Kwalula 14 - Mukanda Wa Zambi 1970

Atu yaanenganyana

¹ Ufuku weswe atu yaakololoka ni kulila.

² Yaanenganyana kuli Mose ni Arone ngwo: “Kachi twafwilile kwetu mu chifuchi cha Egiptu hanji muno mu puya!

³ Mumu yika Mwene Zambi Watunehene ku chifuchi chino? Kuchalitele kwetu kuhiluka ku Egiptu, nyi?”

⁴ Kashika alihanjikishile ngwo: “Chinalite tutongole umwe mwata tahiluke kwetu ku Egiptu!”

⁵ Hohene Mose ni Arone yaafulamana ku meso ja atu eswe.

⁶ Yoshua mwana wa Nune, ni Kaleba mwana wa Jefune, aali a hakachi ka ngendeshi, yaachanuna mahina jo ni kubihilila.

⁷ Yaambila atu ngwo: “Chifuchi chize twendesele chili chibema kuhiana.

⁸ Nyi Mwene Zambi kanawahilila ni yetu, makatutwala ko, makatwaha chifuchi chize cha chinuno.

⁹ Kanda nukatukila Mwene Zambi, hanji kwivwile woma atu waze atwama ko. Mutukaakumba, chili chashi. Mwene Zambi kali hamwe ni yetu. Hakumba kulu mazambi waze akwaafunga. Kashika kanda nwivwa woma.”

¹⁰ Alioze Chikungulwila cheswe yaamba ngwo: “Twasenu mawe twashihe.” Alioze susumuku yaamona kubeyima cha pangu lia uhenya wa Mwene Zambi yilisoloka mu zuwo lia Zambi lia makubu.

Mose yalembela atu Zambi

¹¹ Mwene Zambi yambila Mose ngwenyi: “Ndoo matangwa angahi atu wano maalitwamina kungukatukila? Shimbu lika atu wano maangufuliela? Hingunalingi yilayi yinji mukachi ko, hindu kenu.

¹² Mungwatumina chipuho ni kwoonona, alioze yena mungukupwisa tato ya vungu linene ni lia tachi kuhiana wano!”

¹³ Mose yakumbulula ngwenyi: “Hiunatuhwisa atu wano mu chifuchi cha Egiptu ni ndundo je. Muze akwa Egiptu maakevwa chize hiwalinga atu je,

¹⁴ kumaachambulula kuli akwa chifuchi chino. Mumu Akanana haanevu kulu ngwo, yena Mwene Zambi uli hamwe ni yetu, twakukumona zwalala muze lelwa lie liakumana hali yetu. Haanevu nawa ngwo, yena wakutetekela kulutwe lietu mu lelwa lialifwa ngwe nguji ha mwalwa, ni mu kahia kalifwa ngwe nguji ha ufuku.

¹⁵ Nyi washiha atu je eswe, mavungu waze haanevu lufuma we kumaamba ngwo:

¹⁶ ‘Hiwashihila atu je mu puya mumu kuwahashile kwaahetesa mu chifuchi chize waalakenyene.’

¹⁷ Kashika Mwene Zambi, haliabwila ngunaliumbu tulweze kama ndundo je, umanunune chilakenyo chize walakenyene muze wambile ngwe:

¹⁸ ‘Yami Mwene Zambi Chishi kutenuka nikawashi, nakuzanga atu kuhiana. Nguli mukwa kushishika, nakukonekena akwa shili ni akwa uhulia. Hindu Chishi kulitwamina kumwesa ana ni ajikulu ni tukwatambuli lamba mumu ha shili ya atato.’

¹⁹ Chenacho haliabwila, Mwene Zambi, nikulita ni zango lie linene lize kulishi kwalumuka, ngunakulembe, konekena kama atu wano shili yo, ngwe chize wakwakonekena chize kuze akatukile mu Egiptu.”

²⁰ Mwene Zambi yakumbulula ngwenyi: “Mungwakonekena, ngwe chize hiwamba.

²¹ Alioze ngunalishingi ngwami, ni mwe yami mwene, ni we uhenya wami uze unasoloka hashi heswe,

²² mutu niumwe wa kuli wano makanjila mu chifuchi chize. Haanamono kubeyima cha uhenya wami ni yilayi yize nalingile mu Egiptu ni mu puya, alioze haanangusekesa nawa ni nawa, haanalitunu kungwononokena.

