Kwalula 13 - Mukanda Wa Zambi 1970

Ngendeshi

^1-15 Mwene Zambi yambila Mose mu puya ya Parane ngwenyi: “Tongola mwata umuwika umuwika wa ku mavungu kumi ni aali, waatume ngendeshi mu chifuchi cha Kanana, chize hingunahane kuli Aisraele.” Mose yononoka, yatuma miata wano: Vungu Mwata Rubene Shamwa mwana wa Zakure Simeone Shafate mwana wa Hori Yuda Kaleba mwana wa Yefune Isakare Igale mwana wa Josefe Efraime Hoshea mwana wa Nune Benjamine Palti mwana wa Rafu Zabulone Gadiele mwana wa Sodi Manase Gadi mwana wa Susi Dane Amiele mwana wa Gemali Ashere Seture mwana wa Mikele Naftali Nabi mwana wa Vofsi Gade Gewele mwana wa Maki.

Vungu Mwata

¹⁶ Wano e ngendeshi waze Mose atumine ha kwendesa chifuchi. Hoshea mwana wa Nune, Mose yamuluka jina ngwenyi, Yoshua.

¹⁷ Mose yaalweza ngwenyi: “Yilenu ku norde ndoo munukaheta ku sali lia sude mu chifuchi cha Kanana. Mba munukanjila mu chifuchi cha milundu.

¹⁸ Nukendese numone chifuchi chize chibwa, ni kwoka cha atu ni tachi jo.

¹⁹ Nukatale mavu, nyi kaanabeme nyi ka. Nukatale atu, nyi mu yihunda atwama hanji mu membo akukoleka.

²⁰ Nukatale chifuchi nyi chili ni chinuno, nawa nyi chili cha mitondo. Nukasa shindakenyo ni kwanda yimwe mihuko, nukeza nayo.” (Te haaheta ha kangonde wa kuhela vinyu.)

²¹ Mba ngendeshi yaaya ku norde ni kwendesa chifuchi cheswe, chize ku puya ya Zine ku sude ndoo ku Rehobe, hakamwihi ni jila Hamate mukachi ka milundu ku norde.

²² Hatangu yaaya ku sude ya chifuchi, yeeza ku limbo lia Hebrone. Kwenako te atwama akwa majimo ja Ahimane, ni Sheshai, ni Talmai, a ku vungu lia atu ataluka waze te akuvuluka ngwo, Aanake. (Shimbu te kanda achitunga Zoane mu chifuchi cha Egiptu, Hebrone te haanachitungu kulu miaka shimbiali.)

²³ Yaaheta ku chikulo cha Eshkole. Kwenako atetele mutango umuwika uze wabwile ni yichakata ya vinyu yilemu yahiana. Ha kulema chayo atu aali ayimbachile. E ngendeshi yaaneha nawa mihuko ya grenade ni mikuyu. (

²⁴ Homa haze yaaluka ho jina ngwo, chikulo cha Eshkole mumu ha mihuko yize Aisraele ahelele ko.)

²⁵ Muze heendesa che chifuchi ha matangwa makumi awana, ngendeshi yaahiluka,

²⁶ kuli Mose ni Arone, ni ku Chikungulwila cheswe cha Aisraele, ku Kadeshe mu puya ya Parane. Yaambulula yize amwene, yaalweza mihuko yize te anambata.

²⁷ Ngwo: “Tunakendesa chifuchi kuchiwana, ma ma ma maa! Chili ni ubite unji, chifuchi cha chinuno. Tala mihuko yacho.

²⁸ Alioze atu waze atwama ko kaali akwa tachi, ni membo jo kaali anene anene akukoleka kanawa. Yitumona mo nawa atu ataluka, vungu lia Anake.

²⁹ Aamaleke kaatwama ku sali lia sude mu chifuchi, Ahite, ni Ajebuse, ni Aamore kaatwama ku chifuchi cha milundu. Akanana kaatwama ku mbumbulu ya kalunga lwiji Mediterane ni mu chikulo cha lwiji Yordau.”

³⁰ Kaleba yaholesa waze te analinyenge kuli Mose, yaamba ngwenyi: “Tuyenu haliabwila hanga tukase no jita, tukatambule chifuchi. Tunahase kwakumba.”

³¹ Alioze waze ayile hamwe ni Kaleba yaamba ngwo: “Ka, kutwahashile kwakumba. Atu jacho kaali ni tachi kuhiana yetu.”

³² Chenacho ambulwile lusango mubi mukachi ka Aisraele hakutwala ku chifuchi chize endesele. Yaamba ngwo: “Chifuchi chize twayile ni kwendesa, chibwe atu waze atwama mo keeshi ni yakulia yinji. Eswe waze atwama mo kaali atu asuku asuku.

³³ Yitumona nawa vungu lia Anake, atu ataluka. Yiumoneka ngwe mapasu ku meso jo.”