Kwalula 12 - Mukanda Wa Zambi 1970

Lamba lia Miriame

¹ Mose yambata pwo wa ku vungu lia Midiane. Miriame ni Arone yaamwambamba mumu hali pwo yoze.

² Yaamba ngwo: “Kuma Zambi hahanjika ni yena wika, yetu ka, nyi?” Mwene Zambi yevwa yize ahanjekele. (

³ Mose te mukwa kushimbika, chihomboloji kuhiana hakachi ka akwa hashi eswe.)

⁴ Susumuku Mwene Zambi yambila Mose ni Arone ni Miriame ngwenyi: “Ngunazange yenu atatu nwize ku zuwo lia kuwayila.” Eswe atatu yaaya.

⁵ Mwene Zambi yahulumukina hashi mu lelwa lize lialifwa ngwe nguji, yamana ku chikolo cha zuwo, yatambika ngwenyi: “Arone! Miriame!” Eswe aali yaakundama ko.

⁶ Mwene Zambi yaamba ngwenyi: “Haliabwila banjikenu chize ngunambe! Muze nuli ni akwa munanyi mukachi kenu, nakusoloka kuli ayo mu Usolwelo ni kuhanjika no mu yilota.

⁷ Alioze ni kavumbi kami Mose hi chocho ko. Hingunamwehe yilemu yeswe ya atu jami Aisraele.

⁸ Kashika nakuhanjika nenyi meso ni meso zwalala, hi ni yishima ko. Hanamono chizulie chami! Kuchi mba nunalimika ni kavumbi kami Mose?”

⁹ Mwene Zambi yaatenukina, mba yaya.

¹⁰ Lelwa yilikatuka ha zuwo lia Zambi lia makubu. Susumuku Miriame habwa ni musongo ukalu wa ha chikowa, (hanji mbumba) yalumuka mutoma ngwe chiwe. Muze Arone hamona ngwenyi, Miriame habwa ni musongo uze,

¹¹ yambila Mose ngwenyi: “Nalemba mwata, kanda utumwesa lamba lino mumu ha uhepuke wa mulonga wetu.

¹² Kanda umwecha hanga abwe ngwe mwana wa kuselumuna.”

¹³ Mba Mose yakololoka kuli Mwene Zambi ngwenyi: “Aa Zambi! Muwuke kama!”

¹⁴ Mwene Zambi yakumbulula ngwenyi: “Nyi ngwe tato wamufwila mate ku meso, kachi kechi kwivwa sonyi ha matangwa shimbiali, nyi? Kashika mwechenu atuhuke mu limbo, atwame ho matangwa shimbiali, kulutwe mba mahiluka nawa.”

¹⁵ Miriame yatuhuka mu musumba, yatwama haze matangwa shimbiali. Atu kaakatukile ha musumba ndoo ni muze Miriame ahilukile.

¹⁶ Mba yaakatuka ku Hazerote, yaajika musumba mu puya ya Parane.