Kwalula 18 - Mukanda Wa Zambi 1970

Milimo ya mahako ni Alevi

¹ Mwene Zambi yambila Arone ngwenyi: “Yena, ni ana je a malunga, ni Alevi munumona lamba nyi munuvulumuna mu milimo ya mu zuwo lia Zambi. Alioze shina lume yena ni ana je munumona lamba mu milimo ya uhako.

² Wanda nawa akwenu a ku vungu lia Levi ha kulinga hamwe ni yena ni kunukwasa muze yena ni ana je munulinga milimo ya uhako mu zuwo lia Zambi.

³ Ayo maakukwasa ku milimo ye ni ku milimo ya mu zuwo lia Zambi. Alioze kanda akwata yuma ya muma mwa chijila chibwe ya ku chilumbilo, nyi ka kumaafwa.

⁴ Chaatamba kulinga hamwe ni yena milimo ye yeswe ya mu zuwo lia Zambi, alioze mutu weka kanda alinga hamwe ni yena.

⁵ Yena ni ana je chanutamba kulinga milimo ya muma mwa chijila ni ya ku chilumbilo, hanga chichi kuvwila nawa atu jami Aisraele ufwatulo.

⁶ Yami nguli yoze natongwele usoko wenu Alevi mukachi ka Aisraele ngwe chawana kuli yenu. Haalikunjika kuli yami. Ha chino maahasa kulinga milimo yo ya mu zuwo lia Zambi.

⁷ Alioze shina yena ni ana je munulinga milimo ya uhako ku chilumbilo ni muma mwa chijila kuhiana. Yuma yino yeswe yili milimo yenu, mumu hingunanwehe chawana cha uhako. Ku yuma ya chijila, nyi kwakundama umwe mutu weka akamushiha.”

Chitundo cha mahako

⁸ Mwene Zambi yambila Arone ngwenyi: “Iwuluka ngwe yami hinakwaha milambu yeswe yize atu akungulambula yize keeshi kwocha. Hingunakwehe yo yena ni vungu lie yibwe chitundo chenu ndoo ku miaka yeswe.

⁹ Hingunakwehe milambu ya chijila kuhiana yize keeshi kwocha yino: milambu ya mbuto, ni ya milonga, ni kuhilwisa, ni kuwezela Yuma yeswe yize hinwalambula kuli yami ngwe milambu ya chijila yili ya yena ni ana je a malunga.

¹⁰ Yenu malunga wika chatamba kuyilila muma mwa chijila, nikuyalula ngwenu, yili ya chijila.

¹¹ “Kuweza ho nawa, yuma yeswe yize atu akuhandununa ya ku milimo ya kuhungisa muyibwa ni yenu, mungunwaha yo yena ni ana je a malunga ni a mapwo ndoo ku miaka yeswe. Mutu mweswe wa ku vungu lie yoze kalichishile mahasa kuyilia.

¹² “Ngunakwehe mihuko yitangu yibema yize Aisraele maangulambula ku mwaka ni mwaka: maji a olive, ni vinyu, ni mbuto.

¹³ Yeswe yili ya yena. Mutu mweswe wa ku vungu lie yoze kalichishile mahasa kuyilia.

¹⁴ “Yuma yeswe mu Israele yize atu haakunjika kuli yami yili ya yena.

¹⁵ “Mwana mutangu mweswe wa mutu hanji wa chimuna, yoze Aisraele maakunjika kuli yami kali wa yena. Alioze chatamba kutayiza mutu yoze mazanga kukula mwanenyi mutangu wa lunga ni mwana mutangu wa chimuna wa luchisa.

¹⁶ Mwana mutangu wa mutu chatamba kumukula muze habwa ni kakweji umuwika ni ndando yize kuyishi kwalumuka, mbongo jitano ja prata, ni kulita ni ulemu wa mbongo ja miaka yize

¹⁷ Alioze atangu kusemuka a kuli ngombe, ni mapanga, ni pembe, kuchatambile kwakula. Kaali lume ayami, chaatamba kwaalambula. Ukasapwila manyinga jo ha chilumbilo ni kwocha maji jo ngwe mulambu wa yakulia, lupembo kakuwahila kuli yami.

¹⁸ Yifwo yo yili ya yena, ngwe chize wakutambula bambo lia kuhungisa ni kulu lia chindume.

¹⁹ “Yuma yeswe yize Aisraele akulambula ya kuzanga cho ene, hinakwaha yo yena ni ana je a malunga ni a mapwo. Uno uli Usendo uze kuushi kwalumuka, uze hinakolesa ni yena ni vungu lie.”

²⁰ Mwene Zambi yambila Arone ngwenyi: “Yena kuuchi katambula chihinga nichimwe, chibwe chimwe Chihanda cha chifuchi cha Aisraele, mumu yami Mwene Zambi nguli yeswe yize unafupu.”

Chitundo cha Alevi

²¹ Mwene Zambi ngwenyi: “Hingunahana kuli Alevi Chihanda chimuwika cha ku yihanda kumi chize Aisraele maangulambwola. Yino yili fweto ya milimo yo yize akulinga mu zuwo liami lia makubu.

²² Aisraele akwo kuchaatambile kukundama ku zuwo liami. Nyi ka kumaafwa.

²³ Chize ku tangwa lino shina Arone ni ana jenyi a malunga e maafunga zuwo liami, ni kumbata yuma yalio. Yino yili Shimbi ya vungu lienu ku miaka yeswe. Alevi kanda akabwa ni chihinga nichimwe mu Israele,

²⁴ mumu hingunaahe Chihanda chimuwika cha ku yihanda kumi chize Aisraele akungulambula. Kashika naamba ngwami, keechi kuhinga nichimwe mu Israele.”

Chihanda chimuwika cha ku yihanda kumi cha Alevi

²⁵ Mwene Zambi yambila Mose,

²⁶ ha kulweza Alevi ngwenyi: “Muze munutambula kuli Aisraele Chihanda chimuwika cha ku yihanda kumi chize Mwene Zambi hanwaha ngwe chihinga chenu, chanutamba ni yenu kulambula Chihanda cha kumi cha ku milambu yize,

²⁷ Mulambu uno muubwa ngwe mulambu wa njimi wa mbuto yaha ni vinyu yaha.

²⁸ Chenacho ni yenu nawa munukalambula mulambu wa Mwene Zambi ku yitundo yeswe yize munukatambula kuli Aisraele. Munuhana mulambu uno wa Mwene Zambi kuli hako Arone.

²⁹ Hanenu milambu ya ku mbuto yibema yahiana yize munutambula.

³⁰ Muze hinwalambula Chihanda chibema chahiana, munuhasa kufunga yikwo, ngwe chize akulinga njimi ku yize yakusala ku milambu yenyi.

³¹ Yenu ni akwa majiko jenu, yuma yize yasala munuhasa kuyilila kweswako munuzanga, mumu yili fweto yenu ya ku milimo yize nwakulinga ku zuwo lia Zambi.

³² Kunuchi kubwa ni uhiso muze munuyilia nyi nwakunjika Chihanda chibema kuli Mwene Zambi. Alioze kanda nulelesa yawana ya Aisraele ya chijila ha kulia yimwe yawana yize shimbu kanda nuchilambula Chihanda chibema chahiana kuli Mwene Zambi. Nyi ka, kumunukafwa.”