Kutuhuka 7 - Mukanda Wa Zambi 1970

¹ Mwene Zambi ngwenyi: “Ngunakupwisa ngwe Zambi ku meso ja mwanangana, mba yayenu Arone makahanjika nenyi ngwe mukwa munanyi we.

² Lweza Arone yeswe yize ngunambe, neye akalweze mwanangana, hanga eche Aisraele akatuke mu chifuchi chenyi.

³ Alioze mungukalisa mbunge ya mwanangana. Chibwe mungwokesa yilayi ni yikomokeso, hindu kechi kunwivwa.

⁴ Alioze mungulamba chifuchi cha Egiptu, ngukachize atu jami Aisraele, ni ubatwilo unene weka ni weka.

⁵ Akwa Egiptu maakanyingika ngwo, yami nguli Mwene Zambi, muze mungukaamwesa lamba ni kutuhwisa Aisraele mu chifuchi cho.”

⁶ Mose ni Arane yaalinga chize ambile Mwene Zambi.

⁷ Muze ahanjekele ni mwanangana, Mose te habwa ni miaka 80, Arane 83.

Lukanda wa Arone

⁸ Mwene Zambi yambila Mose ni Arane ngwenyi:

⁹ “Nyi mwanangana manwamba ha kulinga chilayi, ukalweza Arane ngwe: ‘Anda lukanda we mumbile ku meso ja mwanangana, malumuka kapela.’ ”

¹⁰ Chenacho Mose ni Arane ayile maha mwanangana, yaalinga yize Mwene Zambi aambile. Arane yambila lukanda wenyi hashi ku meso ja mwanangana ni akwa kuyula, mwe lukanda yalumuka kapela.

¹¹ Alioze mwanangana yatambika akwa mana ni akwa kulinga yipupu, no yaalinga chizechene ni mana jo.

¹² Mutu ni mutu yambila lukanda wenyi hasi, yiijalumuka tupela. Alioze lukanda wa Arane yajiminamina.

¹³ Hindu mbunge ya mwanangana yiikala, kaabanjikile ko, ngwe chize aalwezele Mwene Zambi.

Zambi yamwesa akwa Egiptu lamba lieka ni lieka Meya yalumuka manyinga

¹⁴ Mwene Zambi yambila Mose ngwenyi: “Mbunge ya mwanangana yinakale mbe, kasolo kwecha atu aye.

¹⁵ Yako ukamubatwize hamene chichamene, shimbu lize anapalumuka ku lwiji Nile, ukamane ku mbumbulu ya lwiji. Mu kwoko lie ukakwata lukanda we yoze walumukine kapela.

¹⁶ Ukamulweza ngwe: ‘Mwene Zambi, Zambi ya Ahebreu, hanangutumu ngwenyi: Echa atu jami aye akanguwayile mu puya. Nawa ngwenyi: Ndoo ni musono kuusolo kungwivwa.

¹⁷ Mwene Zambi kanambe ngwenyi: Ha chino muukanyingika ngwe, yami nguli Mwene Zambi. Mungulamba lukanda wami ha meya a Nile, mba maakalumuka manyinga.

¹⁸ Yishi mu lwiji kumaakafwa, meya kumaakanuka vumba kuhiana, mba yenu akwa Egiptu kunuchi kuhasa kwaanwa.’ ”

¹⁹ Mwene Zambi yambila Mose ngwenyi: “Lweza Arane ande lukanda wenyi, olole kwoko ha njiji jeswe ja mu Egiptu, ni ha tupila twa meya, ni ha yitende yo, ni ha mashima jo. Mba meya maakalumuka manyinga mu chifuchi cheswe, chibwe mu mabanda a mitondo ni mu milondo ya mawe.”

²⁰ Mose ni Arane yaalinga ngwe chize ambilile kuli Mwene Zambi. Mose yanda lukanda wenyi ku meso ja mwanangana ni ku meso ja atu jenyi, yamwamba ha meya a mu lwiji Nile, mba meya eswe yaalumuka manyinga.

²¹ Yishi mu meya yafwa, meya yaanuka vumba kuhiana, mba akwa Egiptu hikahashile ko kwaanwa nawa. Manyinga yaabwa mu chifuchi cheswe cha Egiptu.

²² Akwa kulinga yipupu a mu Egiptu yaalinga chizechene ni mana jo, mba mbunge ya mwanangana yiikala. Hikevwilile ko Mose ni Arane, ngwe chize ambile Zambi.

²³ Yahiluka ku mahienyi, kayisele ko ku mbunge.

²⁴ Akwa Egiptu eswe yaafulafula ku mbumbulu ya Nile hanga amone meya a kunwa, mumu te kaahashile kunwa meya a mu Nile.

²⁵ Yikubalika matangwa shimbiali chize kuze Mwene Zambi alambile meya a Nile.