Kwalula 10 - Mukanda Wa Zambi 1970

Yitavwi ya prata

¹ Mwene Zambi yambila Mose ngwenyi:

² “Fula yitavwi yaali ya kutatula ya prata ya kukungulula atu ha kuzula mazuwo ha musumba.

³ Muze maayimba yeswe yaali, akwa Chikungulwila eswe maakunguluka kuli yena ku chikolo cha zuwo lia kuwayila.

⁴ Alioze muze meemba lume chitavwi chimuwika Chipinji chisuku, miata wika a majimo e maakunguluka kuli yena.

⁵ Muze meemba chitavwi Chipinji chihi, mavungu a ku sali lia chivumbuko maakatuka.

⁶ Muze meemba chitavwi Chipinji chihi chisuho cha muchaali, mavungu a ku sali lia sude maakatuka. Chenacho meemba chitavwi Chipinji chihi ha kuzula mazuwo ha musumba.

⁷ Alioze ha kutambika akwa Chikungulwila alikungulule, memba chitavwi Chipinji chisuku.

⁸ Ye yitavwi akayimba kuli ana malunga ja hako Arone. “Shimbi yino nukayifunga ndoo ku miaka yeswe.

⁹ Mu chifuchi chenu, muze akwa kole jenu maakeza ha kwasa nenu jita, nukemba yitavwi yino. Mba yami Mwene Zambi, Zambi yenu, mungukanukwasa ni kunulamwina.

¹⁰ Chimuwika nawa ha matangwa ja uwahililo wenu, ha yiwanyino yenu ya Kakweji Mwaha ni ha yiwanyino yikwo, nukemba yitavwi muze munulambula milambu yenu ya kwocha ni ya kulivwa ni yami Mwene Zambi. Mba mungukanukwasa. Yami nguli Mwene Zambi, Zambi yenu.”

Aisraele yaakatuka ha musumba

¹¹ Ha tangwa lia makumi aali lia kakweji wa muchaali ha mwaka wa muchaali, muze Aisraele akatukile mu chifuchi cha Egiptu, lelwa yilizunduka ha zuwo lia Zambi.

¹² Aisraele yaabutuka kwenda cho, yaatuhuka mu puya ya Sinai. Lie lelwa yihenda, yilihulumukina mu puya ya Parane.

¹³ Yaabutuka kwenda nikulita ni liji lia Zambi lize ambilile Mose.

¹⁴ Ha tangwa lieswe muze akatwokele, te kaakwenda mu mbunga ni mbunga. Vungu lia Yuda ni bendelo lio enoo te akutetekela kulutwe, chizavu ni chizavu. Mwata wo Nasone mwana wa Aminadabe.

¹⁵ Mwata wa vungu lia Isakare te Netanele mwana wa Zuare.

¹⁶ Mwata wa vungu lia Zabulone te Eliabe mwana wa Helone.

¹⁷ Mba majimo ja Gershone ni Merari, waze te akumbata zuwo lia Zambi lia makubu, maazula lie zuwo, maabutuka kuya.

¹⁸ Mukuhata, vungu lia Rubene ni bendelo lio maabutuka kuya, chizavu ni chizavu. Mwata wo te Elizure mwana wa Shedure.

¹⁹ Mwata wa vungu lia Simeone te Shelumiele mwana wa Zurishadai.

²⁰ Mwata wa vungu lia Gade te Eliasafe mwana wa Duele.

²¹ Mba jimo lia Kohate, wa ku vungu lia Levi, maabutuka kuya nikumbata yikashi ya chijila ya mu zuwo lia Zambi. Muze haaheta ku musumba ukwo, atu yaamika nawa zuwo lia Zambi.

²² Mukuhata, vungu lia Efraime ni bendelo lio maabutuka kuya, chizavu ni chizavu. Mwata wo te Elishama mwana wa Amihude.

²³ Mwata wa vungu lia Manase te Gamaliele mwana wa Pedazure.

²⁴ Mwata wa vungu lia Benjamine te Abidane mwana wa Gideoni.

²⁵ Hakusula, vungu lia Dane ni bendelo lio maabutuka kuya, chizavu ni chizavu. Mwata wo Ahizere mwana wa Amishadai.

²⁶ Mwata wa vungu lia Ashere te Pagiele mwana wa Okrane.

²⁷ Mwata wa vungu lia Naftali te Ahira mwana wa Enane.

²⁸ Chenacho te Aisraele akwenda chizavu ni chizavu muze te akukatuka ha musumba ni kuya.

²⁹ Mose yambila nyalienyi Hobabe, mwana wa Jetro, Kamidiane, ngwenyi: “Himutuya ku chifuchi chize Mwene Zambi hanatulakenya kutwaha. Hanalakenya kuwahisa Aisraele, kashika tweya hamwe ni yetu. Mutulianyina chitundo chetu hamwe ni yenu.”

³⁰ Hobabe yakumbulula ngwenyi: “Ka, yami ngunahiluka ku chifuchi chami, kuli usoko wami.”

³¹ Mose ngwenyi: “Twalemba mwane, kanda nutuhichika. Yenu nunanyingika kuze tunahase kujika musumba mu puya yino. Yenu nunahase kubwa kasongo ketu.

³² Nyi ngwe nweza hamwe ni yetu, mutulianyina yiwape yeswe yize Mwene Zambi makatwaha.”

Aisraele yakatuka ni kuya

³³ Muze atu akatukile ha mulundu wa Mwene Zambi, yeenda ungeji wa matangwa atatu. Mushete wa Usendo wa Mwene Zambi ni atu yiutetekela kulutwe lio matangwa eswe ha kwamwena homa haze maajika musumba.

³⁴ Ha kukatwoka ha misumba, lelwa lia Mwene Zambi yiliaafuka chizulie ha mwalwa.

³⁵ Muze te mushete muubutuka kuya, Mose mamba ngwenyi: “Mwene Zambi katuka, mwanga akwa kole je, hanga waze akukuvutwokela!”

³⁶ Heswaho te we mushete wakutulila Mose mamba ngwenyi: “Mwene Zambi hiluka kuli tununu twa majiko ja Aisraele.”