Kwalula 1 - Mukanda Wa Zambi 1970

Mose yalula Aisraele chisuho chitangu

¹ Ha tangwa litangu lia kakweji wa muchaali ha mwaka wa muchaali chize muze Aisraele atuhukile mu chifuchi cha Egiptu, Mwene Zambi yahanjika kuli Mose mu zuwo lia Zambi lia makubu, mu puya ya Sinai. Yamba ngwenyi:

² “Yena ni Arone alulenu Aisraele nikulita ni majimo ni majiko jo. Alulenu majina ja malunga eswe,

³ chize kuli waze haabwa ni miaka makumi aali ndoo kuli makulwana waze anatela kuya ku jita.

⁴ Ku vungu ni vungu nutongola mwata wa jimo limuwika ha kunukwasa.”

^5-16 No yaatongola miata wano ku Chikungulwila, nikulita ni mavungu jo, ha kukwasa ku milimo yino: Vungu Mwata wa jimo Rubene Elizure mwana wa Shedure Simeone Shelumiele mwana wa Zurishadai Yuda Nasone mwana wa Aminadabe Isakare Netanele mwana wa Zuare Zabulone Eliabe mwana wa Helone Efraime Elishama mwana wa Amihude Manase Gamaliele mwana wa Pedazure Benjamine Abidane mwana wa Gideoni Dane Ahizere mwana wa Amishadai Ashere Pagiele mwana wa Okrane Gade Eliasafe mwana wa Duele Naftali Ahira mwana wa Enane

Vungu Mwata wa jimo

¹⁷ Mose ni Arone yaanda malunga wanokumi ni aali ha kwakwasa.

^18-46 Yaakungulula Chikungulwila cheswe ha tangwa litangu lia kakweji wa muchaali, yaasoneka Aisraele eswe ku majimo ni majiko. Yaalula, yaasoneka malunga eswe, waze haabwa ni miaka makumi aali ndoo kuli makulwana, waze atela kwasa jita, ngwe chize Mwene Zambi ahanyine Shimbi. Mose yasoneka majina jo mu puya ya Sinai, nikulita ni majimo ni majiko, butu ku vungu lia Rubene, mwana mutanguwa Yakoba. Unji wapwile ngwe uno: Vugu Kwoka cho Rubene 46,500 Simeone 59,300 Gade 45,650 Yuda 74,600 Isakare 54,400 Zabulone 57,400 Efraime 40,500 Manase 32,200 Benjamine 35,400 Dane 62,700 Ashere 41,500 Naftali 53,400 Malunga eswe: 603,550

Vugu Kwoka cho

⁴⁷ Alioze Alevi kaasonekene ko hamwe ni mavungu akwo,

⁴⁸ mumu te Mwene Zambi hambila Mose ngwenyi:

⁴⁹ “Muze munwalula atu waze anatela kwasa jita, Alevi kanda nukaasa ko.

⁵⁰ Alioze Alevi nukaaha milimo ya kufunga zuwo lia kuwayila ni yikashi yalio yeswe. Milimo yo yakumbata lie zuwo hamwe ni yikashi ni kulingila mo milimo, ni kululika musumba.

⁵¹ Muze munukatuka ha musumba wenu, Alevi maazula zuwo liami nikulivunga, nikuya nalio, nikulijika ha musumba Waha. Nyi mutu weka makundama ko akamushihe.

⁵² Aisraele waze asala ho akaahandununa ha kujika mazuwo, nikulita ni mavungu jo, mutu ni mutu hamwe ni mbunga yenyi, mushi lia bendelo yenyi.

⁵³ Alioze Alevi akajingilika mazuwo jo ku zuwo liami ha kulifunga, hanga mutu niumwe kechi kukundama ni kungusosomba ngutenuke ha kumwesa Chikungulwila cha Aisraele lamba.”

⁵⁴ Aisraele yalinga yuma yeswe ngwe chize Mwene Zambi ambilile Mose.