Kutuhuka 8 - Mukanda Wa Zambi 1970

Yula ya mbwota

¹ Mba Mwene Zambi yambila Mose ngwenyi: “Yako ulweze mwanangana ngwe: ‘Mwene Zambi kanambe ngwenyi: Echa atu jami aye hanga akangulingile.

² Nyi kusolo, mungulamba chifuchi ni kwanyiza mo yula ya mbwota.

³ Lwiji wa Nile kumazala ni yula ya mbwota waze maatuhuka mu meya, meeza ni kunjila mu zuwo lie ni mu chibatulo che cha kubomba ndoo ni ha muhela we, ni mu mazuwo ja akwa kuyula ni atu je, ni ha majiko je, chibwe mu yenga ye ya kuchikila mbolo.

⁴ Matumbwoka hali yena ni hali atu je ni hali akwa kuyula eswe.’ ”

⁵ Mwene Zambi yambila nawa Mose ngwenyi: “Lweza Arone ande lukanda wenyi, olole kwoko ha njiji ni ha tupila twa meya ni ha yitende yeswe, hanga yula ya mbwota alianyize mu chifuchi cha Egiptu.”

⁶ Mba Arone yolola kwoko lienyi ha meya eswe, mba yula ya mbwota yaatuhwoka, yaalianyiza chifuchi cheswe.

⁷ Alioze akwa kulinga yipupu, ni mana jo, no yaalumba yula ya mbwota.

⁸ Mwanangana yatambika Mose ni Arone ngwenyi: “Liumbenu kuli Mwene Zambi atuchijile kama yula ya mbwota wano, mba mungwecha atu jenu hanga aye kwo, akalambule Mwene Zambi mulambu.”

⁹ Mose ngwenyi: “Nalemba mwanangana, mu ulemu wenu tongolenu kama tangwa lize mutuhanjika ni Zambi hanga yula ya mbwota anukatuke, yenu, ni akwa kuyula, ni atu jenu, hanga asale lume mu lwiji Nile.”

¹⁰ Mwanangana ngwenyi: “Hamene.” Mose ngwenyi: “Chenacho chilite ni liji lienu, mba hanga nunyingike ngwenu, kukushi zambi mukwo uli ngwe Mwene Zambi, Zambi yetu.

¹¹ Yula ya mbwota kumaakanukatuka, yenu, ni akwa kuyula, ni atu jenu. Niumwe kechi kubwa ko nawa shina mu lwiji Nile.”

¹² Mba Mose ni Arane yaahichika mwanangana, yaaya kwo. Mose yalemba Mwene Zambi hanga achize yula ya mbwota waze te Mwene Zambi hatumina mwanangana wa Egiptu.

¹³ Mwene Zambi yevwa kulemba cha Mose, mba yula ya mbwota waze te ali mu mazuwo, ni mu yipanga, ni ku minda, yaafwafwa.

¹⁴ Akwa Egiptu yaakungula, yaalumbika milumba, chifuchi yichinuka vumba kuhiana lia yula ya mbwota.

¹⁵ Muze mwanangana hamona ngwenyi, hikwahwa, yakalisa nawa mbunge yenyi, ngwe chize ambile Mwene Zambi. Hi kabanjikile ko Mose ni Arane.

Yina

¹⁶ Mwene Zambi yambila Mose ngwenyi: “Lweza Arane ande lukanda wenyi, amulambe hashi, hanga fufuta yalumuke yina mu chifuchi cheswe cha Egiptu.”

¹⁷ No yaalinga Chenacho. Arane yanda lukanda wenyi, yamulamba hashi. Mba fufuta yeswe ya mu Egiptu yiiyalumuka yina, yaabwa hali atu ni hali tushitu.

¹⁸ Akwa kulinga yipupu no yeeseka, ni mana jo, ha kweembulula, alioze kaahashile ko. Yina yaabwa hali atu ni hali tushitu.

¹⁹ Akwa kulinga yipupu yaalweza mwanangana ngwo: “Zambi walinga Chuma chino.” Hindu mwanangana wa Egiptu yakalisa mbunge yenyi ngwe chize ambile Mwene Zambi. Hi kabanjikile ko Mose ni Arane.

Jiji

²⁰ Mwene Zambi yambila Mose ngwenyi: “Hamene ulimeneka ulitakane ni mwanangana muze anayi ku lwiji Nile. Umulweze ngwe: ‘Mwene Zambi kanambe ngwenyi: Echa atu jami aye, hanga akanguwayile.

²¹ Nyi kuusolo, mungunutumina mazaji a jiji hali yena mwene, ni akwa kuyula ni atu je, ni mazuwo je. Mazuwo ja akwa Egiptu eswe maazala ni mazaji a jiji ni maalianyiza hashi heswe.

²² Shina chifuchi cha Goshene che munguhandununa ko. Kuze kwatwama atu jami, jiji keechi kubwa ko. Mba hanga unyingike kanawa ngwe, yami Mwene Zambi nguli mu chifuchi chino.

²³ Kulisa muchibwa hakachi ka atu je ni atu jami. Chilayi chize muchibwa hamene.’ ”

²⁴ Yichibwa Chenacho. Mwene Zambi yatuma mazaji anene a jiji mu zuwo lia mwanangana ni mu mazuwo ja akwa kuyula. Chifuchi cheswe cha Egiptu yichibiha ni jiji.

²⁵ Mba mwanangana yatambika Mose ni Arone ngwenyi: “Yeenu nukalambule Zambi yenu milambu, alioze shina munomwene mu chifuchi cha Egiptu.”

²⁶ Mose ngwenyi: “Ka mwanangana, akwa Egiptu kubiha kuhiana meevwa hakutwala ku yimuna yize mutubwa ni kulambula Mwene Zambi, Zambi yetu. Nyi mutwocha yimuna yize ya Shimbi ku meso ja akwa Egiptu, keechi kutushiha ni mawe, nyi?

²⁷ Chatutamba kuya mu wenyi wa matangwa atatu mu puya ha kulambula Zambi yetu mulambu, ngwe chize ambile iye mwene.”

²⁸ Mba mwanangana yamba ngwenyi: “Nanutayiza nuye nukalambule Zambi yenu mulambu mu puya, alioze kanda nuya kusuku. Ni yami nungulembela kama.”

²⁹ Mose ngwenyi: “Mwane ngunaye, mungulemba Mwene Zambi. Hamene mazaji a jiji maakanukatuka yenu ni akwa kuyula ni atu jenu. Alioze kanda nutwonga nawa ha kulituna kwaha atu jetu jila ha kuya ni kulambula Mwene Zambi mulambu.”

³⁰ Mose yakatuka kuli mwanangana wa Egiptu, yaya ni kulemba Mwene Zambi.

³¹ Mwene Zambi yalinga yeswe yize aliumbilile Mose. Jiji yakatuka kuli mwanangana ni kuli akwa kuyula ni kuli atu jenyi. Jiji niumwe kasalile ko.

³² Alioze chibwe chisuho chize hindu mbunge ya mwanangana yiikala, katayijile ko Aisraele kuya.