²³ Keechi kanjila mu chifuchi chize nalakenyene tushakulu two. Niumwe wa kuli waze haangulituna makanjila mo.

²⁴ Alioze Kaleba, kavumbi kami, kali ni manyonga eka, hangufuliela yami, mungumutwala ku chifuchi chize ayile ni kwendesa. Vungu lienyi maakazuka che chifuchi

²⁵ muze mwatwama Aamaleke ni Akanana. Hiluka hamene, nuye mu puya ya ku sali lia kalunga lwiji Akaba.”

Mwene Zambi yamwesa Aisraele lamba mumu te anamuketeka

²⁶ Mwene Zambi yambila Mose ni Arone ngwenyi:

²⁷ “Ndoo shimbu lika atu wano maalitwamina kunguketeka? Hi janguhwa ni kunguketeka!

²⁸ Haliabwila akumbulule ngwe: ‘Ni mwe yami mwene, mungunulinga ngwe chize hinwamba. Yami Mwene Zambi Hachamba.

²⁹ Munukafwa, ni mijimba yenu muyikasala muno mu puya. Mumu hinwanguketeka, niumwe wa kuli yenu yoze habwa ni miaka makumi aali ni helu makanjila mu chifuchi chize.

³⁰ Hingunanulakenya ha kutwama mo, alioze niumwe wa kuli yenu makatwama mo shina lume Kaleba ni Yoshua.

³¹ Hinunambe ngwenu, ana jenu maakabwa funge, alioze mungukaatwala mu chifuchi chize hinunehuka. Muchikabwa chifuchi cho.

³² Alioze munukafwila muno mu puya.

³³ Ana jenu maakendangana mu puya miaka makumi awana, maakamona lamba mumu ha uhulia wenu, ndoo ni muze munukanonga.

³⁴ Munukamona lamba lia shili yenu miaka makumi awana, nikulita ni matangwa makumi awana waze nwendesele che chifuchi. Munukanyingika ulumbunwiso wa kulimika ni yami!

³⁵ Hinalishinga ngwami, mungulinga chino kuli yenu yingulungulu waze nwalikungulula ha kulimika ni yami. Eswe a kuli yenu munukafwila muno mu puya. Yami, Mwene Zambi, nachamba.’ ”

^36-37 Atu waze Mose atumine ha kwendesa chifuchi yaaneha sango jibi jize jabinjishile atu ha kulinyenyeta kuli Mwene Zambi. Mba Mwene Zambi yaalamba ni musongo, yaafwa.

³⁸ Alioze a kuli ngendeshi kumi ni aali shina lume Yoshua ni Kaleba enoo asalile ni mwono.

Aisraele yeeseka kukumba Akanana

³⁹ Muze Mose alwezele atu yuma yize ahanjikile Mwene Zambi, atu yaalilalila.

⁴⁰ Aisraele yaalimeneka chichamene cheswe, yaabutuka kuya hanga akase jita ni akwa chifuchi cha milundu, yaamba ngwo: “Haliabwila hitwalilulika ha kuya kuma kuze Mwene Zambi atwambile. Hitwakunuka ngwetu, hanavulumuna.”

⁴¹ Alioze Mose ngwenyi: “Mumu yika nwakukolemena Mwene Zambi? Talenu, kunuchi kaakumba!

⁴² Kanda nuya ko. Mwene Zambi keshi hamwe ni yenu. Nyi ka, maanukumba kuli akwa kole jenu.

⁴³ Muze munukasa jita ni Aamaleke ni Akanana, ku munukafwa mu jita. Mwene Zambi kechi kabwa hamwe ni yenu, mumu hinunalitunu ha kumwononokena.”

⁴⁴ No yaakanduka ku tachi jo ene ku chifuchi cha milundu, chibwe Mose ni mushete wa Usendo wa Mwene Zambi ni atu kaakatukile ko ha musumba.

⁴⁵ Mba Aamaleke ni Akanana waze te atwama ko, yaasa no jita, yaahanga ndoo ku limbo lia Horma.