Kwalula 16 - Mukanda Wa Zambi 1970

Uhulia wa Akora ni Adatane ni Aabirame

^1-2 Kora mwana wa Izehare, wa ku jimo lia Kohate wa ku vungu lia Levi, yahamuka ha kukatukila Mose. Malunga atatu a ku vungu lia Rubene yaalichinga nenyi: Datane ni Abirame, ana ja Eliabe, ni One mwana wa Pelete. Akwa lufuma akwo 250 yaalichinga no, miata waze atongwele kuli akwa Chikungulwila.

³ Yaakunguluka ku meso ja Mose ni Arone ni kulimika no, ngwo: “Hikwahwa! Mbunga yeswe ya Chikungulwila kaali a linanga, Mwene Zambi kali mukachi ketu. Mba yenu, ni chiyulo chika nunalitohwesela mukachi ka Chikungulwila cha Mwene Zambi?”

⁴ Muze Mose hachivwa, yafulamana, yalemba.

⁵ Mba yambila Kora ni mbunga yenyi ngwenyi: “Hamene chichamene Mwene Zambi makasolola atu jenyi, makatayiza mutu wenyi yoze iye mwene hatongola kukundama ku chilumbilo.

^6-7 Hamene chichamene yena ni mbunga ye nukanda yula nikusa ho makala a kahia ni yuma ya vumba libema ni kuyitwala ku chilumbilo. Mba hanga tukamone iya hakachi ketu Mwene Zambi hatongola. Yenu Alevi hikwahwa!”

⁸ Mose yambila akwa Kora ngwenyi: “Yenu Alevi, banjikenu!

⁹ Nunanyongo ngwenu, chili Chuma chikepe chize Mwene Zambi hananuhandununa ku mbunga yikwo ya Chikungulwila, hanga nuhase kumukundama ni kulinga mulimo yenu ya mu zuwo lia Zambi, ni kulingila Chikungulwila, nyi?

¹⁰ Yenu Alevi eswe, Zambi hananutayiza ulemu uno, hindu nunafupu kubwa nawa mahako, nyi?

¹¹ Muze nunalimika ni Arone nunalimika ni Mwene Zambi.”

¹² Mba Mose yatambika Datane ni Abirame, alioze ayo ngwo: “Kutuchi kwiza ko!

¹³ Hikwahwa kulu mumu hiunatuchiza mu chifuchi cha chinuno cha Egiptu ni kutushihila muno mu puya. Kuma unatela nawa kubwa mwata wetu, nyi?

¹⁴ Kuwatuhetesele mu chifuchi cha chinuno. Kuwatuhele minda ya mbuto ni ya vinyu kubwa chihinga chetu. Ni haliabwila unazange kutwonga. Kutuchi kwiza ko!”

¹⁵ Mose yevwa ufwatulo, yambila Mwene Zambi ngwenyi: “Kanda utambula milambu niyimwe yize malunga wano maaneha. Niumwe wa kuli ayo chamulingile chibi. Chatambwile chibwe chimbulu umuwika kuli ayo ka.”

¹⁶ Mose yambila Kora ngwenyi: “Ha mene yena ni mbunga ye ya 250 chanutamba kuheta ku zuwo lia Zambi lia makubu. Arone neye akabwa ko.

¹⁷ Mweswe wa kuli yenu akeza ni chula chenyi, akasa ho yuma ya vumba libema nikuchisa ha chilumbilo.”

¹⁸ Mba mutu mweswe yambata kahia ha chula chenyi ni yuma ya vumba libema, yamana ku chikolo cha zuwo lia Zambi hamwe ni Mose ni Arone.

¹⁹ Mba Kora yakungulula akwa Chikungulwila cheswe, yaamana ha talanganyi ni Mose ni Arone ku chikolo cha zuwo lia Zambi. Susumuku uhenya wa Mwene Zambi yiusoloka mukachi ka Chikungulwila cheswe,

²⁰ mba Mwene Zambi yambila Mose ni Arone ngwenyi:

²¹ “Lihandununenu ni atu wano, hanga ngwoonone ha Shimbi linoliene.”

²² Alioze Mose ni Arone yaafulamana hashi, yaamba ngwo: “Aa Zambi, yena uli chishina cha mwono weswe. Kuma nyi mutu umuwika havulumuna, muuvwila Chikungulwila cheswe ufwatulo, nyi?”

²³ Mwene Zambi yambila Mose ngwenyi:

²⁴ “Lweza atu alihandunune ni mazuwo ja Kora ni Datane ni Abirame.”

²⁵ Mba Mose, hamwe ni miata ja Aisraele, yaaya kuli Datane ni Abirame,

²⁶ yambila mbunga ngwenyi: “Handunukenu ku mazuwo ja yingulungulu wano, kanda nukwata ku chimwe Chuma cho. Nyi ka, Zambi manwonona hamwe no mumu ha milonga yo yeswe.”

