Kutuhuka 9 - Mukanda Wa Zambi 1970

Yimuna viifwa ni misongo

¹ Mwene Zambi yambila Mose ngwenyi: “Yako ulweze mwanangana ngwe: ‘Mwene Zambi, Zambi ya Ahebreu kanambe ngwenyi: Echa atu jami aye angulingile.

² Nyi walituna nawa ha kwaha jila,

³ mungumwesa yimuna ye lamba ni misongo yinji: tuvwalu, ni yimbulu, ni tumelu, ni ngombe, ni mapanga; ni pembe.

⁴ Munguhandununa hakachi ka yimuna ya Aisraele ni yize ya akwa Egiptu, chimuna cha Aisraele nichimwe kuchichi kufwa.

⁵ Yami Mwene Zambi hinabatula kuchilinga hamene.’ ”

⁶ Mukwacha, Mwene Zambi yalinga Chuma chize abatwile. Yimuna yeswe ya akwa Egiptu yiifwafwa, alioze ku yimuna ya Aisraele nichimwe kuchafwile ko.

⁷ Mwanangana yevwa ngwo; ku yimuna ya Aisraele nichimwe kuchafwile ko. Hindu mwanangana yakalisa mbunge yenyi, katayijile ko Aisraele kuya.

Yivunda

⁸ Mwene Zambi yambila Mose ni Arane ngwenyi: “Yeenu nuzomone uto wa lutengo ha moko, Mose maukukumwina ku meso ja mwanangana.

⁹ Uto uze muuhehuka kweswe ngwe fufuta mu chifuchi cheswe cha Egiptu; yivunda yize muyihana yilonda kuli atu ni kuli yimuna.”

¹⁰ Mba yaanda uto wa lutengo, yeza ku meso ja mwanangana. Mose yaukukumwina mu tetela, mba yiubwa yivunda yize yakwachile atu ni yimuna yeswe.

¹¹ Akwa kulinga yipupu kaahashile ko kuheta ku meso ja Mose mumu ni ayo nawa yaakwachika yivunda ngwe atu akwo eswe a mu Egiptu.

¹² Alioze Mwene Zambi yakalisa mbunge ya mwanangana. Kashika kaabanjikile ko, ngwe chize Mwene Zambi ambilile Mose ni Arane.

Chiwe

¹³ Mwene Zambi yambila Mose ngwenyi: “Hamene ulimeneka, ukamane ku meso ja mwanangana, ukamulweze ngwe: ‘Mwene Zambi, Zambi ya Ahebreu, kanambe ngwenyi: Echa atu jami aye hanga akanguwayile.

¹⁴ Chisuho chino mungunumwesa lamba, hi akwa kuyula ni atu je wika ko, alioze ni yena mwene nawa, mba muunyingika ngwe, hashi heswe kuheshi mukwo walifwa ni yami Zambi.

¹⁵ Nyi ngunakazanga ngwami, ngukushihe yena ni atu je ni misongo, kachi yenu eswe hinwafwa kulu.

¹⁶ Alioze nakwechele ni mwono hanga umone ndundo jami, hanga lufuma wami akafumane hashi heswe.

¹⁷ Hindu unalizundula, kuusolo kwecha atu jami hanga aye.

¹⁸ Hamene chichamene, ha shimbu linoliene, mungukanokesa chiwe. Haanga te kanda chinoka kama mu chifuchi cha Egiptu.

¹⁹ Haliabwila lweza atu je achize yimuna yeswe, pembe ni mapanga ni ngombe waze ali mu yambu, aanjise mu matanga. Atu eswe ni tushitu eswe waze maasala haze, chiwe muchaanoka, mba eswe kumaafwa.’ ”

²⁰ Amwe akwa kuyula yeevwa woma ha maliji waze ambile Zambi, yaanjisa tufunga two ni yimuna yo mu mazuwo.

²¹ Alioze akwo yaalelesa maliji ja Mwene Zambi, yaahichika tufunga two ni yimuna yo mu yambu.

²² Mwene Zambi yambila Mose ngwenyi: “Olola kwoko lie kwilu, hanga chiwe chinoke mu chifuchi cheswe cha Egiptu, hali atu, ni hali tushitu, ni ha yibuta yeswe ya mu yambu.”

²³ Mose yanda lukanda wenyi, yolola kwoko kwilu, mba Mwene Zambi yatuma kukulunguza ni chiwe ni mihenyo hashi.

²⁴ Che chiwe yichinoka chinji ni njaji yaahenya sali ni sali, haanga te kanda chinoka kama mu Egiptu.

²⁵ Chiwe yichonona yuma yize yabwile haze, ni atu ni yimuna. Yichiwonda yuma yeswe ya mu minda, yichimakwona mitondo yeswe.

²⁶ Shina lume mu chifuchi cha Goshene, kuze te atwama Aisraele, chi we kuchanokene ko.

²⁷ Mwanangana yatambika Mose ni Arone, yaamba ngwenyi: “Chisuho chino natayiza ngwami, ngunakalinga chibi. Mwene Zambi kali mukwa ululi, yami ni atu jami twavulumuna.

²⁸ Liumbenu kuli Mwene Zambi hanga chiwe ni kukulunguza yiibatuke. Mungunwecha hanga nuye, chichi kunukwika nawa.”

²⁹ Mose yamukumbulula ngwenyi: “Muze mungutuhuka mu limbo mungwolola moko jami ni kulemba Mwene Zambi. Kukulunguza muchihola, ni chiwe kuchichi kunoka nawa, mba hanga nunyingikenu ngwenu, kuma hashi ha mbala ha Mwene Zambi.

³⁰ Alioze ngunanyingika ngwami, yenu ni atu jenu kanda nuchivwila Mwene Zambi woma.”

³¹ Akwa Egiptu, minda yo ya Wanda ni masa yiifwa ni chiwe. Mumu te masa haabwa ni mitwe, ni Wanda hiwatemuna.

³² Alioze minda ya tiriku ni masangu kuyafwile ko, mumu te kanda yichikola.

³³ Mose yahichika mwanangana, yatuhuka mu limbo, yolola moko kwilu ni kulemba Mwene Zambi. Mba kukulunguza yichihola, ni chiwe ni vula yiibatuka.

³⁴ Muze mwanangana hamona ngwenyi, chiwe ni vula hiyabatuka, ni kukulunguza hichahola, yalinga nawa yibi. Iye ni e akwa kuyula yaakalisa mbunge jo.

³⁵ Mbunge yenyi yiibwa yikalu. Kechele ko Aisraele kuya, ngwe chize Mwene Zambi ambile ku kanwa lia Mose.