Kwalula 15 - Mukanda Wa Zambi 1970

Shimbi hakutwala ku milambu

¹ Mwene Zambi yamwaha Mose

² Shimbi jino ajilweze Aisraele a kajifunge mu chifuchi chize makaaha,

³ Munukahasa kulambula kuli Mwene Zambi ngombe, hanji panga, chibwe pembe, mulambu wa kwocha, hanji mulambu wa chilakenyo, chibwe mulambu wa kuzanga chenu, mu yiwanyino yenu. Lupembo mubema wa ku milambu yino ya yakulia kakuwahila kuli Mwene Zambi.

^4-5 Yoze makalambula mwana panga hanji pembe mulambu wa kwocha kuli Mwene Zambi, akaneha nawa kilo yimuwika ya wunga wa kuchinga ni maji a olive, ngwe mulambu wa mbuto, hamwe ni litro yimuwika ya vinyu.

⁶ Muze makalambula kuji a panga, akalambula nawa kilo jaali ja wunga wakuchinga ni litro yimuwika ni Chipinji cha maji a olive ngwe mulambu wa mbuto,

⁷ hamwe ni litro yimuwika ni Chipinji cha vinyu. Lupembo wa milambu yize kakuwahila kuli Mwene Zambi.

⁸ Muze makalambula kuji a ngombe kuli Mwene Zambi mulambu wa kwocha hanji mulambu wa kumanununa nawo chilakenyo, hanji mulambu wa kulivwa ni Zambi,

⁹ akalambula mulambu wa mbuto wa kilo jitatu ja wunga wakuchinga ni litro jaali ja maji a olive

¹⁰ hamwe ni litro jaali ja vinyu. Lupembo wa mulambu uze kakuwahila kuli Mwene Zambi.

¹¹ Yuma yino chatamba kuyilambula hamwe ni kuji a ngombe, hanji kuji a panga, hanji mwana panga hanji pembe,

¹² Muze maakaweza ho yimuna, chaatamba kuweza ho nawa yuma yino,

¹³ Mweswawo masemuka mu Israele chatamba kulinga Chenacho muze makalambula mulambu wa yakulia wa lupembo mubema kuli Mwene Zambi.

¹⁴ Nyi chilambala yoze makatwama mukachi kenu, chibwe matwama matangwa anji hanji akepe, makalambula mulambu wa yakulia wa lupembo mubema kuli Mwene Zambi, chamutamba kufunga Shimbi jizejene.

¹⁵ Ku miaka yeswe yize muyiza ho, yenu ni yilambala waze atwama mukachi kenu chanutamba kufunga Shimbi jino Jeswe. Yenu eswe nuli chimuwika ku meso ja Mwene Zambi.

¹⁶ Yenu ni ayo nuli ni Shimbi jimuwika.

¹⁷ Mwene Zambi yamwaha Mose

¹⁸ Shimbi jino mumu hali Aisraele ha kujifunga mu chifuchi chize aahele.

¹⁹ Muze munukalialia yakulia ya mu chifuchi, nukalambula Chihanda kuli Mwene Zambi.

²⁰ Muze munukochacha mbolo, Chihanda chitangu cha ku mbolo ya mbuto yaha chikabwa cha mbala cha Mwene Zambi. Chatamba kuchilambula ngwe chize munukalambula mbuto yitangu.

²¹ Ku miaka yeswe yize muyiza ho, chatamba kulambula kuli Mwene Zambi chawana cha ku mbolo yenu yize munukochacha.

²² Nyi tangwa likwo umwe mutu havulumuna jimwe Shimbi jize Mwene Zambi ahanyine kuli Mose, te kachinyingikine,

²³ hanji Chikungulwila haavulumuna, kaafungile ko jimwe Shimbi jize Mwene Zambi ambilile Mose,

²⁴ chaatamba kulambula mulambu uze unalite. Nyi ngwe haavulumuna mumu te Chikungulwila kaachinyingikine, chaatamba kulambula chimbembe wa kuji mulambu wa kwocha, hamwe ni mulambu wa mbuto ni wa vinyu. Lupembo wa mulambu uze kakuwahila kuli Mwene Zambi. Chaatamba kulambula nawa kuji a pembe mulambu wa milonga.

²⁵ Hako akabemesa Chikungulwila, mba Zambi makaakonekena, mumu te mulonga uze haaunyingika ni haananeha mulambu wa mulonga wo, kuuli mulambu wa yakulia kuli Mwene Zambi.

²⁶ Chikungulwila cheswe cha Aisraele ni yilambala eswe waze atwama mukachi ko kumakaakonekena, mumu mutu mweswe hananjila mu mulonga uze.

²⁷ Nyi umwe mutu havulumuna mulonga te kachinyingikine, akalambula chihwo cha pembe wa mwaka umuwika mulambu wa milonga.

²⁸ Hako akabemese mutu yoze ku chilumbilo, mba Zambi makamukonekena.

²⁹ Shimbi yino yili hali mutu mweswe yoze makavulumuna mulonga te kachinyingikine, chibwe Kaisraele hanji chilambala.

³⁰ Alioze nyi mutu havulumuna mulonga ni mbunge yeswe, chibwe Kaisraele hanji chilambala, kashililika Mwene Zambi, chatamba kumushiha,

³¹ Mumu halelesa maliji waze Mwene Zambi ahanjikile, ni hakolema Shimbi jenyi. Kufwa chize chinamutale iye mwene.

Mutu yoze hakolema Shimbi ya tangwa lia kuhwima

³² Limwe tangwa, muze te Aisraele achili mu puya, amwe atu yaamona mutu kanande tete ha tangwa lia kuhwima.

³³ Yaamutwala ku meso ja Mose ni Arone, ni Chikungulwila cheswe.

³⁴ No yaamufunga, mumu te kanda achinyingika ngwe chize maamubatwila.

³⁵ Mba Mwene Zambi yalweza Mose ngwenyi: “mutu yono chatamba kumushiha. Chikungulwila cheswe amwase mawe, haze lia musumba, hanga afwe.”

³⁶ Mba Chikungulwila cheswe yamutuhwisa mu musumba, yaamushiha ni mawe, ngwe chize Mwene Zambi ahanyine Shimbi.

Shimbi hakutwala ku sapo ja mahina

³⁷ Mwene Zambi yambila Mose

³⁸ ha kulweza Aisraele ngwenyi: “Senu sapo ku masongo ja mahina jenu ja Wanda ulauluka. Chino nuchilinga ndoo ku miaka yeswe.

³⁹ Sapo jize mujikanwiwujola. Yisuho yeswe yize munukajitala munwiwuluka Shimbi jami jeswe ni kujifunga. Mba kunuchi kangumba nyima ni kukaula ndako jenu ni upale wa yenwene.

⁴⁰ Sapo mujikanwiwulula ha kufunga Shimbi jami jeswe, mba munukabwa niami liakulu.

⁴¹ Yami nguli Mwene Zambi, Zambi yenu. Yami nanutuhwishile mu chifuchi cha Egiptu ha kubwa Zambi yenu. Yami nguli Mwene Zambi.”