²⁷ Chenacho alihandunwine ku mazuwo ja Kora ni Datane ni Abirame. Datane ni Abirame yaatuhuka haze, yaamana ku yikolo ya mazuwo jo, hamwe ni mapwo jo ni ana jo.

²⁸ Mose yambila atu ngwenyi: “Ha chino mununyingika ngwenu, Mwene Zambi hanangutumu ni kulinga yino yeswe, chachilingile mu tachi ja yami mwene.

²⁹ Nyi atu wano maafwa ngwe chize akufwa atu eswe, Zambi kaamwesene lamba, kuma Mwene Zambi kangutumine.

³⁰ Alioze nyi Mwene Zambi maalinga chimwe Chuma, hashi muhabakuka ha kwamina hamwe ni yuma yo, ni maapalumuka a mwono muma mwa afu, mba mununyingika ngwenu, atu wano haalituna Mwene Zambi.”

³¹ Muze te hamana kuhanjika, susumuku homa haze te anamana Datane ni Abirame yihabakuka,

³² yihaamina ni akwa jiko lio, hamwe ni mbunga ya Kora ni yuma yo yeswe.

³³ Yaapalumuka a mwono muma mwa afu, hamwe ni yuma yo. Hashi yihaafuka, no yaakuwa lume.

³⁴ Aisraele eswe waze abwile ko yaachina muze evwile kulila cho, yaakololoka ngwo: “Tuchinenu! Nyi ka, hashi muhatufuka nawa!”

³⁵ Mba Mwene Zambi yatuma kahia. Ke kahia yikonona atu 250 waze anehene yuma ya vumba libema.

Yula yakwokwela kahia

³⁶ Mwene Zambi yambila Mose ngwenyi:

³⁷ “Lweza Eleazare mwana wa hako Arone, asandule yula ya unengu, yize akwokwela kahia, mukachi ka afu waze haawema, ni kusandula nawa makala a kahia sali ni sali, mumu yula yili ya chijila.

³⁸ Yiyalumuka ya chijila muze haayikunjika ku meso ja Mwene Zambi ha chilumbilo. Kashika twala yula ya kahia ya atu wano haafwa mumu ha milonga yo, yitatule hanga yibwe ya luhanda, yibwe chifuko cha ha chilumbilo. Chibwe chilayi kuli Aisraele.”

³⁹ Mba hako Eleazare yanda ye yula ya kahia, yaayitatula ha kubwa ya luhanda, yibwe chifuko cha ha chilumbilo.

⁴⁰ Chino yichikanyamisa Aisraele ngwo, niumwe yoze hi wa ku vungu lia Arone ko mahasa kwiza ku chilumbilo ni kwocha yuma ya vumba libema ku meso ja Mwene Zambi. Nyi ka, Zambi mamushiha ngwe chize hashiha Kora ni mbunga yenyi. Yino yeswe Eleazare yayilinga ngwe chize Mwene Zambi alwezele Mose.

Arone yalamwina atu

⁴¹ Muze hikwacha Chikungulwila cheswe yaalinyenga kuli Mose ni Arone ngwo: “Hinwashiha atu ja Mwene Zambi.”

⁴² Muze eswe haakunguluka ha kulimika ni Mose ni Arone, yaatewuluka, yaamona lelwa hiliafuka zuwo lia Zambi lia makubu, uhenya wa Mwene Zambi yiusoloka.

⁴³ Mose ni Arone yaaya, yaamana kulutwe lia zuwo lia Zambi,

⁴⁴ mba Mwene Zambi yambila Mose ngwenyi:

⁴⁵ “Katuka kuli atu wano, ngwoonone shimbu linoliene!” Hohene ayo aali yaafulamana,

⁴⁶ mba Mose yambila Arone ngwenyi: “Anda chula che cha kahia, okwela ho makala a kahia a ha chilumbilo, sako ho yimwe yuma ya vumba libema, chitwale nikawashi kuli atu ha kwabemesa ni kwapwisa a chijila. Lipupwise! Mwene Zambi hevwa ufwatulo, musongo hiwabutuka kulu.”

⁴⁷ Arone yononoka, yanda chula chenyi cha kahia, yazomboka mukachi ka mbunga. Ha kumona chize te we musongo hiwabutuka kulu, yasa yuma ya vumba libema ha makala a kahia, yabemesa e atu.

⁴⁸ Yamana mukachi ka amwono ni afu, mba musongo yiubatuka.

⁴⁹ Yikufwa atu 14,700, kuweza ho waze afwile ha uhulia wa Kora.

⁵⁰ Muze we musongo hiwahwa, Arone yahiluka kuli Mose ku chikolo cha zuwo lia Zambi.