Kutuhuka 6 - Mukanda Wa Zambi 1970

¹ Mwene Zambi ngwenyi: “Haliabwila muumona chize mungulinga mwanangana. Mungumushinjika anweche nuye, mungumushinjika anuhange mu chifuchi chenyi.”

Zambi yatakamisa Mose

² Zambi yambila Mose ngwenyi: “Nguli Mwene Zambi.

³ Hingunalisolola kuli Abrahama, ni Isake, ni Yakoba ngwami, nguli Zambi Mukwa Ndundo Jeswe. Alioze chaalwezele jina lino ngwami, Mwene Zambi

⁴ Nawa, yingukolesa no Usendo, yingwalakenya chifuchi cha Kanana, chifuchi chize atwamine ngwe njize.

⁵ Hinevwa chize Aisraele analinyenge ha lamba lize anaamwesa kuli akwa Egiptu. Haliabwila hinewuluka Usendo uze nakolesele no.

⁶ Mba yena Chakutamba kulweza Aisraele: ‘Zambi kanambe ngwenyi: Nguli Mwene Zambi. Yami mungunutusula ni kunukula mu undungo kuli akwa Egiptu. Mungunulamwina ni ndundo ku moko jo ni kwamwesa lamba.

⁷ Mungunupwisa lume atu ja yami mwene, mungubwa Zambi yenu. Mununyingika ngwenu, nguli Mwene Zambi, Zambi yenu, muze mungunutusula mu undungo kuli akwa Egiptu.

⁸ Mungunutwala mu chifuchi chize nalakenyene Abrahama, ni Isake, ni Yakoba. Mungukanwaha cho, kumuchikabwa nichenu. Yami nguli Mwene Zambi.’ ”

⁹ Mose yalweza Aisraele maliji waze, alioze kaamuvwile ko mumu te haalekumuka ha lamba lia undungo wo.

¹⁰ Mba Mwene Zambi yambila Mose ngwenyi:

¹¹ “Yako ulweze mwanangana wa Egiptu ngwe, chamutamba kwecha Aisraele aye kwo.”

¹² Alioze Mose ngwenyi: “Aisraele kaasolo kungwivwa kwami, mba kuchi mwanangana mangwivwa? Chikwo nawa, nguli mukwa chilimi.”

¹³ Mwene Zambi yambila Mose ni Arone ngwenyi: “Lwezenu Aisraele ni mwanangana wa Egiptu ngwenu, yami nanutuma hanga nutuhwise Aisraele mu Egiptu.”

Vungu lia Mose ni Arone

¹⁴ Rubene te mwe mwana mutangu wa Israele, ana jenyi a malunga wano: Hanoke, ni Palu, ni Hezrone, ni Karmi, e tushakulu twa majimo jo.

¹⁵ Ana ja Simeone a malunga wano: Jemuele, ni Jamine, ni Ohade, ni Jakine, ni Zohare, ni Shaule, mwana yozo asemene ni pwo wa Akanana, e tushakulu twa majimo jo.

¹⁶ Ana ja Levi a malunga wano: Gershone, ni Kohate, ni Merari, e tushakulu twa majimo jo. Levi, ha kufwa chenyi, te habwa ni miaka 137.

¹⁷ Ana ja Gershone a malunga wano: Libni, ni Shimei, te habwa vungu linene.

¹⁸ Ana ja Kohate a malunga wano: Amrame, ni Izehare, ni Hebrone, ni Uziele. Kohate ha kufwa chenyi, te habwa ni miaka 133.

¹⁹ Ana ja Merari a malunga wano: Mali, ni Mushi. Wano e majimo ja Levi nikulita ni vungu lio.

²⁰ Amrame yambata Jokebede, ndumbu ya tato. Yasema nenyi Arone ni Mose. Amrame ha kufwa chenyi te habwa ni miaka 137.

²¹ Ana ja Izehare a malunga wano: Kora, ni Nefege, ni Zikri.

²² Ana ja Uziele a malunga wano: Mishaele, ni Elzafane, ni Shitri.

²³ Arone yambata Elisheba, mwana wa Aminadabe, ndumbu ya Nasone. Elisheba yasema ana wano ni Arone: Nadabe, ni Abihu, ni Eleazare, ni Itamare.

²⁴ Ana ja Kora a malunga wano: Asire, ni Elkana, ni Abiasafa, e tushakulu twa jimo lia Kora.

²⁵ Eleazare, mwana wa Arone, yambata mwana wa Putiele. Pwo yoze yasema nenyi mwana, jina lienyi Finehase. Atu wano kaali tushakulu twa majiko ja Alevi nikulita ni majimo jo.

²⁶ Arane ni Mose enoo Mwene Zambi alwezele ngwenyi: “Tuhwisenu atu jami Aisraele mu chifuchi cha Egiptu, mu mikana ngwe tujita.”

²⁷ Ayo ayile nikulweza mwanangana wa Egiptu ngwo: “Echa Aisraele aye kwo.”

Maliji ja Mwene Zambi kuli Mose ni Arone

²⁸ Muze Mwene Zambi ahanjikile ni Mose mu chifuchi cha Egiptu,

²⁹ yamwamba ngwenyi: “Nguli Mwene Zambi. Yako ulweze mwanangana wa Egiptu yeswe yize ngunakwambe.”

³⁰ Alioze Mose yakumbulula ngwenyi: “Ewa mwane. Unanyingika ngwe, yami nguli mukwa chilimi, ngwe kuchi mwanangana manguvwila?”