila, Chikungulwila cha Israele ha kululika nawo meya akubemesa akwa luchisa. Chimbembe kali mulambu wa kuchiza nawo milonga.

¹⁰ Mutu yoze hakunga we uto akose mahina jenyi, alioze mabwa wa luchisa ndoo chingoloshi. Aisraele ni yilambala waze ali mukachi ko chaatamba kufunga Shimbi yino ndoo ku miaka yeswe.”

Kukwata mufu

¹¹ “Mweswawo makwata mufu mabwa wa luchisa matangwa shimbiali.

¹² Chatamba kusana meya akulibemesa no ha tangwa lia muchitatu ni lia muchishimbiali, mba mabema. Alioze nyi kachilingile ha matangwa wano aali kechi kubema.

¹³ Mweswawo makwata mufu, nyi kalibemesene, masala wa luchisa, mumu kaamuhinjilile ko meya a kulibemesa. Kanajilula zuwo lia Zambi, kunwahashile nawa kumwalula mukachi ka atu ja Zambi.

¹⁴ “Nyi umwe mutu hafwila mu zuwo lienyi lia makubu, yoze te uli mu zuwo ni yoze manjila mo ha shimbu lize afwanga mwe mutu, maabwa a luchisa matangwa shimbiali.

¹⁵ Yikwachilo yeswe yize yili mu zuwo nyi kuyishi kufuka, muyibwa ya luchisa.

¹⁶ Nyi umwe mutu makwata mufu yoze haashiha hanji wa kulifwila mu yambu, hanji chifwaha cha mufu hanji fuka, mabwa wa luchisa matangwa shimbiali.

¹⁷ “Ha kubemesa mukwa luchisa, ande umwe uto wa chimbembe muchila yoze ochele ha kuchiza milonga, ause mu mulondo, ni kuweza ho meya a ku shima.

¹⁸ Mutu yoze kalichishile ande mafwo a chisapo achichubike mu meya, ni kusapwila ku zuwo lia mufu, ni ku yuma yamo yeswe, ni hali atu waze abwile mo. Mutu yoze kalichishile asapwila meya hali mutu yoze unakakwata chifwaha cha mufu, hanji mufu, hanji fuka.

¹⁹ Mutu yoze kalichishile asapwile mukwa luchisa meya ha tangwa lia muchitatu ni lia muchishimbiali. Mba ha tangwa lia muchishimbiali abemese mwe mutu yoze. Neye akose mahina jenyi ni kulihinjila meya; mba ha kunjila cha tangwa mabema.

²⁰ “Mweswawo malichisa, nyi keshi kulibemesa, masala wa luchisa, mumu kaamuhinjilile ko meya akulibemesa no. Hajilula zuwo lia Zambi, kaahashile ko nawa kumwalula hamwe ni atu ja Zambi.

²¹ Nukafunga Shimbi yino ndoo ku miaka yeswe. Mutu yoze masapwila meya akulibemesa no, chamutamba nawa kukosa mahina jenyi. Mweswawo makwata meya akulibemesa no mabwa wa luchisa ndoo ku chingoloshi.

²² Cheswacho muchikwata mukwa luchisa chili cha luchisa, ni mweswawo makwata Chuma chize akwatanga mukwa luchisa mabwa wa luchisa ndoo ku chingoloshi.”