Kwalula 11 - Mukanda Wa Zambi 1970

Tabera

¹ Atu yaabutuka kulinyenyeta kuli Mwene Zambi hakutwala ku lamba lio. Muze Mwene Zambi hachivwa, yevwa ufwatulo, yaatumina kahia. Yikalekwoka mukachi ko, yikonona songo limuwika lia musumba.

² Atu yaakololoka kuli Mose ha kwakwasa. Neye yalemba Mwene Zambi hanga kahia kajime.

³ Mba yaaluka ho ngwo, Tabera, mumu kahia ka Mwene Zambi yikalekwoka mukachi ko.

Mose yatongola miata makumi shimbiali

⁴ Kwabwile amwe yilambala waze te akwenda hamwe ni Aisraele. Yeevwa katu ya kulia yifwo, Aisraele ayo ene yaabutuka kulinyenyeta ngwo: “Iya matwaha kama yifwo tulie?

⁵ Mu chifuchi cha Egiptu te twakulialia yishi eswe waze te twakuzanga, te kutushi kufweta nichimwe. Tunewuluka chingombwa, ni kasakwa, ni ulenga, ni sopwola jeka ni jeka.

⁶ Haliabwila kutushi nawa ni tachi. Kutushi ni Chuma nichimwe cha kulia, shina kulia mana wika tangwa ha tangwa!” (

⁷ Mana yabwile ngwe tumbuto tukepe tukepe twa usungwa.

^8-9 Yasulumiokene ni mume ha musumba ufuku weswe. Muze hikwacha atu yaaya ni kuyikunga, yaayitwa hanji yaayifwenya wunga, yaayiteleka, mba yaayocha mbolo. Kuyema chayo ngwe mbolo ya kuchinga ni maji a olive.)

¹⁰ Muze Mose hevwa kulinyenyeta cha atu a jiko ni jiko ku mazuwo jo, yalinyenga ngwe chize Mwene Zambi eevwilile ufwatulo,

¹¹ yahula Mwene Zambi ngwenyi: “Kuchi mba Wangulinga chibi chichize? Kuchi mba unanguvwila wuli? Mumu yika wanguhele milimo ya kubwa mukwa lutwe wa atu wano eswe?

¹² Hi yami ko naamichine ufumba hanji kwasema, ka kwami! Mba kuchi unangwambe ha kwalela ni kwambata mu moko jami akaye ndoo ku chifuchi chize walakenyene tushakulu two?

¹³ Kulihi munguwana yifwo ha kulisa atu wano eswe? Kaanangulilila ni kungwita yifwo.

¹⁴ Chahashile kumbata yilemu ya atu wano eswe ukawami, mumu angwoka naye kwami!

¹⁵ Nyi Wangulinga chino, nguvwile kama keke, ungushihe kwami, hanga chichi kamona nawa lamba lize unangumwesa.”

¹⁶ Mwene Zambi yambila Mose ngwenyi: “Kungulula malunga makumi shimbiali alemu, a kuli makulwana ja atu, waanehe kuli yami ku zuwo lia kuwayila, alweze amane hamwe ni yena.

¹⁷ Munguhulumuka hashi ha kuhanjika ni yena, mungusa muli ayo Mwiku uzewene nakuhele yena. Mba maahasa kukukwasa ha kumbata yilemu ya atu wano, hanga kuuchi kayimbata ukawe.

¹⁸ Haliabwila lweza atu ngwe, ‘Lijilikenu, mumu hamene munukabwa ni yifwo ya kulia. Mwene Zambi hevwa kulila chenu ha kwamba ngwenu, tunazange yimwe yifwo ngwe yize te twakulia mu chifuchi cha Egiptu. Haliabwila Mwene Zambi manwaha yifwo, chanutamba kuyilia.

¹⁹ Kunuchi kayilia lume ha tangwa limuwika, hanji aali, hanji atano, hanji kumi, hanji makumi aali,

²⁰ alioze kakweji mweswe, ndoo muyituhuka mu mazulu jenu, ndoo munwivwa ku mazo chaa. Mumu hinwalituna Mwene Zambi yenu, yoze uli mukachi kenu. Hinwalila ngwenu, yika watutuhwishile mu Egiptu.’ ”

²¹ Mose yakumbulula Mwene Zambi ngwenyi: “Hano nguli ni atu 600,000, ni yena unambe ngwe, munguhasa kwaaha yifwo yinazuku mumu ha kakweji umuwika?

²² Kumana mutuhasa kwashihila ngombe ni mapanga anji, ha kwakuchisa, nyi? Chibwe yishi eswe a mu kalunga lwiji maazuka hali ayo, nyi?”

²³ Mwene Zambi yakumbulula ngwenyi: “Kuma kwoko liami hiliahiha, nyi? Ha shimbu likepe muumona nyi chize nambile muchimanunuka nyi ka!”

²⁴ Mba Mose yatuhuka, yalweza atu chize Mwene Zambi amwambile. Yakungulula miata makumi shimbiali, yaalonga ha kujingilika zuwo lia Zambi.

²⁵ Mba Mwene Zambi yahulumuka hashi mu lelwa ni kuhanjika nenyi, Yachiza ku Mwiku uze wabwile muli Mose, yausa muli miata. Muze te Mwiku hiwanjila muli ayo, yaabutuka kuhanjika munanyi, alioze ha shimbu lizeliene lume.

²⁶ Malunga aali a kuli miata makumi shimbiali, Eldade ni Medade, asalile mu musumba, kayile ko ku zuwo lia Zambi. Mwiku wa Linanga yiuhulumuka muli ayo kuzekwene mu musumba. No nawa yaabutuka kuhanjika munanyi.

²⁷ Umwe mukweze yazomboka nikulweza Mose yize te analingi Eldade ni Medade.

²⁸ Mba Yoshua mwana wa Nune, yoze te wakukwasa Mose chize ku ukweze wenyi, yalweza Mose ngwenyi: “Aholese!”

²⁹ Mose yakumbulula ngwenyi: “Unevu ukwa ha milimo yami, nyi? Ngunazange ngwami, Mwene Zambi ahane Mwiku wenyi kuli atu eswe, hanga atu eswe ahanjike munanyi!”

³⁰ Mba Mose ni e miata makumi shimbiali yaahiluka ku musumba.

Mwene Zambi yatuma tumbangu

³¹ Susumuku Mwene Zambi yatuma fuji, yiineha tumbangu a ku kalunga lwiji, te kaanende mu tetela ngwe metro yimuwika ni hashi. Yaajingilika musumba weswe Chipinji cha kwenda tangwa limuwika.

³² Mba tangwa lize lieswe, ni ufuku weswe, ni ha tangwa lia muchaali heswe, atu yaahondangana ha kukwata tujila waze. Yoze wakwachile akepe yabwa ni kilo 1,000. Yaamwanga nikwanyika ha musumba weswe.

³³ Muze te achili ni yifwo yinji ya kulia, Mwene Zambi yeevwila ufwatulo, yaaha chipuho chinene.

³⁴ Homa haze yaaluka ho jina ngwo: “Mafuka ja akwa usolo ubi,” mumu afunjile ho atu waze evwile usona wa yifwo.

³⁵ Atu yaakatuka ko, yaaya ku Hazerote, kwenako ajikile musumba wo.